Esodo ܡܦܩܢܐ 34

¹ ܘܶܐܡܰܪ ܡܳܪܝܳܐ ܠܡܽܘܫܶܐ. ܦܣܽܘܠ ܠܳܟ ܬܰܪܬܶܝܢ ܠܽܘܚ̈ܶܐ ܕܟܺܐܦܳܐ ܐܰܝܟ ܩܰܕܡܳܝ̈ܳܬܳܐ. ܘܶܐܟܬܽܘܒ ܥܰܠ ܠܽܘܚ̈ܶܐ ܦܶܬܓ̈ܳܡܶܐ ܕܺܐܝܬ ܗܘܰܘ ܥܰܠ ܠܽܘܚ̈ܶܐ ܩܰܕܡܳܝ̈ܳܬܳܐ ܕܬܰܒܰܪܬ.

² ܘܰܗܘܺܝ ܡܛܰܝܰܒ ܒܨܰܦܪܳܐ. ܘܣܰܩ ܒܨܰܦܪܳܐ ܠܛܽܘܪܳܐ ܕܣܺܝܢܰܝ. ܘܩܽܘܡ ܬܰܡܳܢ ܒܪܺܝܫ ܛܽܘܪܳܐ.

³ ܘܐ̱ܢܳܫ ܠܳܐ ܢܶܣܰܩ ܥܰܡܳܟ. ܘܐ̱ܢܳܫ ܠܳܐ ܢܶܬܚܙܶܐ ܒܟܽܠܶܗ ܛܽܘܪܳܐ. ܐܳܦܠܳܐ ܥܳܢ̈ܳܐ ܘܬܰܘܖ̈ܶܐ ܢܶܪܥܽܘܢ ܠܩܽܘܒܠܶܗ ܕܛܽܘܪܳܐ ܗܰܘ.

⁴ ܘܰܦܣܰܠ ܬܰܪܬܶܝܢ ܠܽܘܚ̈ܶܐ ܕܟܺܐܦܳܐ ܐܰܝܟ ܩܰܕܡܳܝ̈ܳܬܳܐ. ܘܩܰܕܶܡ ܡܽܘܫܶܐ ܒܨܰܦܪܳܐ. ܘܰܣܠܶܩ ܠܛܽܘܪܳܐ ܕܣܺܝܢܰܝ ܐܰܝܟܰܢܳܐ ܕܦܰܩܕܶܗ ܡܳܪܝܳܐ. ܘܰܢܣܰܒ ܬܰܪܬܶܝܢ ܠܽܘܚ̈ܶܐ ܕܟܺܐܦܳܐ ܒܺܐܝܕܶܗ.

⁵ ܘܰܢܚܶܬ ܡܳܪܝܳܐ ܒܰܥܢܳܢܳܐ. ܘܩܳܡ ܥܰܡܶܗ ܬܰܡܳܢ. ܘܰܩܪܳܐ ܒܰܫܡܳܐ ܡܳܪܝܳܐ.

⁶ ܘܰܥܒܰܪ ܡܳܪܝܳܐ ܩܕܳܡܰܘܗܝ. ܘܰܩܪܳܐ ܡܳܪܝܳܐ ܡܳܪܝܳܐ. ܐܰ‌ܠܳܗܳܐ ܡܪܰܚܡܳܢܳܐ ܘܰܡܪܰܚܦܳܢܳܐ. ܕܢܰܓܺܝܪܳܐ ܪܽܘܚܶܗ. ܘܣܰܓܺܝܐܳܐ ܛܰܝܒܽܘܬܶܗ ܘܩܽܘܫܬܶܗ.

⁷ ܢܳܛܰܪ ܛܰܝܒܽܘܬܳܐ ܠܰܐܠܦܰܝ̈ ܕܳܖ̈ܶܐ. ܫܳܒܶܩ ܚܛܳܗ̈ܶܐ ܘܚܰܘܒ̈ܶܐ. ܘܰܡܙܰܟܳܝܽܘ ܠܳܐ ܡܙܰܟܶܐ. ܦܳܩܶܕ ܚܰܘ̈ܒܶܐ ܕܰܐܒܳܗ̈ܶܐ ܥܰܠ ܒܢܰܝ̈ܳܐ. ܘܥܰܠ ܒܢܰܝ̈ ܒܢܰܝ̈ܳܐ. ܥܰܠ ܬܠܳܬܳܐ ܘܥܰܠ ܐܰܪܒܥܳܐ ܕܳܖ̈ܺܝܢ.

