Esodo ܡܦܩܢܐ 31

¹ ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ ܘܶܐܡܰܪ ܠܶܗ.

² ܚܙܺܝ ܕܰܩܪܺܝܬ ܒܫܶܡ ܠܒܰܨܠܺܝܐܶܝܠ ܒܰܪ ܐܽܘܪܺܝ. ܒܰܪ ܚܽܘܪ. ܡܶܢ ܫܰܒܛܳܐ ܕܺܝܗܽܘܕܳܐ.

³ ܘܰܡܠܺܝܬܶܗ ܪܽܘܚܳܐ ܕܰܐ‌ܠܳܗܳܐ. ܒܚܶܟܡܬܳܐ. ܘܰܒܒܽܘܝܳܢܳܐ. ܘܒܺܝܕܰܥܬܳܐ. ܘܰܒܟܽܠ ܥܒܳܕ.

⁴ ܠܡܰܠܳܦܽܘ ܐܽܘܡܳܢܽܘܬܳܐ. ܠܡܶܥܒܰܕ ܒܕܰܗܒܳܐ. ܘܰܒܣܺܐܡܳܐ ܒܰܢܚܳܫܳܐ.

⁵ ܘܒܽܐܘܡܳܢܽܘܬܳܐ ܕܟܺܐܦ̈ܶܐ ܠܰܡܫܰܠܳܡܽܘ. ܘܰܒܢܰܓܳܪܽܘܬܳܐ ܕܩܰܝ̈ܣܶܐ. ܠܡܶܥܒܰܕ ܟܽܠ ܥܒܳܕ.

⁶ ܘܶܐܢܳܐ ܗܳܐ ܝܶܗܒܶܬ ܥܰܡܶܗ. ܠܶܐܠܺܝܗܰܒ ܒܰܪ ܐܰܚܺܝܣܡܳܟ ܡܶܢ ܫܰܒܛܳܐ ܕܕܳܢ. ܘܰܒܠܶܒܳܐ ܕܟܽܠ ܚܰܟܺܝ̈ܡܰܝ ܠܶܒܳܐ ܝܶܗܒܶܬ ܚܶܟܡܬܳܐ. ܘܢܶܥܒܕܽܘܢ ܟܽܠ ܡܶܕܶܡ ܕܦܰܩܶܕܬܳܟ.

⁷ ܡܰܫܟܰܢ ܙܰܒܢܳܐ. ܘܩܺܒܽܘܬܳܐ ܕܣܳܗܕܽܘܬܳܐ. ܘܚܽܘܣܳܝܳܐ ܕܰܥܠܶܝܗ̇. ܘܟܽܠ ܡܳܐܢܰܝ̈ ܡܰܫܟܢܳܐ.

⁸ ܘܦܳܬܽܘܪܳܐ ܘܟܽܠ ܡܳܐܢܰܘ̈ܗܝ. ܘܰܡܢܳܪܬܳܐ ܕܟܺܝܬܳܐ. ܘܟܽܠܗܽܘܢ ܡܳܐܢܶܝ̈ܗ̇. ܘܡܰܕܒܚܳܐ ܕܥܶܛܪܳܐ.

⁹ ܡܰܕܒܚܳܐ ܕܰܥܠܳܬܳܐ ܘܟܽܠ ܡܳܐܢܰܘ̈ܗܝ. ܘܠܰܩܢܳܐ ܘܟܰܢܳܐ.

¹⁰ ܘܰܠܒܽܘ̈ܫܰܝ ܬܶܫܡܶܫܬܳܐ. ܘܰܠܒܽܘ̈ܫܰܝ ܩܽܘܕܫܳܐ ܠܰܐܗܪܽܘܢ ܟܳܗܢܳܐ. ܘܰܠܒܽܘ̈ܫܶܐ ܠܰܒܢܰܘ̈ܗܝ. ܠܰܡܟܰܗܳܢܽܘ ܠܺܝ.

¹¹ ܘܡܶܫܚܳܐ ܕܰܡܫܺܝܚܽܘܬܳܐ. ܘܥܶܛܪܳܐ ܕܒܶܣ̈ܡܶܐ ܠܩܽܘܕܫܳܐ ܟܽܠ ܡܶܕܶܡ ܕܦܰܩܶܕܬܳܟ ܢܶܥܒܕܽܘܢ.

