Esodo ܡܦܩܢܐ 28

¹ ܘܰܐܢ̱ܬ ܩܰܪܶܒ ܠܳܟ ܠܰܐܗܪܽܘܢ ܐܰܚܽܘܟ. ܘܠܰܒܢܰܘ̈ܗܝ ܥܰܡܶܗ ܡܶܢ ܓܰܘ ܒܢܰܝ̈ ܝܺܣܪܳܐܶܝܠ ܠܰܡܟܰܗܳܢܽܘ ܠܺܝ. ܐܰܗܪܽܘܢ. ܘܢܳܕܳܒ. ܘܰܐܒܺܝܗܽܘ. ܘܶܐܠܺܝܥܳܙܰܪ. ܘܺܐܝܬܳܡܳܪ. ܒܢܰܝ̈ ܐܰܗܪܽܘܢ.

² ܘܰܥܒܶܕ ܠܒܽܘ̈ܫܰܝ ܩܽܘܕܫܳܐ ܠܰܐܗܪܽܘܢ ܐܰܚܽܘܟ. ܠܺܐܝܩܳܪܳܐ ܘܰܠܬܶܫܒܽܘܚܬܳܐ.

³ ܘܰܐܢ̱ܬ ܐܶܡܰܪ ܠܟܽܠܗܽܘܢ ܚܰܟܺܝ̈ܡܰܝ ܠܶܒܳܐ. ܕܰܡܠܺܝܬ ܐܶܢܽܘܢ ܪܽܘܚܳܐ ܕܚܶܟܡܬܳܐ. ܘܢܶܥܒܕܽܘܢ ܠܒܽܘ̈ܫܰܝ ܩܽܘܕܫܳܐ ܠܰܐܗܪܽܘܢ ܠܰܡܩܰܕܳܫܽܘܬܶܗ. ܠܰܡܟܰܗܳܢܽܘ ܠܺܝ.

⁴ ܘܗܳܠܶܝܢ ܠܒܽܘ̈ܫܶܐ ܕܢܶܥܒܕܽܘܢ ܠܗܽܘܢ. ܦܪܳܙܽܘܡܳܐ. ܘܦܶܕܬܳܐ. ܘܰܦܪܺܝܣܳܐ. ܘܟܽܘܬܺܝܢܳܐ ܕܒܽܘܨܳܐ. ܘܡܰܨܢܰܦܬܳܐ. ܘܗܶܡܝܳܢܳܐ. ܘܢܶܥܒܕܽܘܢ ܠܒܽܘ̈ܫܰܝ ܩܽܘܕܫܳܐ ܠܰܐܗܪܽܘܢ ܐܰܚܽܘܟ. ܘܠܰܒܢܰܘ̈ܗܝ. ܠܰܡܟܰܗܳܢܽܘ ܠܺܝ.

⁵ ܘܗܶܢܽܘܢ ܢܶܣܒܽܘܢ ܕܰܗܒܳܐ. ܘܬܶܟܠܬܳܐ. ܘܰܐܪܓܘܳܢܳܐ. ܘܨܽܘܒܥܳܐ ܕܰܙܚܽܘܪܺܝܬܳܐ. ܘܒܽܘܨܳܐ ܥܙܺܝܠܳܐ.

⁶ ܘܢܶܥܒܕܽܘܢ ܦܶܕܬܳܐ ܕܕܰܗܒܳܐ. ܬܶܟܠܬܳܐ. ܘܰܐܪܓܘܳܢܳܐ. ܘܨܽܘܒܥܳܐ ܕܰܙܚܽܘܪܺܝܬܳܐ. ܘܒܽܘܨܳܐ ܥܙܺܝܠܳܐ. ܥܒܳܕܳܐ ܕܽܐܘܡܳܢܳܐ.

⁷ ܬܰܪܬܶܝܢ ܟܰܬܦ̈ܳܢ ܢܶܗܘ̈ܝܳܢ ܡܕܰܒ̈ܩܰܢ ܠܳܗ̇. ܥܰܠ ܬܪܶܝܢ ܣܶܛܖ̈ܶܝܗ̇. ܘܢܶܕܒܰܩ.

⁸ ܗܶܡܝܳܢܳܐ ܕܦܶܕܬܳܐ ܕܰܥܠܶܝܗ̇. ܡܶܢܳܗ̇ ܢܶܗܘܶܐ ܐܰܝܟ ܥܒܳܕܳܗ̇. ܕܰܗܒܳܐ. ܘܬܶܟܠܬܳܐ. ܘܰܐܪܓܘܳܢܳܐ. ܘܨܽܘܒܥܳܐ ܕܰܙܚܽܘܪܺܝܬܳܐ. ܘܒܽܘܨܳܐ ܥܙܺܝܠܳܐ.

⁹ ܘܣܰܒ ܬܰܪܬܶܝܢ ܟܺܐܦ̈ܶܐ ܕܒܶܪܽܘܠܳܐ. ܘܰܓܠܽܘܦ ܥܠܰܝܗܶܝܢ ܫܡܳܗ̈ܶܐ ܕܰܒܢܰܝ̈ ܝܺܣܪܳܐܶܝܠ.

¹⁰ ܫܬܳܐ ܡܶܢ ܫܡܳܗܰܝ̈ܗܽܘܢ ܓܠܽܘܦ ܥܰܠ ܟܺܐܦܳܐ ܚܕܳܐ. ܘܶܫܬܳܐ ܫܡܳܗ̈ܶܐ ܕܶܐܫܬܚܰܪܘ ܓܠܽܘܦ ܥܰܠ ܟܺܐܦܳܐ ܐ̱ܚܪܺܬܳܐ. ܐܰܝܟ ܬܰܘܠ̈ܕܳܬܗܽܘܢ.

