Esodo ܡܦܩܢܐ 6

¹ ܘܶܐܡܰܪ ܡܳܪܝܳܐ ܠܡܽܘܫܶܐ. ܗܳܫܳܐ ܬܶܚܙܶܐ ܡܶܕܶܡ ܕܶܐܥܒܶܕ ܠܦܶܪܥܽܘܢ. ܡܶܛܽܠ ܕܒܺܐܝܕܳܐ ܬܰܩܺܝܦܬܳܐ ܢܫܰܕܰܪ ܐܶܢܽܘܢ. ܘܒܰܕܪܳܥܳܐ ܪܳܡܳܐ ܢܰܦܶܩ ܐܶܢܽܘܢ ܡܶܢ ܐܰܪܥܶܗ.

² ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ ܘܶܐܡܰܪ ܠܶܗ. ܐܶܢܳܐ ܐ̱ܢܳܐ ܡܳܪܝܳܐ.

³ ܕܶܐܬܓܠܺܝܬ ܠܰܐܒܪܳܗܳܡ ܘܠܺܐܝܣܚܳܩ ܘܰܠܝܰܥܩܽܘܒ ܒܺܐܝܠܫܰܕܰܝ ܐܰ‌ܠܳܗܳܐ. ܘܫܶܡ ܡܳܪܝܳܐ ܠܳܐ ܚܰܘܺܝܬ ܐܶܢܽܘܢ.

⁴ ܘܳܐܦ ܐܰܩܺܝܡܬ ܩܝܳܡܝ ܥܰܡܗܽܘܢ. ܠܡܶܬܰܠ ܠܗܽܘܢ ܐܰܪܥܳܐ ܕܰܟܢܰܥܢ. ܐܰܪܥܳܐ ܕܬܰܘܬܳܒܽܘܬܗܽܘܢ ܕܰܥܡܰܪܘ ܒܳܗ̇.

⁵ ܘܳܐܦ ܐܶܢܳܐ ܫܶܡܥ݀ܶܬ ܐܶܢܰܩܬܳܐ ܕܰܒܢܰܝ̈ ܝܺܣܪܳܐܶܝܠ. ܕܡܶܨܖ̈ܳܝܶܐ ܡܫܰܥܒܕܺܝܢ ܠܗܽܘܢ. ܘܶܐܬܕܰܟܪܶܬ ܩܝܳܡܝ.

⁶ ܡܶܛܽܠ ܗܳܢܳܐ ܐܶܡܰܪ ܠܰܒܢܰܝ̈ ܝܺܣܪܳܐܶܝܠ. ܐܶܢܳܐ ܐ̱ܢܳܐ ܡܳܪܝܳܐ ܐܰܠܳܗܟܽܘܢ. ܘܡܰܦܶܩ ܐ̱ܢܳܐ ܠܟܽܘܢ ܡܶܢ ܫܽܘܥܒܳܕܳܐ ܕܡܶܨܖ̈ܳܝܶܐ. ܘܰܡܦܰܨܶܐ ܐ̱ܢܳܐ ܠܟܽܘܢ ܡܶܢ ܥܒܳܕܗܽܘܢ. ܘܶܐܦܪܽܘܩܟܽܘܢ ܒܺܐܝܕܳܐ ܬܰܩܺܝܦܬܳܐ ܘܒܰܕܪܳܥܳܐ ܪܳܡܳܐ. ܘܰܒܕܺܝ̈ܢܶܐ ܪܰܘܖ̈ܒܶܐ.

⁷ ܘܶܐܣܰܒܟܽܘܢ ܠܺܝ ܥܰܡܳܐ. ܘܶܐܗܘܶܐ ܠܟܽܘܢ ܐܰ‌ܠܳܗܳܐ. ܘܬܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ ܐܰܠܳܗܟܽܘܢ. ܕܡܰܦܶܩ ܐ̱ܢܳܐ ܠܟܽܘܢ ܡܶܢ ܫܽܘܥܒܳܕܳܐ ܕܡܶܨܖ̈ܳܝܳܐ.

⁸ ܘܰܐܝܬܶܝܟܽܘܢ ܠܰܐܪܥܳܐ ܕܰܐܪܺܝܡܶܬ ܐܺܝܕܝ ܠܡܶܬܠܳܗ̇ ܠܰܐܒܪܳܗܳܡ ܘܠܺܐܝܣܚܳܩ ܘܰܠܝܰܥܩܽܘܒ. ܘܶܐܬܠܺܝܗ̇ ܠܟܽܘܢ ܝܳܪܬܽܘܬܳܐ. ܐܶܢܳܐ ܡܳܪܝܳܐ.

⁹ ܘܶܐܡܰܪ ܗܳܟܰܢܳܐ ܡܽܘܫܶܐ ܠܰܒܢܰܝ̈ ܝܺܣܪܳܐܶܝܠ. ܘܠܳܐ ܫܰܡܥܽܘܗܝ ܠܡܽܘܫܶܐ. ܡܶܢ ܟܰܪܝܽܘܬ ܪܽܘܚܳܐ ܘܡܶܢ ܫܽܘܥܒܳܕܳܐ ܩܰܫܝܳܐ.

