Exodus 21

¹Hæc sunt judicia quæ propones eis.²Si emeris servum hebræum, sex annis serviet tibi : in septimo egredietur liber gratis.³Cum quali veste intraverit, cum tali exeat : si habens uxorem, et uxor egredietur simul.⁴Sin autem dominus dederit illi uxorem, et pepererit filios et filias : mulier et liberi ejus erunt domini sui, ipse vero exibit cum vestitu suo.⁵Quod si dixerit servus : Diligo dominum meum et uxorem ac liberos ; non egrediar liber :⁶offeret eum dominus diis, et applicabitur ad ostium et postes, perforabitque aurem ejus subula : et erit ei servus in sæculum.⁷Si quis vendiderit filiam suam in famulam, non egredietur sicut ancillæ exire consueverunt.⁸Si displicuerit oculis domini sui cui tradita fuerat, dimittet eam : populo autem alieno vendendi non habebit potestatem, si spreverit eam.⁹Sin autem filio suo desponderit eam, juxta morem filiarum faciet illi.¹⁰Quod si alteram ei acceperit, providebit puellæ nuptias, et vestimenta, et pretium pudicitiæ non negabit.¹¹Si tria ista non fecerit, egredietur gratis absque pecunia.
¹²Qui percusserit hominem volens occidere, morte moriatur.¹³Qui autem non est insidiatus, sed Deus illum tradidit in manus ejus, constituam tibi locum in quem fugere debeat.¹⁴Si quis per industriam occiderit proximum suum, et per insidias : ab altari meo evelles eum, ut moriatur.¹⁵Qui percusserit patrem suum aut matrem, morte moriatur.¹⁶Qui furatus fuerit hominem, et vendiderit eum, convictus noxæ, morte moriatur.¹⁷Qui maledixerit patri suo, vel matri, morte moriatur.
¹⁸Si rixati fuerint viri, et percusserit alter proximum suum lapide vel pugno, et ille mortuus non fuerit, sed jacuerit in lectulo :¹⁹si surrexerit, et ambulaverit foris super baculum suum, innocens erit qui percusserit, ita tamen ut operas ejus et impensas in medicos restituat.²⁰Qui percusserit servum suum, vel ancillam virga, et mortui fuerint in manibus ejus, criminis reus erit.²¹Sin autem uno die vel duobus supervixerit, non subjacebit p?næ, quia pecunia illius est.²²Si rixati fuerint viri, et percusserit quis mulierem prægnantem, et abortivum quidem fecerit, sed ipsa vixerit : subjacebit damno quantum maritus mulieris expetierit, et arbitri judicaverint.²³Sin autem mors ejus fuerit subsecuta, reddet animam pro anima,²⁴oculum pro oculo, dentem pro dente, manum pro manu, pedem pro pede,²⁵adustionem pro adustione, vulnus pro vulnere, livorem pro livore.²⁶Si percusserit quispiam oculum servi sui aut ancillæ, et luscos eos fecerit, dimittet eos liberos pro oculo quem eruit.²⁷Dentem quoque si excusserit servo vel ancillæ suæ, similiter dimittet eos liberos.
²⁸Si bos cornu percusserit virum aut mulierem, et mortui fuerint, lapidibus obruetur : et non comedentur carnes ejus, dominus quoque bovis innocens erit.²⁹Quod si bos cornupeta fuerit ab heri et nudiustertius, et contestati sunt dominum ejus, nec recluserit eum, occideritque virum aut mulierem : et bos lapidibus obruetur, et dominum ejus occident.³⁰Quod si pretium fuerit ei impositum, dabit pro anima sua quidquid fuerit postulatus.³¹Filium quoque et filiam si cornu percusserit, simili sententiæ subjacebit.³²Si servum ancillamque invaserit, triginta siclos argenti domino dabit, bos vero lapidibus opprimetur.³³Si quis aperuerit cisternam, et foderit, et non operuerit eam, cecideritque bos aut asinus in eam,³⁴reddet dominus cisternæ pretium jumentorum : quod autem mortuum est, ipsius erit.³⁵Si bos alienus bovem alterius vulneraverit, et ille mortuus fuerit : vendent bovem vivum, et divident pretium, cadaver autem mortui inter se dispertient.³⁶Sin autem sciebat quod bos cornupeta esset ab heri et nudiustertius, et non custodivit eum dominus suus : reddet bovem pro bove, et cadaver integrum accipiet.

Vetus Testamentum

Novum Testamentum

Cambia Bibbia

Confronta con un'altra Bibbia

Versetti esaminati