¹² ܘܶܐܡܰܪ ܡܳܪܝܳܐ ܠܡܽܘܫܶܐ.

¹³ ܐܰܢ̱ܬ ܐܶܡܰܪ ܠܰܒܢܰܝ̈ ܝܺܣܪܳܐܶܝܠ. ܫܰܒ̈ܶܐ ܗܘܰܝܬܽܘܢ ܢܳܛܪܺܝܢ. ܡܶܛܽܠ ܕܳܐܬܳܐ ܗ̱ܝ ܒܰܝ̈ܢܰܝ ܘܰܠܟܽܘܢ ܠܕܳܖ̈ܰܝܟܽܘܢ. ܕܬܶܕܥܽܘܢ ܕܶܐܢܳܐ ܐ̱ܢܳܐ ܡܳܪܝܳܐ ܐܰܠܳܗܟܽܘܢ ܕܰܡܩܰܕܶܫ ܐ̱ܢܳܐ ܠܟܽܘܢ.

¹⁴ ܛܰܪܘ ܫܰܒܬܳܐ. ܡܶܛܽܠ ܕܩܽܘܕܫܳܐ ܗ̱ܝ ܠܟܽܘܢ. ܟܽܠܡܰܢ ܕܢܰܚܠܺܝܗ̇. ܡܶܬܩܛܳܠܽܘ ܢܶܬܩܛܶܠ. ܘܟܽܠ ܡܰܢ ܕܢܶܥܒܶܕ ܒܳܗ̇ ܥܒܳܕܳܐ. ܢܺܐܒܰܕ ܐ̱ܢܳܫܳܐ ܗܰܘ ܡܶܢ ܥܰܡܶܗ.

¹⁵ ܫܬܳܐ ܝܰܘܡܺܝ̈ܢ ܬܶܥܒܕܽܘܢ ܥܒܳܕܳܐ. ܘܰܒܝܰܘܡܳܐ ܫܒܺܝܥܳܝܳܐ ܫܰܒܬܳܐ ܢܝܳܚܳܐ. ܩܽܘܕܫܳܐ ܗ̱ܝ ܠܡܳܪܝܳܐ. ܟܽܠ ܡܰܢ ܕܢܶܥܒܶܕ ܥܒܳܕܳܐ ܒܝܰܘܡܳܐ ܕܫܰܒܬܳܐ. ܡܶܬܩܛܳܠܽܘ ܢܶܬܩܛܶܠ.

¹⁶ ܘܢܶܛܪܽܘܢ ܒܢܰܝ̈ ܝܺܣܪܳܐܶܝܠ ܫܰܒܬܳܐ ܠܡܳܪܝܳܐ. ܠܡܶܥܒܰܕ ܫܰܒܬܳܐ ܠܕܳܖ̈ܰܝܗܽܘܢ ܩܝܳܡܳܐ ܕܰܠܥܳܠܰܡ.

¹⁷ ܒܰܝ̈ܢܰܝ ܠܰܕܒܶܝܬ ܝܺܣܪܳܐܶܝܠ ܐܳܬܳܐ ܗ̱ܝ ܠܥܳܠܰܡ. ܡܶܛܽܠ ܕܠܶܫܬܳܐ ܝܰܘܡܺܝ̈ܢ ܥܒܰܕ ܡܳܪܝܳܐ ܫܡܰܝܳܐ ܘܰܐܪܥܳܐ. ܘܝܰܡ̈ܡܶܐ ܘܟܽܠ ܕܺܐܝܬ ܒܗܽܘܢ. ܘܰܒܝܰܘܡܳܐ ܫܒܺܝܥܳܝܳܐ ܫܠܺܝ ܘܶܐܬܬܢܺܝܚ.

¹⁸ ܘܝܰܗܒ ܠܡܽܘܫܶܐ ܟܰܕ ܫܰܠܶܡ ܠܰܡܡܰܠܳܠܽܘ ܥܰܡܶܗ ܒܛܽܘܪܳܐ ܕܣܺܝܢܰܝ. ܬܰܪܬܶܝܢ ܠܽܘܚ̈ܶܐ ܕܣܳܗܕܽܘܬܳܐ. ܠܽܘܚ̈ܶܐ ܕܟܺܐܦܳܐ. ܕܰܟܬܺܝ̈ܒܳܢ ܒܨܶܒܥܶܗ ܕܰܐ‌ܠܳܗܳܐ.