Esodo ܡܦܩܢܐ 36

¹ ܘܰܥܒܰܕܘ ܒܰܨܠܺܝܐܶܝܠ. ܘܶܐܠܺܝܗܰܒ. ܘܟܽܠ ܓܒܰܪ ܚܰܟܺܝܡ ܠܶܒܳܐ. ܕܝܰܗܒ ܡܳܪܝܳܐ ܚܶܟܡܬܳܐ ܘܣܽܘܟܳܠܳܐ ܒܗܽܘܢ ܠܡܶܕܰܥ ܘܰܠܡܶܥܒܰܕ ܟܽܠܶܗ ܥܒܳܕܳܐ ܕܦܽܘܠܚܳܢܳܐ ܕܩܽܘܕܫܳܐ. ܐܰܝܟ ܡܳܐ ܕܦܰܩܶܕ ܡܳܪܝܳܐ.

² ܘܰܩܪܳܐ ܡܽܘܫܶܐ ܠܒܰܨܠܺܝܐܶܝܠ ܘܠܶܐܠܺܝܗܰܒ. ܘܰܠܟܽܠ ܓܒܰܪ ܚܰܟܺܝܡ ܠܶܒܳܐ. ܕܝܰܗܒ ܡܳܪܝܳܐ ܚܶܟܡܬܳܐ ܒܠܶܒܶܗ. ܟܽܠ ܕܶܐܬܚܰܫܰܒ ܒܠܶܒܶܗ. ܠܡܶܩܪܰܒ ܠܰܥܒܳܕܳܐ ܠܡܶܥܒܕܶܗ.

³ ܘܰܢܣܰܒܘ ܡܶܢ ܩܕܳܡ ܡܽܘܫܶܐ. ܟܽܠܶܗ ܦܽܘܪܫܳܢܳܐ ܕܰܐܝܬܺܝܘ ܒܢܰܝ̈ ܝܺܣܪܳܐܶܝܠ ܠܰܥܒܳܕܳܐ ܕܡܰܫܟܰܢܙܰܒܢܳܐ ܠܡܶܥܒܕܶܗ. ܘܗܶܢܽܘܢ ܡܰܝܬܶܝܢ ܗܘܰܘ ܠܶܗ. ܬܽܘܒ ܦܽܘܪܫܳܢܳܐ ܡܶܢ ܨܦܰܪ ܠܰܨܦܰܪ.

⁴ ܘܰܐܝܬܺܝܘ ܟܽܠܗܽܘܢ ܚܰܟܺܝ̈ܡܶܐ ܕܥܳܒܕܺܝܢ ܥܒܳܕܳܐ ܕܩܽܘܕܫܳܐ. ܐ̱ܢܳܫ ܐ̱ܢܳܫ ܡܶܢ ܥܒܳܕܳܐ ܕܗܶܢܽܘܢ ܥܳܒܕܺܝܢ.

⁵ ܘܶܐܡܰܪܘ ܠܡܽܘܫܶܐ ܡܰܣܓܶܐ ܥܰܡܳܐ ܠܡܰܝܬܳܝܽܘ. ܟܰܕܽܘ ܥܒܳܕܳܐ ܠܰܥܒܺܝܕܬܳܐ ܕܦܰܩܶܕ ܡܳܪܝܳܐ ܠܡܶܥܒܰܕ.

⁶ ܘܦܰܩܶܕ ܡܽܘܫܶܐ ܘܰܩܪܰܘ ܟܳܖ̈ܽܘܙܶܐ ܒܡܰܫܪܺܝܬܳܐ. ܘܶܐܡܰܪܘ. ܓܰܒܪܳܐ. ܐܰܘ ܐܰܢ̱ܬܬܳܐ. ܠܳܐ ܢܶܥܒܕܽܘܢ ܬܽܘܒ ܥܒܳܕܳܐ ܠܦܽܘܪܫܳܢܳܐ ܕܩܽܘܕܫܳܐ. ܘܶܐܬܟܠܺܝܘ ܥܰܡܳܐ ܡܶܢ ܕܰܠܡܰܝܬܳܝܽܘ.

⁷ ܘܰܥܒܳܕܳܐ ܗܘܳܐ ܡܶܣܰܬ ܟܽܠܶܗ ܥܒܳܕܳܐ ܠܡܶܥܒܕܶܗ. ܘܰܐܘܬܰܪ.

⁸ ܘܰܥܒܰܕܘ ܟܽܠ ܚܰܟܺܝ̈ܡܰܝ ܠܶܒܳܐ. ܘܥܳܒ̈ܕܰܝ ܥܒܳܕܳܐ. ܡܰܫܟܢܳܐ ܕܰܥܣܰܪ ܝܳܖ̈ܺܝܥܳܢ ܕܒܽܘܨܳܐ ܥܙܺܝܠܳܐ. ܬܶܟܠܬܳܐ. ܘܰܐܪܓܘܳܢܳܐ. ܘܨܽܘܒܥܳܐ ܕܰܙܚܽܘܪܺܝܬܳܐ. ܟܪܽܘܒܳܐ ܥܒܳܕܳܐ ܕܽܐܘܡܳܢܳܐ. ܥܒܰܕܘ ܐܶܢܶܝܢ.

⁹ ܐܽܘܪܟܳܗ̇ ܕܝܳܪܺܝܥܬܳܐ ܚܕܳܐ. ܥܶܣܪܺܝܢ ܘܰܬܡܳܢܶܐ ܐܰܡܺܝ̈ܢ. ܘܰܦܬܳܝܳܗ̇ ܐܰܪܒܰܥ ܐܰܡܺܝ̈ܢ ܕܝܳܪܺܝܥܬܳܐ ܚܕܳܐ. ܡܫܽܘܚܬܳܐ ܚܕܳܐ ܠܟܽܠܗܶܝܢ ܝܳܖ̈ܺܝܥܳܬܳܐ.

¹⁰ ܘܕܰܒܶܩܘ ܚܰܡܶܫ ܝܳܖ̈ܺܝܥܳܢ ܐܰܟܚܕܳܐ. ܘܚܰܡܶܫ ܝܳܖ̈ܺܝܥܳܢ ܕܰܒܶܩܘ ܚܕܳܐ ܒܰܚܕܳܐ.

¹¹ ܘܰܥܒܰܕܘ ܬܐܳܢ̈ܳܬܳܐ ܕܬܶܟܠܬܳܐ. ܥܰܠ ܣܶܦܬܳܗ̇ ܕܝܳܪܺܝܥܬܳܐ ܚܕܳܐ. ܡܶܢ ܣܶܛܪܳܗ̇ ܕܕܶܒܩܳܐ. ܘܗܳܟܰܢܳܐ ܥܒܰܕܘ ܒܣܶܦܬܳܗ̇ ܕܝܳܪܺܝܥܬܳܐ ܡܶܢ ܣܶܛܪܳܐ ܕܕܶܒܩܳܐ ܐ̱ܚܪܺܢܳܐ.

¹² ܚܰܡܫܺܝܢ ܬܐܳܢ̈ܳܢ ܥܒܰܕܘ ܠܝܳܪܺܝܥܬܳܐ ܚܕܳܐ. ܘܚܰܡܫܺܝܢ ܬܐܳܢ̈ܳܢ ܥܒܰܕܘ ܒܣܶܛܪܳܗ̇ ܕܝܳܪܺܝܥܬܳܐ ܚܕܳܐ ܒܕܶܒܩܳܐ ܐ̱ܚܪܺܢܳܐ. ܘܡܰܩܒ̈ܠܰܢ ܬܐܳܢ̈ܳܬܳܐ ܚܕܳܐ ܠܽܘܩܒܰܠ ܚܕܳܐ.

¹³ ܘܰܥܒܰܕܘ ܚܰܡܫܺܝܢ ܩܽܘܖ̈ܩܣܶܐ ܕܕܰܗܒܳܐ. ܘܕܰܒܶܩܘ ܝܳܖ̈ܺܝܥܳܬܳܐ ܚܕܳܐ ܒܰܚܕܳܐ ܒܩܽܘܖ̈ܩܣܶܐ. ܘܰܗܘܳܐ ܡܰܫܟܢܳܐ ܚܰܕ.

