Exodus 30

Torna indietro

Bibbia Vulgata Clementina	Nova Vulgata
¹ Facies quoque altare ad adolendum thymiama, de lignis setim,	¹ Facies quoque altare ad adolendum thymiama de lignis acaciae
² habens cubitum longitudinis, et alterum latitudinis, id est, quadrangulum, et duos cubitos in altitudine. Cornua ex ipso procedent.	² habens cubitum longitudinis et alterum latitudinis, id est quadrangulum, et duos cubitos in altitudine; cornua ex ipso procedent.
³ Vestiesque illud auro purissimo, tam craticulam ejus, quam parietes per circuitum, et cornua. Faciesque ei coronam aureolam per gyrum,	³ Vestiesque illud auro purissimo, tam craticulam eius quam parietes per circuitum et cornua. Faciesque ei coronam aureolam per gyrum
⁴ et duos annulos aureos sub corona per singula latera, ut mittantur in eos vectes, et altare portetur.	⁴ et duos anulos aureos sub corona in duobus lateribus, ut mittantur in eos vectes, et altare portetur.
⁵ Ipsos quoque vectes facies de lignis setim, et inaurabis.	⁵ Ipsos quoque vectes facies de lignis acaciae et inaurabis.
⁶ Ponesque altare contra velum, quod ante arcum pendet testimonii coram propitiatorio quo tegitur testimonium, ubi loquar tibi.	⁶ Ponesque altare contra velum, quod ante arcam pendet testimonii, coram propitiatorio, quo tegitur testimonium, ubi conveniam ad te.
⁷ Et adolebit incensum super eo Aaron, suave fragrans, mane. Quando componet lucernas, incendet illud :	⁷ Et adolebit incensum super eo Aaron suave fragrans mane. Quando componet lucernas, incendet illud;
⁸ et quando collocabit eas ad vesperum, uret thymiama sempiternum coram Domino in generationes vestras.	⁸ et quando collocabit eas ad vesperum, uret thymiama sempiternum coram Domino in generationes vestras.
⁹ Non offeretis super eo thymiama compositionis alterius, nec oblationem, et victimam, nec libabitis libamina.	⁹ Non offeretis super eo thymiama compositionis alterius nec holocaustum nec oblationem, nec libabitis libamina.
¹⁰ Et deprecabitur Aaron super cornua ejus semel per annum, in sanguine quod oblatum est pro peccato, et placabit super eo in generationibus vestris. Sanctum sanctorum erit Domino.	¹⁰ Et expiabit Aaron super cornua eius semel per annum in sanguine sacrificii pro peccato; et placabit super eo in generationibus vestris: sanctum sanctorum erit Domino ”.
¹¹ Locutusque est Dominus ad Moysen, dicens :	¹¹ Locutusque est Dominus ad Moysen dicens:
¹² Quando tuleris summam filiorum Israël juxta numerum, dabunt singuli pretium pro animabus suis Domino, et non erit plaga in eis, cum fuerint recensiti.	¹² “ Quando tuleris summam filiorum Israel iuxta numerum, dabunt singuli pretium expiationis pro animabus suis Domino; et non erit plaga in eis, cum fuerint recensiti.
¹³ Hoc autem dabit omnis qui transit ad nomen, dimidium sicli juxta mensuram templi (siclus viginti obolos habet) ; media pars sicli offeretur Domino.	¹³ Hoc autem dabit omnis, qui transit ad censum, dimidium sicli iuxta mensuram sanctuarii siclus viginti obolos habet ; media pars sicli offeretur Domino.
¹⁴ Qui habetur in numero, a viginti annis et supra, dabit pretium.	¹⁴ Qui habetur in numero a viginti annis et supra, dabit pretium;
¹⁵ Dives non addet ad medium sicli, et pauper nihil minuet.	¹⁵ dives non addet ad medium sicli, et pauper nihil minuet, quando dabitis oblationem Domino in expiationem animarum vestrarum.
¹⁶ Susceptamque pecuniam, quæ collata est a filiis Israël, trades in usus tabernaculi testimonii, ut sit monimentum eorum coram Domino, et propitietur animabus eorum.	¹⁶ Susceptamque expiationis pecuniam, quae collata est a filiis Israel, trades in usus tabernaculi conventus, ut sit monumentum eorum coram Domino et propitietur animabus illorum ”.
¹⁷ Locutusque est Dominus ad Moysen, dicens :	¹⁷ Locutusque est Dominus ad Moysen dicens:
¹⁸ Facies et labrum æneum cum basi sua ad lavandum : ponesque illud inter tabernaculum testimonii et altare. Et missa aqua,	¹⁸ “ Facies et labrum aeneum cum basi aenea ad lavandum; ponesque illud inter tabernaculum conventus et altare. Et, missa aqua,
¹⁹ lavabunt in ea Aaron et filii ejus manus suas ac pedes,	¹⁹ lavabunt in eo Aaron et filii eius manus suas ac pedes.
²⁰ quando ingressuri sunt tabernaculum testimonii, et quando accessuri sunt ad altare, ut offerant in eo thymiama Domino,	²⁰ Quando ingressuri sunt tabernaculum conventus, lavabunt se aqua, ne moriantur; vel quando accessuri sunt ad altare, ut ministrent, ut adoleant victimam Domino.
²¹ ne forte moriantur ; legitimum sempiternum erit ipsi, et semini ejus per successiones.	²¹ Et lavabunt manus et pedes, ne moriantur: legitimum sempiternum erit, ipsi et semini eius per successiones ”.
²² Locutusque est Dominus ad Moysen,	²² Locutusque est Dominus ad Moysen
²³ dicens : Sume tibi aromata, primæ myrrhæ et electæ quingentos siclos, et cinnamomi medium, id est, ducentos quinquaginta siclos, calami similiter ducentos quinquaginta,	²³ dicens: “ Sume tibi aromata prima myrrhae electae quingentos siclos et cinnamomi boni odoris medium, id est ducentos quinquaginta siclos, calami suave olentis similiter ducentos quinquaginta,
²⁴ casiæ autem quingentos siclos, in pondere sanctuarii, olei de olivetis mensuram hin :	²⁴ casiae autem quingentos siclos, in pondere sanctuarii, olei de olivetis mensuram hin.
²⁵ faciesque unctionis oleum sanctum, unguentum compositum opere unguentarii,	²⁵ Faciesque unctionis oleum sanctum, unguentum compositum opere unguentarii; unctionis oleum sanctum erit.
²⁶ et unges ex eo tabernaculum testimonii, et arcam testamenti,	²⁶ Et unges ex eo tabernaculum conventus et arcam testamenti
²⁷ mensamque cum vasis suis, et candelabrum, et utensilia ejus, altaria thymiamatis,	²⁷ mensamque cum vasis suis, candelabrum et utensilia eius, altaria thymiamatis
²⁸ et holocausti, et universam supellectilem quæ ad cultum eorum pertinet.	²⁸ et holocausti et universam supellectilem, quae ad cultum eorum pertinet, et labrum cum basi sua.
²⁹ Sanctificabisque omnia, et erunt Sancta sanctorum ; qui tetigerit ea, sanctificabitur.	²⁹ Sanctificabisque omnia, et erunt sancta sanctorum: qui tetigerit ea, sanctificabitur.
³⁰ Aaron et filios ejus unges, sanctificabisque eos, ut sacerdotio fungantur mihi.	³⁰ Aaron et filios eius unges sanctificabisque eos, ut sacerdotio fungantur mihi.
³¹ Filiis quoque Israël dices : Hoc oleum unctionis sanctum erit mihi in generationes vestras.	³¹ Filiis quoque Israel dices: Hoc oleum unctionis sanctum erit mihi in generationes vestras.
³² Caro hominis non ungetur ex eo, et juxta compositionem ejus non facietis aliud, quia sanctificatum est, et sanctum erit vobis.	³² Caro hominis non ungetur ex eo, et iuxta compositionem eius non facietis aliud, quia sanctum est et sanctum erit vobis.
³³ Homo quicumque tale composuerit, et dederit ex eo alieno, exterminabitur de populo suo.	³³ Homo quicumque tale composuerit et dederit ex eo super alienum, exterminabitur de populo suo ”.
³⁴ Dixitque Dominus ad Moysen : Sume tibi aromata, stacten et onycha, galbanum boni odoris, et thus lucidissimum ; æqualis ponderis erunt omnia :	³⁴ Dixitque Dominus ad Moysen: “ Sume tibi aromata, stacten et onycha, galbanum boni odoris et tus lucidissimum; aequalis ponderis erunt omnia.
³⁵ faciesque thymiama compositum opere unguentarii, mistum diligenter, et purum, et sanctificatione dignissimum.	³⁵ Faciesque thymiama compositum opere unguentarii, sale conditum et purum et sanctum.
³⁶ Cumque in tenuissimum pulverem universa contuderis, pones ex eo coram tabernaculo testimonii, in quo loco apparebo tibi. Sanctum sanctorum erit vobis thymiama.	³⁶ Cumque in tenuissimum pulverem ex parte contuderis, pones ex eo coram testimonio in tabernaculo conventus, in quo conveniam ad te: sanctum sanctorum erit vobis thymiama.
³⁷ Talem compositionem non facietis in usus vestros, quia sanctum est Domino.	³⁷ Talem compositionem non facietis in usus vestros, quia tibi sanctum erit pro Domino;
³⁸ Homo quicumque fecerit simile, ut odore illius perfruatur, peribit de populis suis.	³⁸ homo quicumque fecerit simile, ut odore illius perfruatur, peribit de populis suis ”.

Vetus Testamentum

Novum Testamentum

Cambia Bibbia

Confronta con un'altra Bibbia

Versetti esaminati