Canticum Canticorum 2

VULGATA	NOVA VULGATA
1 Ego flos campi, et lilium convallium.	1 Ego flos campi et lilium convallium.
2 (Sponsus)Sicut lilium inter spinas, sic amica mea inter filias.	2 Sicut lilium inter spinas, sic amica mea inter filias.
3 (Sponsa)Sicut malus inter ligna silvarum, sic dilectus meus inter filios. Sub umbra illius quem desideraveram sedi, et fructus ejus dulcis gutturi meo.	3 Sicut malus inter ligna silvarum, sic dilectus meus inter filios. Sub umbra illius, quem desideraveram, sedi, et fructus eius dulcis gutturi meo.
4 Introduxit me in cellam vinariam ; ordinavit in me caritatem.	4 Introduxit me in cellam vinariam, et vexillum eius super me est caritas.
5 Fulcite me floribus, stipate me malis, quia amore langueo.	5 Fulcite me uvarum placentis, stipate me malis, quia amore langueo.
6 Læva ejus sub capite meo, et dextera illius amplexabitur me.	6 Laeva eius sub capite meo, et dextera illius amplexatur me.
7 (Sponsus)Adjuro vos, filiæ Jerusalem, per capreas cervosque camporum, ne suscitetis, neque evigilare faciatis dilectam, quoadusque ipsa velit.	7 Adiuro vos, filiae Ierusalem, per capreas cervasque camporum, ne suscitetis neque evigilare faciatis dilectam, quoadusque ipsa velit.
8 (Sponsa)Vox dilecti mei ; ecce iste venit, saliens in montibus, transiliens colles.	8 Vox dilecti mei! Ecce iste venit saliens in montibus, transiliens colles.
9 Similis est dilectus meus capreæ, hinnuloque cervorum. En ipse stat post parietem nostrum, respiciens per fenestras, prospiciens per cancellos.	9 Similis est dilectus meus capreae hinnuloque cervorum. En ipse stat post parietem nostrum respiciens per fenestras, prospiciens per cancellos.
10 En dilectus meus loquitur mihi. (Sponsus)Surge, propera, amica mea, columba mea, formosa mea, et veni :	10 En dilectus meus loquitur mihi: “ Surge, amica mea, columba mea, formosa mea, et veni.
11 jam enim hiems transiit ; imber abiit, et recessit.	11 Iam enim hiems transiit, imber abiit et recessit.
12 Flores apparuerunt in terra nostra ; tempus putationis advenit : vox turturis audita est in terra nostra ;	12 Flores apparuerunt in terra, tempus putationis advenit; vox turturis audita est in terra nostra,
13 ficus protulit grossos suos ; vineæ florentes dederunt odorem suum. Surge, amica mea, speciosa mea, et veni :	13 ficus protulit grossos suos, vineae florentes dederunt odorem suum; surge, amica mea, speciosa mea, et veni,
14 columba mea, in foraminibus petræ, in caverna maceriæ, ostende mihi faciem tuam, sonet vox tua in auribus meis : vox enim tua dulcis, et facies tua decora.	14 columba mea, in foraminibus petrae, in caverna abrupta. Ostende mihi faciem tuam, sonet vox tua in auribus meis; vox enim tua dulcis, et facies tua decora ”.
15 (Sponsa)Capite nobis vulpes parvulas quæ demoliuntur vineas : nam vinea nostra floruit.	15 Capite nobis vulpes, vulpes parvulas, quae demoliuntur vineas, nam vineae nostrae florescunt.
16 Dilectus meus mihi, et ego illi, qui pascitur inter lilia,	16 Dilectus meus mihi, et ego illi, qui pascitur inter lilia,
17 donec aspiret dies, et inclinentur umbræ. Revertere ; similis esto, dilecte mi, capreæ, hinnuloque cervorum super montes Bether.	17 antequam aspiret dies, et festinent umbrae. Revertere; similis esto, dilecte mi, capreae hinnuloque cervorum super montes Bether.