Numeri ܡܢܝܢܐ 16

¹ ܘܶܐܬܦܠܶܓ ܩܽܘܪܰܚ ܒܰܪ ܝܰܨܗܳܪ. ܒܰܪ ܩܳܗܳܬ. ܒܰܪ ܠܶܘܺܝ. ܘܕܳܬܳܢ ܘܰܐܒܺܝܪܳܡ. ܒܢܰܝ̈ ܐܶܠܝܰܒ. ܘܳܐܘܳܢ ܒܰܪ ܦܶܠܰܬ. ܒܢܰܝ̈ ܪܽܘܒܺܝܠ.

² ܘܩܳܡܘ ܩܕܳܡ ܡܽܘܫܶܐ. ܘܓܰܒܖ̈ܶܐ ܡܶܢ ܒܢܰܝ̈ ܝܺܣܪܳܐܶܝܠ. ܡܰܐܬܶܝܢ ܘܚܰܡܫܺܝܢ ܖ̈ܺܝܫܶܐ ܕܰܟܢܽܘܫܬܳܐ. ܕܡܶܬܩܪܶܝܢ ܠܙܰܒܢܳܐ ܓܰܒܖ̈ܶܐ ܕܰܫܡܳܗ̈ܳܬܳܐ.

³ ܘܶܐܬܟܰܢܰܫܘ ܥܰܠ ܡܽܘܫܶܐ ܘܥܰܠ ܐܰܗܪܽܘܢ ܘܶܐܡܰܪܘ ܠܗܽܘܢ. ܠܳܐ ܟܰܕܽܘ ܠܟܽܘܢ ܕܟܽܠܳܗ̇ ܟܢܽܘܫܬܳܐ ܟܽܠܗܽܘܢ ܩܰܕܺܝܫܺܝܢ. ܘܡܳܪܝܳܐ ܒܗܽܘܢ. ܐܶܠܳܐ ܕܬܶܫܬܰܩܠܽܘܢ ܥܰܠ ܟܽܠܳܗ̇ ܟܢܽܘܫܬܶܗ ܕܡܳܪܝܳܐ.

⁴ ܘܰܫܡܰܥ ܡܽܘܫܶܐ. ܘܰܢܦܰܠ ܥܰܠ ܐܰܦܰܘ̈ܗܝ.

⁵ ܘܡܰܠܶܠ ܥܰܡ ܩܽܘܪܰܚ ܘܥܰܡ ܟܽܠܳܗ̇ ܟܢܽܘܫܬܶܗ. ܘܶܐܡܰܪ ܠܗܽܘܢ. ܒܨܰܦܪܳܐ ܢܚܰܘܶܐ ܡܳܪܝܳܐ ܡܰܢ ܕܕܺܝܠܶܗ ܗ̱ܘ. ܘܰܕܩܰܕܺܝܫ ܢܶܬܩܰܪܰܒ ܠܘܳܬܶܗ. ܘܰܐܝܢܳܐ ܕܰܓܒܶܐ ܠܶܗ ܢܶܬܩܰܪܰܒ ܠܘܳܬܶܗ.

⁶ ܗܳܟܰܢܳܐ ܥܒܶܕܘ. ܣܰܒܘ ܠܟܽܘܢ ܦܺܝܖ̈ܡܶܐ. ܐܰܢ̱ܬ ܩܽܘܪܰܚ ܘܟܽܠܳܗ̇ ܟܢܽܘܫܬܳܟ.

⁷ ܘܣܺܝܡܘ ܒܗܽܘܢ ܢܽܘܪܳܐ. ܘܣܺܝܡܘ ܒܗܽܘܢ ܒܶܣ̈ܡܶܐ ܩܕܳܡ ܡܳܪܝܳܐ ܡܚܳܪ. ܘܓܰܒܪܳܐ ܕܓܳܒܶܐ ܠܶܗ ܡܳܪܝܳܐ. ܗܽܘ ܢܶܗܘܶܐ ܩܰܕܺܝܫ. ܟܰܕܽܘ ܠܟܽܘܢ ܒܢܰܝ̈ ܠܶܘܺܝ.

