Proverbi ܡܬ̈ܠܐ 9

¹ ܚܟܡܬܐ ܒܢܬ ܒܝܬܐ ܘܐܩܝܡܬ ܒܗ ܫܒܥܐ ܥܡ̈ܘܕܝܢ

² ܘܢܟܣܬ ܢܟܣܬܗ̇ ܘܡܙܓܬ ܚܡܪܗ̇ ܘܛܝܒܬ ܦܬܘܪ̈ܝܗ̇

³ ܘܫܕܪܬ ܥܒ̣̈ܕܝܗ̇ ܕܢܩܪܘܢ ܥܠ ܪ̈ܡܬܐ ܘܢܐܡܪܘܢ

⁴ ܡܢܘ ܕܫܒܪ ܢܐܬܐ ܠܘܬܝ ܘܕܚܣܝܪ ܪܥܝܢܗ ܘܐܡܪ ܠܗ

⁵ ܬܘ ܐܟܘܠܘ ܡܢ ܠܚܡܝ ܘܐܫܬܘ ܡܢ ܚܡܪܐ ܕܡܙܓܬ

⁶ ܘܐܢܝܚܘ ܡܢܟܘܢ ܚܣܝܪܘܬ ܪܥܝܢܟܘܢ ܘܚܝܘ ܘܐܘܪܚܐ ܬܪܝܨܬܐ ܐܬܪܥܘ

⁷ ܡܪܕܘܬܐ ܠܒܝܫܐ ܝܗܒܐ ܠܗ ܨܥܪܐ ܘܡܟܣ ܠܥܘܠܐ ܡܘܡܗ

⁸ ܠܐ ܬܟܣ ܠܒܝܫܐ ܕܠܐ ܢܣܢܝܟ ܐܠܐ ܐܟܣ ܠܚܟܝܡܐ ܕܢܪܚܡܟ

⁹ ܗܒ ܐܦܬܐ ܠܚܟܝܡܐ ܕܬܘܒ ܢܬܚܟܡ ܘܐܘܕܥ ܠܙܕܝܩܐ ܕܢܘܣܦ ܥܠ ܝܘܠܦܢܗ

¹⁰ ܪܝܫ ܚܟܡܬܐ ܕܚܠܬܗ ܕܡܪܝܐ ܘܝܕܥܬܐ ܕܙܕܝܩ̈ܐ ܣܘܟܠܐ

¹¹ ܡܛܠ ܕܒܗ̇ ܢܣܓܘܢ ܝܘܡ̈ܬܟ ܘܢܬܬܘ̈ܣܦܢ ܠܟ ܫ̈ܢܝܐ ܕܚ̈ܝܐ

¹² ܒܪܝ ܐܢ ܚܟܝܡ ܐܢܬ ܠܢܦܫܟ ܚܟܝܡ ܐܢܬ ܘܠܪ̈ܚܡܝܟ ܘܐܢ ܬܗܘܐ ܒܝܫ ܒܠܚܘܕܝܟ ܬܕܠܐ ܐ̈ܢܝܢ ܒܝܫ̈ܬܟ ܐܝܢܐ ܕܣܪܒ ܕܓܠܐܝܬ ܪܥܐ ܪ̈ܘܚܝܢ ܘܪܕܦ ܥܘܦܐ ܕܫܡܝܐ ܫܒܩ ܓܝܪ ܐܘܪܚܐ ܕܟܪܡܗ ܘܛܥܐ ܫܒ̈ܝܠܝ ܦܘܠܚܢܗ ܠܡܪܕܐ ܒܚܘܪܒܐ ܕܠܐ ܡ̈ܝܢ ܘܡܢ ܐܝܕܐ ܕܕܪܝܫܐ ܪܕܐ ܒܨܗܝܐ ܐܦ ܗܘ ܢܟܢܫ ܠܐ ܡܕܡ

¹³ ܐܢܬܬܐ ܚܣܝܪܬ ܪܥܝܢܐ ܡܫܕܠܢܝܐ ܘܠܐ ܝܕܥܐ ܒܗܬܬܐ

¹⁴ ܝܬܒܐ ܥܠ ܬܪܥܐ ܕܒܝܬܗ̇ ܥܠ ܟܘܪܣܝܐ ܪܡܐ

¹⁵ ܘܩܪܝܐ ܠܥܒܪ̈ܝ ܐܘܪܚܐ ܕܬܪ̈ܝܨܢ ܐܘܪ̈ܚܬܗܘܢ ܘܐܡܪܐ

¹⁶ ܡܢܘ ܕܫܒܪ ܢܐܬܐ ܠܘܬܝ ܘܕܚܣܝܪ ܪܥܝܢܗ ܘܐܡܪ ܠܗ

¹⁷ ܡ̈ܝܐ ܓܢܝ̈ܒܐ ܚܠܝܢ ܘܠܚܡܐ ܡܛܫܝܐ ܒܣܝܡ

¹⁸ ܘܠܐ ܝܕܥ ܕܓܢܒܪ̈ܐ ܠܘܬܗ̇ ܐܒܕܝܢ ܘܒܥܘܡܩܐ ܕܫܝܘܠ ܟܠ ܕܡܙܕܡܢܝܢ ܠܗ̇ ܐܠܐ ܫܘܪ ܘܠܐ ܬܫܬܘܚܪ ܒܐܬܪܐ ܗ̇ܘ ܘܠܐ ܬܨܕ ܒܗ ܥܝܢܟ ܗܟܢܐ ܓܝܪ ܬܥܒܪ ܡ̈ܝܐ ܢܘܟܪ̈ܝܐ ܘܢܗܪܐ ܢܘܟܪܝܐ ܬܥܒܪ ܘܬܣܛܐ ܡܢ ܡ̈ܝܐ ܢܘܟܪ̈ܝܐ ܘܡܢ ܡ̈ܝܐ ܢܘܟܪ̈ܝܐ ܠܐ ܬܫܬܐ ܡܛܠ ܕܣܘܓܐܐ ܕܝܘܡ̈ܬܐ ܘܫ̈ܢܝܐ ܕܚ̈ܝܐ ܢܬܬܘ̈ܣܦܢ ܠܟ