¹⁴ ܘܰܥܒܰܕܘ ܝܳܖ̈ܺܝܥܳܬܳܐ ܕܣܰܥܪܳܐ. ܠܡܶܦܪܰܣ ܥܰܠ ܡܰܫܟܢܳܐ. ܚܕܰܥܶܣܖ̈ܶܐ ܝܳܖ̈ܺܝܥܳܢ ܥܒܰܕܘ ܐܶܢܶܝܢ.

¹⁵ ܐܽܘܪܟܳܗ̇ ܕܝܳܪܺܝܥܬܳܐ ܚܕܳܐ. ܬܠܳܬܺܝܢ ܐܰܡܺܝ̈ܢ. ܘܰܦܬܳܝܳܗ̇ ܐܰܪܒܰܥ ܐܰܡܺܝ̈ܢ. ܕܝܳܪܺܝܥܬܳܐ ܚܕܳܐ. ܡܫܽܘܚܬܳܐ ܚܕܳܐ ܠܰܚܕܰܥܶܣܖ̈ܶܐ ܝܳܖ̈ܺܝܥܳܢ.

¹⁶ ܘܕܰܒܶܩܘ ܚܰܡܶܫ ܝܳܖ̈ܺܝܥܳܢ ܐܰܟܚܕܳܐ ܘܫܶܬ ܝܳܖ̈ܺܝܥܳܢ ܐܰܟܚܕܳܐ.

¹⁷ ܘܰܥܒܰܕܘ ܬܐܳܢ̈ܳܬܳܐ. ܚܰܡܫܺܝܢ ܬܐܳܢ̈ܳܢ ܥܰܠ ܣܶܦܬܳܗ̇ ܕܝܳܪܺܝܥܬܳܐ ܡܶܢ ܣܶܛܪܳܐ ܕܕܶܒܩܳܐ. ܘܚܰܡܫܺܝܢ ܬܐܳܢ̈ܳܢ ܥܒܰܕܘ ܥܰܠ ܣܶܦܬܳܗ̇ ܕܝܳܪܺܝܥܬܳܐ ܒܕܶܒܩܳܐ ܐ̱ܚܪܺܢܳܐ.

¹⁸ ܘܰܥܒܰܕܘ ܩܽܘܖ̈ܩܣܶܐ ܕܰܢܚܳܫܳܐ ܚܰܡܫܺܝܢ. ܠܰܡܕܰܒܳܩܽܘܬܶܗ ܠܡܰܫܟܢܳܐ. ܕܢܶܗܘܶܐ ܚܰܕ.

¹⁹ ܘܰܥܒܰܕܘ ܦܪܳܣܳܐ ܠܡܰܫܟܢܳܐ. ܡܶܫܟ̈ܶܐ ܕܕܶܟܖ̈ܶܐ ܕܶܐܣܦܰܝܢܺܝܩܳܐ. ܘܰܩܪܳܡܳܐ ܕܡܶܫܟ̈ܶܐ ܕܣܳܣܓܰܘܢܳܐ ܡܶܢ ܠܥܶܠ.

²⁰ ܘܰܥܒܰܕܘ ܕܰܦ̈ܶܐ ܠܡܰܫܟܢܳܐ ܕܩܰܝܣܳܐ ܕܶܐܫܟܳܪܥܳܐ ܩܳܝ̈ܡܶܐ.

²¹ ܥܣܰܪ ܐܰܡܺܝ̈ܢ ܐܽܘܪܟܶܗ ܕܕܰܦܳܐ ܚܰܕ. ܘܰܐܡܳܐ ܘܦܶܠܓܽܘܬ ܐܰܡܳܐ ܦܬܳܝܶܗ ܕܕܰܦܳܐ ܚܰܕ.

²² ܬܰܪܬܶܝܢ ܨܳܝܖ̈ܳܢ ܠܕܰܦܳܐ ܚܰܕ. ܘܬܰܪܬܶܝܢ ܨܳܝܖ̈ܳܢ ܠܕܰܦܳܐ ܐ̱ܚܪܺܢܳܐ. ܬܖ̈ܺܝܨܳܢ ܚܕܳܐ ܠܽܘܩܒܰܠ ܚܕܳܐ. ܗܳܟܰܢܳܐ ܥܒܰܕܘ ܠܟܽܠܗܽܘܢ ܕܰܦ̈ܶܐ ܕܡܰܫܟܢܳܐ.