⁸ ܘܶܐܡܰܪ ܡܽܘܫܶܐ ܠܩܽܘܪܰܚ. ܫܡܰܥܘ ܬܽܘܒ ܒܢܰܝ̈ ܠܶܘܺܝ.

⁹ ܠܳܐ ܟܰܕܽܘ ܠܟܽܘܢ ܕܰܦܪܰܫܟܽܘܢ ܐܰ‌ܠܳܗܳܐ ܕܺܝܣܪܳܐܶܝܠ ܡܶܢ ܟܽܠܳܗ̇ ܟܢܽܘܫܬܳܐ ܕܺܝܣܪܳܐܶܝܠ. ܘܩܰܪܶܒܟܽܘܢ ܠܘܳܬܶܗ ܠܡܶܦܠܰܚ ܦܽܘܠܚܳܢܳܐ ܕܡܰܫܟܢܶܗ ܕܡܳܪܝܳܐ. ܘܠܰܡܩܳܡ ܩܕܳܡ ܟܢܽܘܫܬܳܐ ܠܰܡܫܰܡܳܫܽܘ ܐܶܢܽܘܢ.

¹⁰ ܘܩܰܪܒܳܟ ܠܳܟ ܘܰܠܟܽܠܗܽܘܢ ܐܰܚܰܝ̈ܟ ܒܢܰܝ̈ ܠܶܘܺܝ ܥܰܡܳܟ. ܐܶܠܳܐ ܒܳܥܶܝܢ ܐ̱ܢܬܽܘܢ ܐܳܦ ܟܳܗܢܽܘܬܳܐ.

¹¹ ܡܶܛܽܠ ܗܳܕܶܐ ܐܰܢ̱ܬ ܘܟܽܠܳܗ̇ ܟܢܽܘܫܬܳܟ. ܐܶܬܘܰܥܰܕܘ ܩܕܳܡ ܡܳܪܝܳܐ ܡܚܳܪ. ܘܰܐܗܪܽܘܢ ܡܰܢܽܘ ܕܪܳܛܢܺܝܢ ܐ̱ܢܬܽܘܢ ܥܠܰܘܗܝ.

¹² ܘܫܰܕܰܪܘ ܡܽܘܫܶܐ ܠܡܶܩܪܳܐ ܠܕܳܬܳܢ ܘܠܰܐܒܺܝܪܳܡ ܒܢܰܝ̈ ܐܶܠܝܰܒ. ܘܶܐܡܰܪܘ ܠܳܐ ܣܳܠܩܺܝܢܰܢ.

¹³ ܠܳܐ ܟܰܕܽܘ ܠܟܽܘܢ ܕܰܐܣܶܩܬܽܘܢܳܢ ܡܶܢ ܐܰܪܥܳܐ ܕܡܰܪܕܝܳܐ ܚܰܠܒܳܐ ܘܕܶܒܫܳܐ ܠܰܡܩܰܛܳܠܽܘܬܰܢ ܒܡܰܕܒܪܳܐ. ܐܶܠܳܐ ܡܶܬܪܰܘܪܒܺܝܬܽܘܢ ܥܠܰܝܢ ܐܳܦ ܡܶܬܪܰܘܪܳܒܽܘ.

¹⁴ ܘܠܰܐܪܥܳܐ ܕܡܰܪܕܝܳܐ ܚܰܠܒܳܐ ܘܕܶܒܫܳܐ ܠܳܐ ܐܰܥܶܠܬܳܢ. ܘܠܳܐ ܝ̣ܰܗܒܬ ܠܰܢ ܝܳܪܬܽܘܬܳܐ ܕܚܰܩ̈ܠܳܬܳܐ ܘܰܕܟܰܖ̈ܡܶܐ. ܐܶܢ ܥܰܝܢܰܝ̈ܢ ܡܥܰܘܰܪ ܐܰܢ̱ܬ. ܠܳܐ ܣܳܠܩܺܝܢܰܢ.

