Levitico ܟܗ̈ܢܐ 12

¹ ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ ܘܶܐܡܰܪ ܠܶܗ.

² ܡܰܠܶܠ ܥܰܡ ܒܢܰܝ̈ ܝܺܣܪܳܐܶܝܠ. ܘܶܐܡܰܪ ܠܗܽܘܢ. ܐܰܢ̱ܬܬܳܐ ܟܰܕ ܬܶܒܛܰܢܝ ܘܬܺܐܠܰܕܝ ܕܶܟܪܳܐ. ܬܶܗܘܶܐ ܛܰܡܐܳܐ ܫܰܒܥܳܐ ܝܰܘܡܺܝ̈ܢ. ܐܰܝܟ ܝܰܘ̈ܡܳܬܳܐ ܕܟܶܦܣܳܗ̇. ܬܶܗܘܶܐ ܛܰܡܐܳܐ.

³ ܘܰܠܝܰܘܡܳܐ ܕܰܬܡܳܢܝܳܐ ܢܶܓܙܪܽܘܢ ܒܶܣܪܳܐ ܕܥܽܘܪܠܽܘܬܶܗ.

⁴ ܘܰܬܠܳܬܺܝܢ ܘܰܬܠܳܬܳܐ ܝܰܘܡܺܝ̈ܢ ܬܶܬܶܒ ܥܰܠ ܕܡܳܐ ܕܰܟܝܳܐ. ܘܰܒܟܽܠ ܩܽܘܕܫܳܐ ܠܳܐ ܬܶܬܩܰܪܰܒܝ. ܘܰܠܡܰܩܕܫܳܐ ܠܳܐ ܬܶܥܽܘܠܝ. ܥܕܰܡܳܐ ܕܢܶܡܠܽܘܢ ܝܰܘ̈ܡܰܝ ܕܰܟܝܽܘܬܳܗ̇.

⁵ ܘܶܐܢ ܢܶܩܒܬܳܐ ܬܺܐܠܰܕܝ. ܬܶܗܘܶܐ ܛܰܡܐܳܐ ܐܰܪܒܬܰܥܣܰܪ ܝܰܘܡܺܝ̈ܢ. ܐܰܝܟ ܟܶܦܣܳܗ̇. ܘܶܫܬܺܝܢ ܘܶܐܫܬܳܐ ܝܰܘܡܺܝ̈ܢ ܬܶܬܶܒ ܥܰܠ ܕܡܳܐ ܕܰܟܝܳܐ.

⁶ ܘܡܳܐ ܕܰܡܠܰܘ ܝܰܘ̈ܡܳܬܳܐ ܕܕܰܟܝܽܘܬܳܗ̇ ܕܰܒܪܳܐ ܐܰܘ ܕܒܰܪܬܳܐ. ܬܰܝܬܶܐ ܐܶܡܪܳܐ ܒܰܪ ܫܰܢ̱ܬܳܐ ܠܝܰܩܕܳܐ ܫܰܠܡܳܐ. ܘܫܽܘܦܢܺܝܢܳܐ ܐܰܘ ܒܰܪ ܝܰܘܢܳܐ ܠܰܚܛܳܗܳܐ. ܠܬܰܪܥܳܐ ܕܡܰܫܟܰܢ ܙܰܒܢܳܐ ܠܘܳܬ ܟܳܗܢܳܐ.

⁷ ܘܢܰܩܪܒܺܝܗ̇ ܩܕܳܡ ܡܳܪܝܳܐ. ܘܰܢܚܰܣܶܐ ܥܠܶܝܗ̇. ܘܬܶܬܕܰܟܶܐ ܡܶܢ ܡܰܒܽܘܥܳܐ ܕܰܕܡܳܗ̇. ܗܳܢܰܐ ܗ̱ܘ ܢܳܡܽܘܣܳܐ ܕܰܐܝܕܳܐ ܕܝܳܠܕܳܐ ܕܶܟܪܳܐ ܐܰܘ ܢܶܩܒܬܳܐ.

⁸ ܘܶܐܢ ܠܳܐ ܡܳܛܶܐ ܒܶܐܝ̈ܕܶܝܗ̇ ܕܬܰܝܬܶܐ ܐܶܡܪܳܐ. ܬܶܣܰܒ ܬܪܶܝܢ ܫܽܘܦܢܺܝ̈ܢܺܝܢ. ܐܰܘ ܬܪܶܝܢ ܒܢܰܝ̈ ܝܰܘܢܳܐ. ܚܰܕ ܠܰܚܛܳܗܳܐ. ܘܚܰܕ ܠܝܰܩܕܳܐ ܫܰܠܡܳܐ. ܘܰܢܚܰܣܶܐ ܥܠܶܝܗ̇ ܟܳܗܢܳܐ ܘܬܶܬܕܰܟܶܐ.