²³ ܘܰܥܒܰܕܘ ܕܰܦ̈ܶܐ ܠܡܰܫܟܢܳܐ. ܥܶܣܪܺܝܢ ܕܰܦܺܝ̈ܢ ܠܣܶܛܪܳܐ ܕܪܽܘܚܳܐ ܕܬܰܝܡܢܳܐ.

²⁴ ܘܰܐܪܒܥܺܝܢ ܣܳܡܟ̈ܶܐ ܕܣܺܐܡܳܐ ܥܒܰܕܘ ܬܚܶܝܬ ܥܶܣܪܺܝܢ ܕܰܦܺܝ̈ܢ. ܬܪܶܝܢ ܣܳܡܟܺܝ̈ܢ ܬܚܶܝܬ ܕܰܦܳܐ ܚܰܕ ܠܰܬܪܬܶܝܢ ܨܳܝܖ̈ܳܬܶܗ. ܘܰܬܪܶܝܢ ܣܳܡܟܺܝ̈ܢ ܬܚܶܝܬ ܕܰܦܳܐ ܚܰܕ ܠܰܬܪܬܶܝܢ ܨܳܝܖ̈ܳܬܶܗ ܥܒܰܕܘ.

²⁵ ܘܰܠܣܶܛܪܳܐ ܐ̱ܚܪܺܢܳܐ ܕܡܰܫܟܢܳܐ. ܠܣܶܛܪܳܐ ܕܪܽܘܚܳܐ ܕܓܰܪܒܝܳܐ. ܥܒܰܕܘ ܥܶܣܪܺܝܢ ܕܰܦܺܝ̈ܢ.

²⁶ ܘܰܐܪܒܥܺܝܢ ܣܳܡܟ̈ܶܐ ܕܣܺܐܡܳܐ. ܬܪܶܝܢ ܣܳܡܟܺܝ̈ܢ ܬܚܶܝܬ ܕܰܦܳܐ ܚܰܕ. ܘܰܬܪܶܝܢ ܣܳܡܟܺܝ̈ܢ ܬܚܶܝܬ ܕܰܦܳܐ ܐ̱ܚܪܺܢܳܐ.

²⁷ ܘܠܰܫܦܽܘ̈ܠܰܝ ܡܰܫܟܢܳܐ ܡܶܢ ܡܰܥܪܒܐ. ܥܒܰܕܘ ܫܬܳܐ ܕܰܦܺܝ̈ܢ.

²⁸ ܘܰܬܪܶܝܢ ܕܰܦܺܝ̈ܢ ܥܒܰܕܘ ܠܙܳܘ̈ܝܳܬܳܐ ܕܡܰܫܟܢܳܐ ܒܰܫܦܽܘ̈ܠܰܝܗܽܘܢ.

²⁹ ܘܰܗܘܰܘ ܡܰܬܶܐܡܺܝܢ ܡܶܢ ܠܬܰܚܬ. ܘܰܐܟܚܕܳܐ ܓܳܦܺܝܢ ܖ̈ܺܝܫܰܝܗܽܘܢ ܥܰܠ ܙܰܩܙ̈ܩܳܬܳܐ ܚܕܳܐ. ܗܳܟܰܢܳܐ ܥܒܰܕܘ ܠܰܬܖ̈ܰܝܗܽܘܢ ܠܬܰܪܬܶܝܢ ܙܳܘ̈ܝܳܢ.

³⁰ ܘܰܗܘܰܘ ܬܡܳܢܝܳܐ ܕܰܦܺܝ̈ܢ. ܘܣܳܡܟܰܝ̈ܗܽܘܢ ܕܣܺܐܡܳܐ ܫܬܳܬܰܪܣܰܪ. ܬܪܶܝܢ ܣܳܡܟܺܝܢ ܬܚܶܝܬ ܕܰܦܳܐ ܚܰܕ. ܘܰܬܪܶܝܢ ܣܳܡܟܺܝ̈ܢ ܬܚܶܝܬ ܕܰܦܳܐ ܐ̱ܚܪܺܢܳܐ.