¹⁵ ܘܶܐܬܒܐܶܫ ܛܳܒ ܠܡܽܘܫܶܐ. ܘܶܐܡܰܪ ܩܕܳܡ ܡܳܪܝܳܐ. ܠܳܐ ܬܶܦܢܶܐ ܥܰܠ ܩܽܘܖ̈ܒܳܢܰܝܗܽܘܢ. ܡܶܛܽܠ ܕܠܳܐ ܚܡܳܪܳܐ ܕܚܰܕ ܡܶܢܗܽܘܢ ܕܶܒܪܶܬ. ܐܳܦܠܳܐ ܐܰܒܶܐܫܶܬ ܠܚܰܕ ܡܶܢܗܽܘܢ.

¹⁶ ܘܶܐܡܰܪ ܡܽܘܫܶܐ ܠܩܽܘܪܰܚ. ܐܰܢ̱ܬ ܘܟܽܠܳܗ̇ ܟܢܽܘܫܬܳܟ ܗܘܰܘ ܩܕܳܡ ܡܳܪܝܳܐ. ܐܰܢ̱ܬ ܘܗܶܢܽܘܢ ܘܰܐܗܪܽܘܢ ܡܚܳܪ.

¹⁷ ܣܰܒܘ ܓܒܰܪ ܦܺܝܪܡܶܗ. ܘܣܺܝܡܘ ܒܗܽܘܢ ܢܽܘܪܳܐ. ܘܣܺܝܡܘ ܒܗܽܘܢ ܒܶܣ̈ܡܶܐ. ܘܩܰܪܶܒܘ ܩܕܳܡ ܡܳܪܝܳܐ ܓܒܰܪ ܦܺܝܪܡܶܗ. ܡܰܐܬܶܝܢ ܘܚܰܡܫܺܝܢ ܦܺܝܖ̈ܡܺܝܢ. ܘܰܐܢ̱ܬ ܘܰܐܗܪܽܘܢ ܓܒܰܪ ܦܺܝܪܡܶܗ.

¹⁸ ܘܰܢܣܰܒܘ ܓܒܰܪ ܦܺܝܪܡܶܗ. ܘܣܳܡܘ ܒܗܽܘܢ ܢܽܘܪܳܐ. ܘܣܳܡܘ ܒܗܽܘܢ ܒܶܣ̈ܡܶܐ. ܘܩܳܡܘ ܩܕܳܡ ܡܰܫܟܰܢ ܙܰܒܢܳܐ ܡܽܘܫܶܐ ܘܰܐܗܪܽܘܢ.

¹⁹ ܘܟܰܢܶܫ ܥܠܰܝܗܽܘܢ ܩܽܘܪܳܚ ܠܟܽܠܳܗ̇ ܟܢܽܘܫܬܳܐ ܠܬܰܪܥܳܐ ܕܡܰܫܟܰܢ ܙܰܒܢܳܐ. ܘܶܐܬܓܠܺܝ ܫܽܘܒܚܶܗ ܕܡܳܪܝܳܐ ܥܰܠ ܟܽܠܳܗ̇ ܟܢܽܘܫܬܳܐ.

²⁰ ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܥܰܡ ܐܰܗܪܽܘܢ. ܘܶܐܡܰܪ ܠܗܽܘܢ.

²¹ ܐܶܬܦܰܪܫܘ ܡܶܢ ܓܰܘ ܟܢܽܘܫܬܳܐ ܗܳܕܶܐ. ܘܰܐܘܒܶܕ ܐܶܢܽܘܢ ܒܰܚܕܳܐ ܫܳܥܳܐ.