¹⁰ ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ ܠܡܺܐܡܰܪ.

¹¹ ܙܶܠ ܐܶܡܰܪ ܠܦܶܪܥܽܘܢ ܡܰܠܟܳܐ ܕܡܶܨܪܶܝܢ. ܘܰܢܫܰܕܰܪ ܠܰܒܢܰܝ̈ ܝܺܣܪܳܐܶܝܠ ܡܶܢ ܐܰܪܥܶܗ.

¹² ܘܶܐܡܰܪ ܡܽܘܫܶܐ ܠܡܳܪܝܳܐ. ܗܳܐ ܒܢܰܝ̈ ܝܺܣܪܳܐܶܝܠ ܠܳܐ ܫܳܡܥܺܝܢ ܠܺܝ. ܐܰܝܟܰܢܳܐ ܢܶܫܡܥܰܢܝ ܦܶܪܥܽܘܢ. ܕܰܠܥܶܓ ܠܶܫܳܢܝ.

¹³ ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ ܘܥܰܡ ܐܰܗܪܽܘܢ. ܘܦܰܩܶܕ ܐܶܢܽܘܢ ܠܘܳܬ ܒܢܰܝ̈ ܝܺܣܪܳܐܶܝܠ ܘܰܠܘܳܬ ܦܶܪܥܽܘܢ ܡܰܠܟܳܐ ܕܡܶܨܪܶܝܢ. ܠܡܰܦܳܩܽܘ ܠܰܒܢܰܝ̈ ܝܺܣܪܳܐܶܝܠ ܡܶܢ ܐܰܪܥܳܐ ܕܡܶܨܪܶܝܢ.

¹⁴ ܘܗܳܠܶܝܢ ܖ̈ܺܝܫܶܐ ܕܒܶܝܬ ܐܰܒܳܗܰܝ̈ܗܽܘܢ. ܒܢܰܝ̈ ܪܽܘܒܺܝܠ ܒܽܘܟܪܶܗ ܕܺܝܣܪܳܐܶܝܠ. ܚܢܽܘܟ ܘܦܰܠܽܘ. ܘܚܶܨܪܽܘܢ ܘܟܰܪܡܺܝ. ܗܳܠܶܝܢ ܫܰܖ̈ܒܳܬܳܐ ܕܪܽܘܒܺܝܠ.

¹⁵ ܘܰܒܢܰܝ̈ ܫܶܡܥܽܘܢ. ܝܰܡܽܘܐܶܝܠ. ܘܝܰܡܺܝܢ. ܘܳܐܗܳܪ. ܘܝܰܟܺܝܢ. ܘܨܳܚܳܪ. ܘܫܳܐܘܳܠ ܒܰܪ ܟܢܰܥܢܳܝܬܳܐ. ܗܳܠܶܝܢ ܫܰܖ̈ܒܳܬܳܐ ܕܫܶܡܥܽܘܢ.

¹⁶ ܘܗܳܠܶܝܢ ܫܡܳܗ̈ܶܐ ܕܰܒܢܰܝ̈ ܠܶܘܺܝ ܠܫܰܖ̈ܒܳܬܗܽܘܢ ܓܰܪܫܽܘܢ ܘܩܳܗܳܬ ܘܰܡܪܳܪܺܝ. ܘܰܫܢܰܝ̈ܳܐ ܕܰܚܝܳܐ ܠܶܘܺܝ. ܡܳܐܐ ܘܰܬܠܳܬܺܝܢ ܘܰܫܒܰܥ ܫܢܺܝ̈ܢ.

¹⁷ ܘܰܒܢܰܘ̈ܗܝ ܕܓܰܪܫܽܘܢ. ܠܰܒܢܺܝ ܘܫܰܡܥܺܝ ܠܫܰܖ̈ܒܳܬܗܽܘܢ.

¹⁸ ܘܰܒܢܰܘ̈ܗܝ ܕܩܳܗܳܬ. ܥܰܡܪܰܡ ܘܝܰܨܗܳܪ. ܘܚܶܒܪܽܘܢ. ܘܥܽܘܙܺܝܠ. ܘܰܫܢܰܝ̈ܳܐ ܕܰܚܝܳܐ ܩܳܗܳܬ. ܡܳܐܐ ܘܰܬܠܳܬܺܝܢ ܘܰܬܠܳܬ ܫܢܺܝ̈ܢ.

¹⁹ ܘܰܒܢܰܘ̈ܗܝ ܕܰܡܪܳܪܺܝ. ܡܰܚܠܺܝ. ܘܡܽܘܫܺܝ. ܗܳܠܶܝܢ ܫܰܖ̈ܒܳܬܳܐ ܕܠܶܘ̈ܳܝܶܐ ܠܫܰܖ̈ܒܳܬܗܽܘܢ.