⁸ ܘܶܐܣܬܰܪܗܰܒ ܡܽܘܫܶܐ. ܘܰܢܦܰܠ ܥܰܠ ܐܰܪܥܳܐ ܘܰܣܓܶܕ.

⁹ ܘܶܐܡܰܪ. ܐܶܢ ܐܶܫܟܚܶܬ ܖ̈ܰܚܡܶܐ ܒܥܰܝܢܰܝ̈ܟ ܡܳܪܝ. ܢܺܐܙܰܠ ܗܳܫܳܐ ܡܳܪܝ ܒܰܝܢܳܬܰܢ. ܡܶܛܽܠ ܕܥܰܡܳܐ ܐܶܢܽܘܢ ܩܫܶܐ ܩܕܳܠܳܐ. ܘܰܫܒܽܘܩ ܠܚܰܘ̈ܒܰܝܢ ܘܠܰܚ̈ܛܳܗܰܝܢ ܘܬܺܐܪܬܰܢ.

¹⁰ ܘܶܐܡܰܪ. ܗܳܐ ܡܩܺܝܡ ܐ̱ܢܳܐ ܩܝܳܡܳܐ ܠܽܘܩܒܰܠ ܟܽܠܶܗ ܥܰܡܳܟ. ܘܶܐܥܒܶܕ ܦܖ̈ܺܝܫܳܬܳܐ. ܕܠܳܐ ܐܶܬܥ̈ܒܶܕܝ ܐܰܟܘܳܬܗܶܝܢ ܒܟܽܠܳܗ̇ ܐܰܪܥܳܐ. ܘܰܒܟܽܠܗܽܘܢ ܥܰܡ̈ܡܶܐ. ܘܢܶܚܙܶܐ ܟܽܠܶܗ ܥܰܡܳܐ ܗܳܢܳܐ ܕܰܐܢ̱ܬ ܒܓܰܘܶܗ ܥܒܳܕܶܗ ܕܡܳܪܝܳܐ ܕܰܕܚܺܝܠ ܗ̱ܘ ܕܥܳܒܶܕ ܐ̱ܢܳܐ ܥܰܡܳܟ.

¹¹ ܛܰܪ ܡܶܕܶܡ ܕܰܡܦܰܩܶܕ ܐ̱ܢܳܐ ܠܳܟ ܝܰܘܡܳܢܳܐ. ܗܳܐ ܚܳܪܶܒ ܐ̱ܢܳܐ ܡܶܢ ܩܕܳܡܰܝܟ. ܟܢܰܥܢܳܝ̈ܶܐ. ܘܳܐܡܽܘܖ̈ܳܝܶܐ. ܘܚܺܝܬܳܝ̈ܶܐ ܘܦܰܖ̈ܙܳܝܶܐ. ܘܚܰܘܳܝ̈ܶܐ ܘܝܳܒܽܘܣܳܝ̈ܶܐ.

¹² ܐܶܙܕܰܗܪ ܠܳܐ ܬܩܺܝܡ ܩܝܳܡܳܐ ܠܝܳܬܒܰܝ̈ ܐܰܪܥܳܐ ܕܳܐܙܶܠ ܐܰܢ̱ܬ ܠܘܳܬܗܽܘܢ. ܕܠܳܐ ܢܶܗܘܽܘܢ ܠܳܟ ܠܬܽܘܩܰܠܬܳܐ.

¹³ ܡܰܕܒܚܰܝ̈ܗܽܘܢ ܥܰܩܰܪ. ܘܩܳܝ̈ܡܳܬܗܽܘܢ ܬܰܒܰܪ. ܘܕܶܚ̈ܠܳܬܗܽܘܢ ܦܰܣܶܩܘ.