²² ܘܰܢܦܰܠܘ ܥܰܠ ܐܰܦܰܝ̈ܗܽܘܢ ܘܶܐܡܰܪܘ. ܐܺܝܠ ܐܰ‌ܠܳܗܳܐ ܕܖ̈ܽܘܚܳܬܳܐ ܕܟܽܠܒܣܰܪ. ܓܰܒܪܳܐ ܚܰܕ ܢܶܚܛܶܐ. ܘܥܰܠ ܟܽܠܳܗ̇ ܟܢܽܘܫܬܳܐ ܢܶܗܘܶܐ ܪܽܘܓܙܳܐ.

²³ ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.

²⁴ ܡܰܠܶܠ ܥܰܡ ܟܽܠܳܗ̇ ܟܢܽܘܫܬܳܐ. ܘܶܐܡܰܪ ܠܗܽܘܢ. ܐܶܬܦܰܪܫܘ ܡܶܢ ܚܕܳܖ̈ܰܘܗܝ ܕܡܰܫܟܢܳܐ ܕܩܽܘܪܰܚ. ܘܰܕܕܳܬܰܢ. ܘܕܰܐܒܺܝܪܰܡ.

²⁵ ܘܩܳܡ ܡܽܘܫܶܐ ܘܶܐܙܰܠ ܠܘܳܬ ܕܳܬܰܢ ܘܰܐܒܺܝܪܰܡ. ܘܶܐܙܰܠܘ ܒܳܬܪܶܗ ܣܳܒ̈ܶܐ ܕܺܝܣܪܳܐܶܝܠ.

²⁶ ܘܡܰܠܶܠ ܥܰܡ ܟܽܠܳܗ̇ ܟܢܽܘܫܬܳܐ ܘܶܐܡܰܪ ܠܗܽܘܢ. ܐܶܬܦܰܪܩܘ ܡܶܢ ܡܰܫܟܢܰܝ̈ܗܽܘܢ ܕܓܰܒܖ̈ܶܐ ܗܳܠܶܝܢ ܚܰܛܳܝ̈ܶܐ. ܘܠܳܐ ܬܶܬܩܰܪܒܽܘܢ ܠܟܽܠܡܶܕܶܡ ܕܺܐܝܬ ܠܗܽܘܢ. ܕܠܳܐ ܬܶܒܠܥܽܘܢ ܒܰܚܛܳܗܰܝ̈ܗܽܘܢ.

²⁷ ܘܶܐܬܦܰܪܰܩܘ ܡܶܢ ܡܰܫܟܢܳܐ ܕܩܽܘܪܰܚ. ܘܰܕܕܳܬܰܢ. ܘܕܰܐܒܺܝܪܰܡ. ܘܕܳܬܰܢ ܘܰܐܒܺܝܪܰܡ ܢܦܰܩܘ ܟܰܕ ܩܳܝܡܺܝܢ ܒܬܰܪܥܳܐ ܕܡܰܫܟܢܰܝ̈ܗܽܘܢ. ܘܢܶܫܰܝ̈ܗܽܘܢ ܘܰܒܢܰܝ̈ܗܽܘܢ ܘܺܝܩܰܪܬܗܽܘܢ.

²⁸ ܘܶܐܡܰܪ ܡܽܘܫܶܐ ܒܗܳܕܶܐ ܬܶܕܥܽܘܢ ܕܡܳܪܝܳܐ ܫܰܕܪܰܢܝ. ܠܡܶܥܒܰܕ ܗܳܠܶܝܢ ܟܽܠܗܽܘܢ ܥܒܳܕ̈ܶܐ. ܘܠܳܐ ܗܘܳܐ ܡܶܢ ܪܶܥܝܳܢܝ.

²⁹ ܐܶܢ ܐܰܝܟ ܡܰܘܬܳܐ ܕܟܽܠܢܳܫ ܢܡܽܘܬܽܘܢ ܗܳܠܶܝܢ. ܘܦܽܘܩܕܳܢܳܐ ܐܰܝܟ ܕܥܰܠ ܟܽܠܢܳܫ ܢܶܬܦܩܶܕ ܥܠܰܝܗܽܘܢ. ܠܳܐ ܗܘܳܐ ܡܳܪܝܳܐ ܫܰܕܪܰܢܝ.