²⁰ ܘܰܢܣܰܒ ܥܰܡܪܰܡ ܐܰܢ̱ܬܬܳܐ ܠܝܽܘܟܳܒܰܪ ܒܰܪܬ ܕܳܕܶܗ. ܘܝܶܠܕܰܬ ܠܶܗ ܠܰܐܗܪܽܘܢ ܘܰܠܡܽܘܫܶܐ ܘܰܠܡܰܪܝܰܡ. ܘܰܫܢܰܝ̈ܳܐ ܕܰܚܝܳܐ ܥܰܡܪܰܡ ܡܳܐܐ ܘܰܬܠܳܬܺܝܢ ܘܰܫܒܰܥ ܫܢܺܝ̈ܢ.

²¹ ܘܰܒܢܰܘ̈ܗܝ ܕܝܰܨܗܳܪ. ܩܽܘܪܳܚ ܘܰܢܦܰܓ ܘܙܰܟܪܺܝ.

²² ܘܰܒܢܰܘ̈ܗܝ ܕܥܽܘܙܺܝܠ. ܡܰܢܫܳܐܶܝܠ ܘܰܐܠܺܝܨܦܰܢ. ܘܣܰܬܪܺܝ.

²³ ܘܰܢܣܰܒ ܐܰܗܪܽܘܢ ܠܶܐܠܺܝܫܒܰܥ ܒܰܪܬ ܥܰܡܺܝܢܳܕܳܒ ܚܳܬܶܗ ܕܢܶܚܫܽܘܢ ܐܰܢ̱ܬܬܳܐ. ܘܝܶܠܕܰܬ ܠܶܗ ܠܢܳܕܳܒ ܘܠܰܐܒܺܝܗܽܘ. ܘܠܶܐܠܺܝܥܳܙܳܪ ܘܠܺܐܝܬܳܡܳܪ.

²⁴ ܘܰܒܢܰܝ̈ ܩܽܘܪܳܚ. ܐܳܣܺܝܪ ܘܗܰܠܩܳܢܳܐ ܘܰܐܟܶܢܣܳܦ. ܗܳܠܶܝܢ ܫܰܖ̈ܒܳܬܳܐ ܕܩܽܘܪܳܚ.

²⁵ ܘܶܐܠܺܝܥܳܙܰܪ ܒܰܪ ܐܰܗܪܽܘܢ ܢܣܰܒ ܠܶܗ ܐܰܢ̱ܬܬܳܐ ܡܶܢ ܒܢ̈ܳܬܶܗ ܕܦܰܢܛܺܝܠ. ܘܝܶܠܕܰܬ ܠܶܗ ܠܦܺܝܢܚܶܣ. ܗܳܠܶܝܢ ܖ̈ܺܝܫܶܐ ܕܫܰܖ̈ܒܳܬܳܐ ܕܠܶܘ̈ܳܝܶܐ ܠܫܰܖ̈ܒܳܬܗܽܘܢ.

²⁶ ܗܳܢܰܘ ܡܽܘܫܶܐ ܘܰܐܗܪܽܘܢ ܕܶܐܡܰܪ ܠܗܽܘܢ ܡܳܪܝܳܐ. ܐܰܦܶܩܘ ܠܰܒܢܰܝ̈ ܝܺܣܪܳܐܶܝܠ ܡܶܢ ܐܰܪܥܳܐ ܕܡܶܨܪܶܝܢ ܟܽܠ ܚܰܝܠܰܘ̈ܳܬܗܽܘܢ.

²⁷ ܗܶܢܽܘܢ ܐܶܡܰܪܘ ܠܦܶܪܥܽܘܢ ܡܰܠܟܳܐ ܕܡܶܨܪܶܝܢ. ܠܡܰܦܳܩܽܘ ܠܰܒܢܰܝ̈ ܝܺܣܪܳܐܶܝܠ ܡܶܢ ܐܰܪܥܳܐ ܕܡܶܨܪܶܝܢ. ܡܽܘܫܶܐ ܘܰܐܗܪܽܘܢ.

²⁸ ܘܰܗܘܳܐ ܒܝܰܘܡܳܐ ܕܡܰܠܶܠ ܡܳܪܝܳܐ ܥܰܡ ܡܽܘܫܶܐ ܒܰܐܪܥܳܐ ܕܡܶܨܪܶܝܢ.

²⁹ ܡܰܠܶܠ ܡܳܪܝܳܐ ܥܰܡ ܡܽܘܫܶܐ ܘܶܐܡܰܪ ܠܶܗ. ܐܶܢܳܐ ܐ̱ܢܳܐ ܡܳܪܝܳܐ. ܐܶܡܰܪ ܠܦܶܪܥܽܘܢ ܡܰܠܟܳܐ ܕܡܶܨܪܶܝܢ. ܟܽܠ ܡܶܕܶܡ ܕܳܐܡܰܪ ܐ̱ܢܳܐ ܠܳܟ.

³⁰ ܘܶܐܡܰܪ ܡܽܘܫܶܐ ܠܡܳܪܝܳܐ. ܕܺܝܠܝ ܠܥܶܓ ܠܶܫܳܢܝ. ܐܰܝܟܰܢܳܐ ܢܶܫܡܥܰܢܝ ܦܶܪܥܽܘܢ.