SCRUTATIO

Venerdi, 3 luglio 2026 - San Tommaso ( Letture di oggi)

Primo libro delle Cronache ܕܒܪܝܡܝܢ 17


font

1ܘܗܘܐ ܕܟܕ ܝܬܒ ܕܘܝܕ ܒܒܝܬܗ ܘܐܡܪ ܕܘܝܕ ܠܢܬܢ ܢܒܝܐ ܚܙܝ ܕܐܢܐ ܝ̇ܬܒ ܒܒܝܬܐ ܕܡܛܠܠ ܒܩܪ̈ܝܬܐ ܕܐܪܙܐ ܘܩܒܘܬܗ ܕܡܪܝܐ ܫܪܝܐ ܒܓܘ ܡܫܟܢܐ ܕܣܥܪܐ2ܘܐܡܪ ܢܬܢ ܠܕܘܝܕ ܟܠ ܡܐ ܕܒܠܒܟ ܙܠ ܘܥܒܕ ܡܛܠ ܕܡܪܝܐ ܥܡܟ3ܘܗܘܐ ܒܠܠܝܐ ܗ̇ܘ ܘܡܠܬܗ ܕܡܪܝܐ ܗܘܬ ܥܠ ܢܬܢ ܢܒܝܐ ܘܐܡܪ ܠܗ4ܙܠ ܘܗܟܢܐ ܬܐܡܪ ܠܥܒ̣ܕܝ ܕܘܝܕ ܗܟܢܐ ܐܡ̇ܪ ܡܪܝܐ ܐܢܬ ܠܐ ܬܒܢܐ ܠܝ ܒܝܬܐ ܠܡܬܒ ܒܗ5ܡܛܠ ܕܠܐ ܝܬܒܬ ܒܒܝܬܐ ܡܢ ܝܘܡܐ ܕܐܣܩܬ ܠܐܝܣܪܝܠ ܡܢ ܐܪܥܐ ܕܡܨܪܝܢ ܘܥܕܡܐ ܠܝܘܡܢܐ ܘܗܘܝܬ ܡܫܢܐ ܡܢ ܡܫܟܢܐ ܠܡܫܟܢܐ6ܗܐ ܟܡܐ ܕܡܗܠܟ ܗܘܝܬ ܒܟܠܗܘܢ ܒ̈ܢܝ ܐܝܣܪܝܠ ܕܠܡܐ ܡܠܬܐ ܐܡܪܬ ܠܚܕ ܡܢ ܕ̇ܝ̈ܢܐ ܕܒܢ̈ܝ ܐܝܣܪܝܠ ܕܦܩܕܬ ܠܡܕܢ ܠܥܡܝ ܐܝܣܪܝܠ ܘܐܡܪܬ ܠܗܘܢ ܕܠܡܢܐ ܠܐ ܒܢܝܬܘܢ ܠܝ ܒܝܬܐ ܕܡܛܠܠ ܒܐܪ̈ܙܐ7ܐܦ ܗܫܐ ܗܟܢܐ ܬܐܡܪ ܠܥܒ̣ܕܝ ܕܘܝܕ ܗܟܢܐ ܐܡ̇ܪ ܡܪܝܐ ܚܝܠܬܢܐ ܐܢܐ ܕܒܪܬܟ ܡܢ ܕܝܪܐ ܡܢ ܒܣܬܪ ܥܢܐ ܠܡܗܘܐ ܡܠܟܐ ܥܠ ܐܝܣܪܝܠ ܥܡܝ8ܘܗܘܝܬ ܥܡܟ ܒܟܠ ܐܬܪ ܕܐܙܠܬ ܘܐܘܒܕܬ ܠܟܠܗܘܢ ܒܥܠܕ̈ܒܒܝܟ ܡܢ ܩܕܡܝܟ ܘܥܒܕܬ ܠܟ ܫܡܐ ܪܒܐ ܐܝܟ ܫܡܐ ܕܪ̈ܘܪܒܢܐ ܕܐܝܬ ܒܐܪܥܐ9ܘܐܨܘܒ ܕܘܟܬܐ ܠܥܡܝ ܐܝܣܪܝܠ ܘܐܫܪܝܘܗܝ ܘܢܬܒ ܒܕܘܟܬܗ ܘܠܐ ܢܙܘܥ ܬܘܒ ܘܠܐ ܢܘܣܦܘܢ ܒ̈ܢܝ ܥܘ̣ܠܐ ܠܡܓܠܝܘܬܗ ܐܝܟ ܕܒܩܕܡܝܬܐ10ܡܢ ܝܘܡܐ ܕܥܒܕܬܟ ܕܝ̇ܢܐ ܥܠ ܥܡܝ ܐܝܣܪܝܠ ܘܐܢܝܚܬ ܠܟ ܡܢ ܟܠܗܘܢ ܒܥ̈ܠܕܒܒܝܟ ܘܚܘܝܟ ܡܪܝܐ ܕܡܠܟܘܬܐ ܩܝܡܐ ܗܝ ܠܟ ܥܕܡܐ ܠܥܠܡ11ܘܟܕ ܢܫܠܡܘܢ ܝܘ̈ܡܝ ܚܝ̈ܝܟ ܘܬܐܙܠ ܘܬܬܟܢܫ ܠܘܬ ܐܒܗ̈ܝܟ ܐܩܝܡ ܙܪܥܟ ܡܢ ܒܬܪܟ ܕܢ̇ܦܩ ܡܢ ܚܨܟ ܘܐܬܩܢܝܗ̇ ܠܡܠܟܘܬܗ12ܘܗܘ ܢܒܢܐ ܒܝܬܐ ܠܫܡܝ ܘܐܬܩܢ ܟܘܪܣܝܐ ܕܡܠܟܘܬܗ ܠܥܠܡ13ܐܢܐ ܐܗܘܐ ܠܗ ܠܐܒܐ ܘܗܘ ܢܗܘܐ ܠܝ ܠܒܪܐ ܘܛܝܒ̈ܘܬܝ ܠܐ ܢܥܒܪ̈ܢ ܡܢ ܠܘܬܗ ܐܝܟ ܕܐܥܒܪܬ ܡܢ ܫܐܘܠ ܕܗܘܐ ܡܢ ܩܕܡܝܟ14ܘܐܫܠܛܝܘܗܝ ܒܒܝܬܝ ܘܒܡܠܟܘܬܝ ܠܥܠܡ ܥܠܡܝܢ ܘܟܘܪܣܝܐ ܕܡܠܟܘܬܗ ܢܗܘܐ ܡܛܝܒ ܠܗ ܠܥܠܡ15ܥܠ ܟܠܗܘܢ ܦܬܓ̈ܡܐ ܗܠܝܢ ܘܥܠ ܟܠܗ ܚܙܘܐ ܗܢܐ ܗܟܢܐ ܡܠܠ ܢܬܢ ܢܒܝܐ ܥܡ ܕܘܝܕ16ܘܐܬܐ ܡܠܟܐ ܕܘܝܕ ܘܝܬܒ ܩܕܡ ܡܪܝܐ ܘܐܡܪ ܡܢܐ ܚܫܝܒ ܐܢܐ ܩܕܡܝܟ ܡܪܐ ܡܪ̈ܘܬܐ ܘܡ̇ܢܘ ܒܝܬܝ ܕܡܛܝܬܢܝ ܥܕܡܐ ܠܗܪܟܐ17ܘܙܥܘܪܝܐ ܗܝ ܗܕܐ ܒܥܝܢ̈ܝܟ ܡܪܐ ܡܪ̈ܘܬܐ ܕܡܠܠܬ ܥܠ ܒܝܬܗ ܕܥܒ̣ܕܟ ܡܢ ܠܩܘܕܡܝܢ ܘܟܠܗܘܢ ܒܢܝ̈ܢܫܐ ܕܥ̇ܒܕܝܢ ܕܚܠܬܟ ܒܟܠܗ ܠܒܗܘܢ ܡܦܩ ܐܢܬ ܠܗܘܢ ܡܢ ܚܫܘܟܐ ܠܢܗܝܪܐ ܡܪܐ ܡܪ̈ܘܬܐ18ܘܡܢܐ ܢܫܬܒܗܪ ܬܘܒ ܕܘܝܕ ܥܒ̣ܕܟ ܠܡܡܠܠܘ ܩܕܡܝܟ ܠܟ ܓܠܝܢ ܥ̇ܒ̈ܕܘܗܝ ܕܥܒ̣ܕܟ ܡܪܐ ܡܪ̈ܘܬܐ19ܡܛܠ ܕܝܕ̇ܥ ܐܢܬ ܡܢܐ ܐܝܬ ܒܠܒܗ ܕܥܒ̣ܕܟ ܥܒܕܬ ܠܗ ܟܠܗܝܢ ܪ̈ܘܪܒܬܐ ܗܠܝܢ ܠܡܘܕܥܘ ܠܥܒ̣ܕܟ20ܡܛܠ ܗܢܐ ܝܕܥܬ ܡܪܐ ܡܪ̈ܘܬܐ ܡܛܠ ܕܠܝܬ ܐܟܘܬܟ ܘܠܝܬ ܐܠܗ ܐܠܐ ܐܢ ܐܢܬ ܐܝܟ ܟܠ ܡܐ ܕܫܡܥܢ ܒܐ̈ܕܢܝܢ21ܘܡ̇ܢܘ ܐܝܬ ܐܝܟ ܥܡܟ ܐܝܣܪܝܠ ܥܡܐ ܚܕ ܒܐܪܥܐ ܕܐܬܓܠܝܬ ܡܢ ܫܡܝܐ ܘܦܪܩܬ ܐܢܘܢ ܘܡܛܠܬܗܘܢ ܥܒܕܬ ܢܣ̈ܝܘܢܐ ܪ̈ܘܪܒܐ ܘܕ̈ܚܝܠܐ ܘܡܚ̈ܘܬܐ ܪ̈ܘܪܒܬܐ ܥܠ ܡܨܪ̈ܝܐ ܥܕܡܐ ܠܐܝܟܐ ܕܐܦܩܬ ܐܢܘܢ ܡܢ ܒܝܢܬܗܘܢ22ܘܐܬܩܢܬ ܠܟ ܠܥܡܟ ܐܝܣܪܝܠ ܠܡܗܘܐ ܠܟ ܥܡܐ ܥܕܡܐ ܠܥܠܡ ܥܠܡܝܢ ܘܐܢܬ ܡܪܝܐ ܗܘܝܬ ܠܗܘܢ ܐܠܗܐ23ܡܟܝܠ ܡܪܝܐ ܡܠܬܐ ܕܐܡܪܬ ܥܠ ܥܒ̣ܕܟ ܘܥܠ ܒ̈ܢܝ ܒܝܬܗ ܩܝܡ ܠܥܠܡ ܘܥܒܕ ܐܝܟܢܐ ܕܐܡܪܬ24ܘܢܫܬܪܪܘܢ ܥ̇ܒ̈ܕܝܟ ܠܥܠܡ ܘܢܫܬܒܚ ܫܡܟ ܒܓܘ ܥܠܡܐ ܘܢܗܘܘܢ ܐ̇ܡܪܝܢ ܡܪܝܐ ܚܝܠܬܢܐ ܡܪܐ ܡܪ̈ܘܬܐ ܐܠܗܐ ܕܐܝܣܪܝܠ ܘܒܝܬܗ ܕܕܘܝܕ ܥܒ̣ܕܟ ܢܗܘܐ ܡܬܩܢ ܩܕܡܝܟ ܠܥܠܡ25ܡܛܠ ܕܐܢܬ ܐܠܗܝ ܓܠܝܬ ܪܐܙܐ ܠܥܒ̣ܕܟ ܘܐܡܪܬ ܠܗ ܕܒܝܬܐ ܒܢܝ ܠܝ ܡܛܠ ܗܢܐ ܣܕܪ ܥܒ̣ܕܟ ܒܠܒܗ ܠܡܨܠܝܘ ܩܕܡܝܟ ܨܠܘܬܐ ܗܕܐ26ܡܟܝܠ ܡܪܝܐ ܐܢܬ ܗܘ ܐܠܗܝ ܘܟܠ ܡ̈ܠܝܟ ܬܪ̈ܝܨܬܐ ܐܝܠܝܢ ܕܡܠܠܬ ܠܥܒ̣ܕܟ ܛܒ̈ܬܐ ܐܢ̈ܝܢ27ܘܡܟܝܠ ܐܬܓܠܝ ܠܡܒܪܟܘ ܠܒܝܬܗ ܕܥܒ̣ܕܟ ܕܢܗܘܐ ܩܕܡܝܟ ܠܥܠܡ ܥܠܡܝܢ ܡܛܠ ܕܐܢܬ ܗܘ ܡܪܝܐ ܡܪܐ ܡܪ̈ܘܬܐ ܡܠܠܬ ܘܡܢ ܒܘܪܟܬܟ ܡܬܒܪܟܝܢ ܒܬܝ̈ܗܘܢ ܕܙܕܝ̈ܩܐ ܠܥܠܡ