³⁰ ܘܶܐܢ ܒܪܺܝܬܳܐ ܢܶܒܪܶܐ ܡܳܪܝܳܐ. ܘܬܶܦܬܰܚ ܐܰܪܥܳܐ ܦܽܘܡܳܗ̇. ܘܬܶܒܠܰܥ ܐܶܢܽܘܢ. ܠܗܽܘܢ ܘܰܠܟܽܠܡܶܕܶܡ ܕܺܐܝܬ ܠܗܽܘܢ. ܘܢܶܚܬܽܘܢ ܟܰܕ ܚܰܝܺܝܢ ܠܰܫܝܽܘܠ. ܬܶܕܥܽܘܢ ܕܰܐܪܓܶܙܘ ܓܰܒܖ̈ܶܐ ܗܳܠܶܝܢ ܠܡܳܪܝܳܐ.

³¹ ܘܟܰܕ ܫܰܠܶܡ ܡܽܘܫܶܐ ܠܡܺܐܡܰܪ ܗܳܠܶܝܢ ܟܽܠܗܽܘܢ ܦܶܬܓܳܡ̈ܶܐ. ܐܶܬܦܰܬܚܰܬ ܐܰܪܥܳܐ ܕܰܬܚܽܘܬܰܝܗܽܘܢ.

³² ܘܦܶܬܚܰܬ ܐܰܪܥܳܐ ܦܽܘܡܳܗ̇ ܘܒܶܠܥܰܬ ܐܶܢܽܘܢ. ܠܗܽܘܢ ܘܰܠܒܳܬܰܝ̈ܗܽܘܢ ܘܰܠܟܽܠܗܽܘܢ ܒܢܰܝ̈ܢܳܫܳܐ ܕܥܰܡ ܩܽܘܪܰܚ. ܘܰܠܟܽܠܶܗ ܩܶܢܝܳܢܗܽܘܢ.

³³ ܘܰܢܚܶܬܘ ܗܶܢܽܘܢ. ܘܟܽܠܡܶܕܶܡ ܕܺܐܝܬ ܠܗܽܘܢ ܟܰܕ ܚܰܝܺܝܢ ܠܰܫܝܽܘܠ. ܘܶܐܬܟܰܣܝܰܬ ܐܰܪܥܳܐ ܠܥܶܠ ܡܶܢܗܽܘܢ. ܘܶܐܒܰܕܘ ܡܶܢ ܓܰܘ ܟܢܽܘܫܬܳܐ.

³⁴ ܘܟܽܠܗܽܘܢ ܒܢܰܝ̈ ܝܺܣܪܳܐܶܝܠ ܕܒܰܚܕܳܖ̈ܰܝܗܽܘܢ ܥܪܰܩܘ ܡܶܢ ܩܳܠܗܽܘܢ. ܘܶܐܡܰܪܘ ܕܰܠܡܳܐ ܬܶܒܠܥܰܢ ܐܰܪܥܳܐ.

³⁵ ܘܢܶܦܩܰܬ ܢܽܘܪܳܐ ܡܶܢ ܩܕܳܡ ܡܳܪܝܳܐ. ܘܶܐܟܠܰܬ ܠܡܰܐܬܶܝܢ ܘܚܰܡܫܺܝܢ ܓܰܒܖ̈ܺܝܢ ܕܰܡܩܰܪܒܺܝܢ ܗܘܰܘ ܒܶܣ̈ܡܶܐ.

³⁶ ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.

³⁷ ܐܶܡܰܪ ܠܶܐܠܺܝܥܳܙܳܪ ܒܰܪ ܐܰܗܪܽܘܢ ܟܳܗܢܳܐ. ܣܰܒ ܦܺܝܖ̈ܡܶܐ ܡܶܢ ܒܰܝܢܳܬ ܡܰܘܩ̈ܕܶܐ. ܘܢܽܘܪܳܐ ܫܕܺܝ ܠܗܰܠ ܡܶܛܽܠ ܕܶܐܬܩܰܕܰܫܘ.