¹⁴ ܠܳܐ ܬܶܣܓܽܘܕ ܠܰܐܠܳܗ ܐ̱ܚܪܺܝܢ. ܡܶܛܽܠ ܕܡܳܪܝܳܐ ܛܰܢܳܢܳܐ ܫܡܶܗ. ܐܰܠܳܗܰܐ ܗ̱ܘ ܛܰܢܳܢܳܐ.

¹⁵ ܠܳܐ ܬܩܺܝܡ ܩܝܳܡܳܐ ܥܰܡ ܝܳܬܒܰܝ̈ ܐܰܪܥܳܐ. ܕܠܳܐ ܢܶܛܥܽܘܢ ܒܳܬܰܪ ܕܶܚ̈ܠܳܬܗܽܘܢ. ܘܰܢܕܰܒܚܽܘܢ ܠܰܐܠܳܗܰܝ̈ܗܽܘܢ. ܘܢܶܩܪܽܘܢܳܟ ܘܬܶܐܟܽܘܠ ܡܶܢ ܕܶܒܚܰܝ̈ܗܽܘܢ.

¹⁶ ܘܬܶܣܰܒ ܡܶܢ ܒܢ̈ܳܬܗܽܘܢ ܠܰܒܢܰܝ̈ܟ. ܘܰܒܢ̈ܳܬܳܟ ܬܶܬܶܠ ܠܰܒܢܰܝ̈ܗܽܘܢ. ܘܢܶܛܥ̈ܝܳܢ ܒܢ̈ܳܬܟܽܘܢ ܒܳܬܰܪ ܐܰܠܳܗܰܝ̈ܗܽܘܢ. ܘܢܰܛܥ̈ܝܳܢ ܠܰܒܢܰܝ̈ܟ ܒܳܬܰܪ ܐܰܠܳܗܰܝ̈ܗܶܝܢ.

¹⁷ ܐܰܠܳܗ̈ܶܐ ܕܢܶܣܟܬܳܐ ܠܳܐ ܬܶܥܒܶܕ ܠܳܟ.

¹⁸ ܥܰܕܥܺܐܕܳܐ ܕܦܰܛܺܝܖ̈ܶܐ ܬܶܛܰܪ. ܫܰܒܥܳܐ ܝܰܘܡܺܝ̈ܢ ܬܶܐܟܽܘܠ ܦܰܛܺܝܪܳܐ ܐܰܝܟ ܕܦܰܩܶܕܬܳܟ. ܒܙܰܒܢܳܐ ܕܝܰܪܚܳܐ ܕܗܰܒܳܒ̈ܶܐ. ܡܶܛܽܠ ܕܰܒܝܰܪܚܳܐ ܕܗܰܒܳܒ̈ܶܐ ܢܦܰܩܬ ܡܶܢ ܡܶܨܪܶܝܢ.

¹⁹ ܟܽܠ ܕܦܳܬܰܚ ܖ̈ܰܚܡܶܐ ܠܺܝ ܢܶܗܘܶܐ. ܘܟܽܠ ܒܽܘܟܪܳܐ ܕܰܒܥܺܝܪܳܟ. ܕܬܰܘܖ̈ܶܐ ܘܕܶܐܡܖ̈ܶܐ.

²⁰ ܘܟܽܠ ܒܽܘܟܪܳܐ ܕܰܒܥܺܝܪܳܐ ܬܶܦܪܽܘܩ ܒܶܐܡܪܳܐ. ܘܶܐܢ ܠܳܐ ܬܶܦܪܩܺܝܘܗܝ ܬܶܩܛܠܺܝܘܗܝ. ܟܽܠ ܒܽܘܟܪܳܐ ܕܰܒܢܰܝ̈ܟ ܬܶܦܪܽܘܩ. ܘܠܳܐ ܬܶܬܚܙܽܘܢ ܩܕܳܡܰܝ ܣܪܺܝܩܳܐܺܝܬ.

²¹ ܫܬܳܐ ܝܰܘܡܺܝ̈ܢ ܬܶܦܠܽܘܚ. ܘܰܒܝܰܘܡܳܐ ܫܒܺܝܥܳܝܳܐ ܬܶܬܢܺܝܚ. ܒܙܰܪܥܳܐ ܘܒܰܚܨܳܕܳܐ ܬܶܬܢܺܝܚ.