³¹ ܘܰܥܒܰܕܘ ܡܽܘ̈ܟܠܶܐ ܕܩܰܝܣܳܐ ܕܶܐܫܟܳܪܥܳܐ. ܚܰܡܫܳܐ ܠܕܰܦܰܝ̈ ܣܶܛܪܶܗ ܚܰܕ ܕܡܰܫܟܢܳܐ.

³² ܘܚܰܡܫܳܐ ܡܽܘܟ̈ܠܺܝܢ ܠܕܰܦܰܝ̈ ܣܶܛܪܶܗ ܐ̱ܚܪܺܢܳܐ ܕܡܰܫܟܢܳܐ. ܘܚܰܡܫܳܐ ܡܽܘܟ̈ܠܺܝܢ ܠܕܰܦܰܘ̈ܗܝ ܕܡܰܫܟܢܳܐ ܠܰܫܦܽܘ̈ܠܰܝܗܽܘܢ ܡܶܢ ܡܰܥܪܒܐ.

³³ ܘܰܥܒܰܕܘ ܡܽܘܟܠܳܐ ܡܶܨܥܳܝܳܐ ܠܡܰܥܒܳܪܽܘ ܒܓܰܘ ܕܰܦ̈ܶܐ. ܡܶܢ ܗܳܢܳܐ ܣܶܛܪܳܐ ܠܗܳܢܳܐ.

³⁴ ܘܕܰܦ̈ܶܐ ܩܪܰܡܘ ܕܰܗܒܳܐ. ܘܙܰܩܙ̈ܩܳܬܗܽܘܢ ܥܒܰܕܘ ܕܰܗܒܳܐ ܐܰܬܪܳܐ ܠܡܽܘ̈ܟܠܶܐ. ܘܰܩܪܰܡܘ ܐܶܢܽܘܢ ܠܡܽܘܟ̈ܠܶܐ ܕܰܗܒܳܐ.

³⁵ ܘܰܥܒܰܕܘ ܦܪܳܣܳܐ ܕܬܶܟܠܬܳܐ. ܘܰܐܪܓܘܳܢܳܐ. ܘܨܽܘܒܥܳܐ ܕܰܙܚܽܘܪܺܝܬܳܐ. ܘܒܽܘܨܳܐ ܥܙܺܝܠܳܐ. ܥܒܳܕܳܐ ܕܽܐܘܡܳܢܳܐ. ܥܰܒܕܶܗ ܟܪܽܘܒܳܐ.

³⁶ ܘܰܥܒܰܕܘ ܠܶܗ ܐܰܪܒܥܳܐ ܥܰܡܽܘܕ̈ܶܐ ܕܶܐܫܟܳܪܥܳܐ. ܘܰܩܪܰܡܘ ܐܶܢܽܘܢ ܕܰܗܒܳܐ. ܘܰܠܩܽܘܒܥܰܝ̈ܗܽܘܢ ܕܰܗܒܳܐ. ܘܰܥܒܰܕܘ ܠܗܽܘܢ ܐܰܪܒܥܳܐ ܣܳܡܟܺܝ̈ܢ ܕܣܺܐܡܳܐ.

³⁷ ܘܰܥܒܰܕܘ ܦܪܳܣܳܐ ܠܬܰܪܥܳܐ ܕܡܰܫܟܢܳܐ. ܬܶܟܠܬܳܐ. ܘܰܐܪܓܘܳܢܳܐ. ܘܨܽܘܒܥܳܐ ܕܰܙܚܽܘܪܺܝܬܳܐ. ܘܒܽܘܨܳܐ ܥܙܺܝܠܳܐ. ܥܒܳܕܳܐ ܕܨܽܘܪܬܳܐ.

³⁸ ܥܰܡܽܘܕܰܘ̈ܗܝ ܚܰܡܫܳܐ. ܘܩܽܘܒܥܰܝ̈ܗܽܘܢ ܚܰܡܫܳܐ. ܘܰܩܖ̈ܳܡܶܐ ܕܖ̈ܺܝܫܰܝܗܽܘܢ. ܘܰܩܪܳܡܗܽܘܢ ܕܕܰܗܒܳܐ. ܘܣܳܡܟܰܝ̈ܗܽܘܢ ܚܰܡܫܳܐ ܕܰܢܚܳܫܳܐ.