³⁸ ܦܺܝܖ̈ܡܰܝܗܽܘܢ ܕܚܰܛܳܝ̈ܶܐ ܗܳܠܶܝܢ ܒܢܰܦܫ̈ܳܬܗܽܘܢ. ܘܰܥܒܶܕ ܐܶܢܽܘܢ ܛܰܣ̈ܶܐ ܖ̈ܰܩܺܝܩܶܐ ܩܪܳܡܳܐ ܠܡܰܕܒܚܳܐ. ܡܶܛܽܠ ܕܩܰܪܶܒܘ ܐܶܢܽܘܢ ܩܕܳܡ ܡܳܪܝܳܐ. ܘܶܐܬܩܰܕܰܫܘ. ܢܶܗܘܽܘܢ ܠܳܐܬܳܐ ܒܢܰܝ̈ ܝܺܣܪܳܐܶܝܠ.

³⁹ ܘܰܢܣܰܒ ܐܶܠܺܝܥܳܙܳܪ ܟܳܗܢܳܐ ܦܺܝܖ̈ܡܶܐ ܕܰܢܚܳܫܳܐ ܕܩܰܪܶܒܘ ܡܰܘܩ̈ܕܶܐ. ܘܰܐܪܶܩܘ ܐܶܢܽܘܢ ܛܰܣ̈ܶܐ ܠܡܰܕܒܚܳܐ.

⁴⁰ ܕܽܘܟܪܳܢܳܐ ܠܰܒܢܰܝ̈ ܝܺܣܪܳܐܶܝܠ. ܕܠܳܐ ܢܶܗܘܶܐ ܩܳܪܶܒ ܓܰܒܪܳܐ ܢܽܘܟܪܳܝܳܐ ܐܰܝܢܳܐ ܕܠܳܐ ܗܘܳܐ ܡܶܢ ܙܰܪܥܶܗ ܕܰܐܗܪܽܘܢ. ܠܰܡܣܳܡ ܥܶܛܪܳܐ ܕܒܶܣ̈ܡܶܐ ܩܕܳܡ ܡܳܪܝܳܐ. ܘܠܳܐ ܢܶܗܘܶܐ ܐܰܝܟ ܩܽܘܪܰܚ ܘܰܐܝܟ ܟܽܠܳܗ̇ ܟܢܽܘܫܬܶܗ. ܕܦܶܬܚܰܬ ܐܰܪܥܳܐ ܦܽܘܡܳܗ̇ ܘܒܶܠܥܰܬ ܐܶܢܽܘܢ. ܐܰܝܟ ܕܶܐܡܰܪ ܡܳܪܝܳܐ ܒܺܐܝܕܳܐ ܕܡܽܘܫܶܐ.

⁴¹ ܘܰܪܛܶܢܘ ܟܽܠܳܗ̇ ܟܢܽܘܫܬܳܐ ܕܰܒܢܰܝ̈ ܝܺܣܪܳܐܶܝܠ ܒܳܬܰܪ ܝܰܘܡܳܐ. ܥܰܠ ܡܽܘܫܶܐ ܘܥܰܠ ܐܰܗܪܽܘܢ. ܘܶܐܡܰܪܘ ܠܗܽܘܢ. ܐܰܢ̱ܬܽܘܢ ܩܛܰܠܬܽܘܢ ܠܥܰܡܶܗ ܕܡܳܪܝܳܐ.

⁴² ܘܟܰܕ ܐܶܬܟܰܢܫܰܬ ܟܽܠܳܗ̇ ܟܢܽܘܫܬܳܐ ܥܰܠ ܡܽܘܫܶܐ ܘܥܰܠ ܐܰܗܪܽܘܢ. ܐܶܬܦܢܺܝܘ ܠܡܰܫܟܰܢܙܰܒܢܳܐ. ܘܰܚܙܰܘ ܕܟܰܣܝܰܬܶܗ ܥܢܳܢܳܐ. ܘܶܐܬܓܠܺܝ ܫܽܘܒܚܶܗ ܕܡܳܪܝܳܐ.