²² ܘܥܰܕܥܺܐܕܳܐ ܕܫܳܒܽܘܥܳܐ ܬܶܥܒܶܕ ܠܳܟ. ܪܺܝܫ ܚܨܳܕܳܐ ܕܚܶܛ̈ܶܐ. ܘܚܰܓܳܐ ܕܰܚܡܳܠܳܐ ܒܡܰܦܩܳܗ̇ ܕܫܰܢ̱ܬܳܐ.

²³ ܬܠܳܬ ܙܰܒܢܺܝ̈ܢ ܒܫܰܢ̱ܬܳܐ ܢܶܬܚܙܶܐ ܟܽܠ ܕܽܘܟܪܳܢܳܟ ܩܕܳܡ ܡܳܪܝܳܐ ܐܰ‌ܠܳܗܳܐ ܕܺܝܣܪܳܐܶܝܠ.

²⁴ ܡܶܛܽܠ ܕܶܐܚܪܽܘܒ ܥܰܡ̈ܡܶܐ ܡܶܢ ܩܕܳܡܰܝܟ. ܘܰܐܦܬܶܐ ܬܚܽܘܡܳܟ. ܘܠܳܐ ܢܶܪܰܓ ܐ̱ܢܳܫ ܐܰܪܥܳܟ. ܡܳܐ ܕܣܳܠܶܩ ܐܰܢ̱ܬ ܠܡܶܬܚܙܳܝܽܘ ܩܕܳܡ ܡܳܪܝܳܐ ܐܰܠܳܗܳܟ ܬܠܳܬ ܙܰܒܢܺܝ̈ܢ ܒܫܰܢ̱ܬܳܐ.

²⁵ ܠܳܐ ܬܶܟܽܘܣ ܥܰܠ ܚܰܡܺܝܥܳܐ ܕܡܳܐ ܕܕܶܒܚܬܳܐ. ܘܠܳܐ ܢܒܽܘܬ ܠܨܰܦܪܳܐ ܕܶܒܚܳܐ ܕܥܰܕܥܺܐܕܳܐ ܕܦܶܨܚܳܐ.

²⁶ ܪܺܝܫ ܥܰܠ̈ܠܳܬܳܗ̇ ܕܰܐܪܥܳܟ ܬܰܝܬܶܐ ܠܒܰܝܬܶܗ ܕܡܳܪܝܳܐ ܐܰܠܳܗܳܟ ܠܳܐ ܬܒܰܫܶܠ ܓܰܕܝܳܐ ܒܚܰܠܒܳܐ ܕܶܐܡܶܗ.

²⁷ ܘܶܐܡܰܪ ܡܳܪܝܳܐ ܠܡܽܘܫܶܐ. ܟܬܽܘܒ ܠܳܟ ܗܳܠܶܝܢ ܦܶܬܓ̈ܳܡܶܐ. ܕܡܶܛܽܠ ܗܳܠܶܝܢ ܦܶܬܓ̈ܳܡܶܐ ܐܰܩܺܝܡܬ ܥܰܡܳܟ ܩܝܳܡܳܐ. ܘܥܰܡ ܟܽܠܶܗ ܝܺܣܪܳܐܶܝܠ.

²⁸ ܘܰܗܘܳܐ ܬܰܡܳܢ ܥܰܡ ܡܳܪܝܳܐ ܐܰܪܒܥܺܝܢ ܐܺܝܡܳܡܺܝ̈ܢ ܘܰܐܪܒܥܺܝܢ ܠܰܝ̈ܠܰܘܳܢ. ܠܰܚܡܳܐ ܠܳܐ ܐܶܟܰܠ ܘܡܰܝ̈ܳܐ ܠܳܐ ܐܶܫܬܺܝ. ܘܰܟܬܰܒ ܥܰܠ ܠܽܘܚ̈ܶܐ ܕܟܺܐܦܳܐ ܡܶܠܰܝ̈ ܩܝܳܡܳܐ. ܥܶܣܪܳܐ ܦܶܬܓܳܡܺܝ̈ܢ.

²⁹ ܘܟܰܕ ܢܚܶܬ ܡܽܘܫܶܐ ܡܶܢ ܛܽܘܪܳܐ ܕܣܺܝܢܰܝ. ܬܰܪܬܶܝܢ ܠܽܘܚ̈ܶܐ ܕܣܳܗܕܽܘܬܳܐ ܒܺܐܝܕܶܗ ܕܡܽܘܫܶܐ. ܟܰܕ ܢܚܶܬ ܡܶܢ ܛܽܘܪܳܐ. ܘܡܽܘܫܶܐ ܠܳܐ ܝܺܕܰܥ ܕܶܐܙܕܰܗܺܝ ܡܶܫܟܳܐ ܕܰܐܦܰܘ̈ܗܝ ܟܰܕ ܡܰܠܶܠ ܥܰܡܶܗ.

³⁰ ܘܰܚܙܳܐ ܐܰܗܪܽܘܢ ܘܟܽܠܶܗ ܝܺܣܪܳܐܶܝܠ ܐܰܦܰܘ̈ܗܝ ܕܡܽܘܫܶܐ. ܕܶܐܙܕܰܗܺܝ ܡܶܫܟܳܐ ܕܰܐܦܰܘ̈ܗܝ ܕܡܽܘܫܶܐ. ܘܰܕܚܶܠܘ ܠܡܶܩܪܰܒ ܠܘܳܬܶܗ.

³¹ ܘܰܩܪܳܐ ܐܶܢܽܘܢ ܡܽܘܫܶܐ. ܘܶܐܬܰܘ ܠܘܳܬܶܗ ܐܰܗܪܽܘܢ ܘܟܽܠܗܽܘܢ ܪܰܘܖ̈ܒܳܢܶܐ ܕܰܟܢܽܘܫܬܳܐ. ܘܡܰܠܶܠ ܡܽܘܫܶܐ ܥܰܡܗܽܘܢ.

³² ܘܗܳܝܕܶܝܢ ܩܪܶܒܘ ܠܘܳܬܶܗ ܟܽܠܗܽܘܢ ܒܢܰܝ̈ ܝܺܣܪܳܐܶܝܠ. ܘܦܰܩܶܕ ܐܶܢܽܘܢ ܟܽܠܡܶܕܶܡ ܕܡܰܠܶܠ ܡܳܪܝܳܐ ܥܰܡܶܗ ܒܛܽܘܪܳܐ ܕܣܺܝܢܰܝ.

³³ ܘܟܰܕ ܫܰܠܶܡ ܡܽܘܫܶܐ ܕܰܢܡܰܠܶܠ ܥܰܡܗܽܘܢ. ܐܰܪܡܺܝ ܥܰܠ ܐܰܦܰܘ̈ܗܝ ܫܽܘܫܶܦܳܐ.

³⁴ ܘܟܰܕ ܥܳܐܶܠ ܗܘܳܐ ܡܽܘܫܶܐ ܩܕܳܡ ܡܳܪܝܳܐ ܕܰܢܡܰܠܶܠ ܥܰܡܶܗ. ܫܳܩܶܠ ܗܘܳܐ ܠܳܗ̇ ܠܫܽܘܫܶܦܳܐ ܥܕܰܡܳܐ ܕܢܳܦܶܩ. ܘܢܳܦܶܩ ܗܘܳܐ ܘܳܐܡܰܪ ܠܰܕܒܶܝܬ ܝܺܣܪܳܐܶܝܠ ܡܶܕܶܡ ܕܡܶܬܦܰܩܰܕ.

³⁵ ܘܚܳܙܶܝܢ ܗܘܰܘ ܒܢܰܝ̈ ܝܺܣܪܳܐܶܝܠ ܐܰܦܰܘ̈ܗܝ ܕܡܽܘܫܶܐ. ܕܶܐܙܕܰܗܺܝ ܡܶܫܟܳܐ ܕܰܐܦܰܘ̈ܗܝ ܕܡܽܘܫܶܐ. ܫܳܩܶܠ ܗܘܳܐ ܡܽܘܫܐ ܠܫܽܘܫܶܦܳܐ ܡܶܢ ܐܰܦܰܘ̈ܗܝ. ܡܳܐ ܕܥܳܐܶܠ ܗܘܳܐ ܕܰܢܡܰܠܶܠ ܥܰܡܶܗ.