⁴³ ܘܶܐܬܳܐ ܡܽܘܫܶܐ ܘܰܐܗܪܽܘܢ ܩܕܳܡ ܡܰܫܟܰܢ ܙܰܒܢܳܐ.

⁴⁴ ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ ܘܥܰܡ ܐܰܗܪܽܘܢ. ܘܶܐܡܰܪ ܠܗܽܘܢ.

⁴⁵ ܐܶܬܦܰܪܫܘ ܡܶܢ ܓܰܘ ܟܢܽܘܫܬܳܐ ܗܳܕܶܐ. ܘܰܐܘܒܶܕ ܐܶܢܽܘܢ ܒܰܚܕܳܐ ܫܳܥܳܐ. ܘܰܢܦܰܠܘ ܥܰܠ ܐܰܦܰܝ̈ܗܽܘܢ.

⁴⁶ ܘܶܐܡܰܪ ܡܽܘܫܶܐ ܠܰܐܗܪܽܘܢ. ܣܰܒ ܦܺܝܪܡܳܐ ܘܣܺܝܡ ܒܶܗ ܢܽܘܪܳܐ. ܘܣܺܝܡ ܒܶܗ ܒܶܣ̈ܡܶܐ. ܘܰܐܘܒܶܠ ܒܰܥܓܰܠ ܠܰܟܢܽܘܫܬܳܐ ܘܚܰܣܳܐ ܥܠܰܝܗܽܘܢ. ܡܶܛܽܠ ܕܰܢܦܰܩ ܪܽܘܓܙܳܐ ܡܶܢ ܩܕܳܡ ܡܳܪܝܳܐ. ܘܫܰܪܺܝ ܡܰܘܬܳܢܳܐ ܕܡܶܢ ܫܶܠܝܳܐ ܒܥܰܡܳܐ.

⁴⁷ ܘܰܢܣܰܒ ܐܰܗܪܽܘܢ ܐܰܝܟ ܕܶܐܡܰܪ ܠܶܗ ܡܽܘܫܶܐ. ܘܰܪܗܶܛ ܠܓܰܘ ܟܢܽܘܫܬܳܐ. ܘܰܚܙܳܐ ܕܫܰܪܺܝ ܡܰܘܬܳܢܳܐ ܕܡܶܢ ܫܶܠܝܳܐ ܒܥܰܡܳܐ. ܘܣܳܡ ܒܶܣ̈ܡܶܐ ܘܚܰܣܺܝ ܥܰܠ ܥܰܡܳܐ.

⁴⁸ ܘܩܳܡ ܒܶܝܬ ܡܺܝ̈ܬܶܐ ܠܚܰܝ̈ܶܐ. ܘܶܐܬܟܠܺܝ ܡܰܘܬܳܢܳܐ ܕܡܶܢ ܫܶܠܝܳܐ.

⁴⁹ ܘܰܗܘܰܘ ܕܡܺܝܬܘ ܒܡܰܘܬܳܢܳܐ ܕܡܶܢ ܫܶܠܝܳܐ. ܐܰܪܒܬܰܥܣܰܪ ܐܰܠܦܺܝ̈ܢ ܘܰܫܒܰܥ ܡܳܐܐ. ܣܛܰܪ ܡܶܢ ܕܡܺܝܬܘ ܒܦܳܠܓܽܘܬܶܗ ܕܩܽܘܪܰܚ.

⁵⁰ ܘܰܗܦܰܟ ܐܰܗܪܽܘܢ ܠܘܳܬ ܡܽܘܫܶܐ ܠܬܰܪܥܳܐ ܕܡܰܫܟܰܢܙܰܒܢܳܐ. ܘܶܐܬܟܠܺܝ ܡܰܘܬܳܢܳܐ ܕܡܶܢ ܫܶܠܝܳܐ.