¹¹ ܥܒܳܕܳܐ ܕܽܐܘܡܳܢܳܐ ܟܺܐܦ̈ܶܐ ܓܠܺܝ̈ܦܳܬܳܐ. ܓܠܳܦܳܐ ܕܚܳܬܡܳܐ. ܓܠܽܘܦ ܬܰܪܬܶܝܢ ܟܺܐܦ̈ܶܐ ܥܰܠ ܫܡܳܗ̈ܶܐ ܕܰܒܢܰܝ̈ ܝܺܣܪܳܐܶܝܠ. ܘܡܰܘܚ̈ܕܳܢ ܘܡܰܫܖ̈ܳܢ ܒܕܰܗܒܳܐ ܥܒܶܕ ܐܶܢܶܝܢ.

¹² ܘܣܺܝܡ ܬܰܪܬܶܝܢ ܟܺܐܦ̈ܶܐ ܥܰܠ ܟܰܬܦ̈ܳܬܳܗ̇ ܕܦܶܕܬܳܐ. ܟܺܐܦ̈ܶܐ ܕܕܽܘܟܪܳܢܳܐ ܠܰܒܢܰܝ̈ ܝܺܣܪܳܐܶܝܠ. ܘܢܶܗܘܶܐ ܫܳܩܶܠ ܐܰܗܪܽܘܢ ܫܡܳܗܰܝ̈ܗܽܘܢ ܩܕܳܡ ܡܳܪܝܳܐ. ܥܰܠ ܬܰܪܬܶܝܢ ܟܰܬܦ̈ܳܬܶܗ ܠܕܽܘܟܪܳܢܳܐ.

¹³ ܘܰܥܒܶܕ ܡܰܘܚ̈ܕܳܬܳܐ ܕܕܰܗܒܳܐ.

¹⁴ ܘܬܰܪܬܶܝܢ ܫܺܫ̈ܠܳܬܳܐ ܕܕܰܗܒܳܐ ܕܰܟܝܳܐ. ܡܰܬܶܐܡ̈ܳܬܳܐ ܥܒܶܕ ܐܶܢܶܝܢ ܥܒܳܕܳܐ ܓܕܺܝܠܳܐ. ܘܣܺܝܡ ܬܰܪܬܶܝܢ ܫܺܫ̈ܠܳܬܳܐ ܡܰܐܬܶܡ̈ܳܬܳܐ ܥܰܠ ܡܰܘܚ̈ܕܳܬܳܐ.

¹⁵ ܘܰܥܒܶܕ ܦܪܺܝܣܳܐ ܕܕܺܝܢܳܐ ܥܒܳܕܳܐ ܕܽܐܘܡܳܢܳܐ. ܐܰܝܟ ܥܒܳܕܳܐ ܕܦܶܕܬܳܐ ܥܒܶܕܳܝܗܝ. ܕܰܗܒܳܐ. ܘܬܶܟܠܬܳܐ. ܘܰܐܪܓܘܳܢܳܐ. ܘܨܽܘܒܥܳܐ ܕܰܙܚܽܘܪܺܝܬܳܐ. ܘܒܽܘܨܳܐ ܥܙܺܝܠܳܐ ܥܒܶܕܳܝܗܝ.

¹⁶ ܡܪܰܒܥ ܢܶܗܘܶܐ ܟܰܕ ܐܰܥܺܝܦ. ܙܪܶܬ ܐܽܘܪܟܶܗ. ܘܰܙܪܶܬ ܦܬܳܝܶܗ.

¹⁷ ܘܬܶܫܠܰܡ ܒܶܗ ܫܰܠܡܽܘܬܳܐ ܕܟܺܐܦ̈ܶܐ. ܐܰܪܒܥܳܐ ܣܶܕܖ̈ܺܝܢ ܕܟܺܐܦ̈ܶܐ. ܣܶܕܪܳܐ ܩܰܕܡܳܝܳܐ ܣܽܘܡܳܩܳܐ. ܘܙܳܪܓܳܐ. ܘܒܳܪܩܳܐ. ܣܶܕܪܳܐ ܚܰܕ.

¹⁸ ܘܣܶܕܪܳܐ ܐ̱ܚܪܺܢܳܐ. ܨܕܺܝܕܳܐ. ܘܣܰܦܺܝܠܳܐ. ܘܢܶܩܥܬܳܐ.

¹⁹ ܘܣܶܕܪܳܐ ܬܠܺܝܬܳܝܳܐ ܩܳܢܟܶܢܽܘܢ. ܘܩܰܪܟܶܕܢܳܐ. ܘܥܺܝܢ ܥܶܓܠܳܐ.

²⁰ ܘܣܶܕܪܳܐ ܪܒܺܝܥܳܝܳܐ ܬܰܪܫܺܝܫ. ܘܒܶܪܽܘܠܳܐ. ܘܝܰܫܦܶܗ. ܡܰܘܚ̈ܕܳܢ ܘܡܰܫܖ̈ܳܢ ܒܕܰܗܒܳܐ ܥܒܶܕ ܐܶܢܶܝܢ. ܢܶܗܘ̈ܝܳܢ ܒܫܰܠܡܽܘܬܗܶܝܢ.

²¹ ܘܟܺܐܦ̈ܶܐ ܢܶܗܘ̈ܝܳܢ ܥܰܠ ܫܡܳܗ̈ܶܐ ܕܰܒܢܰܝ̈ ܝܺܣܪܳܐܶܝܠ. ܬܰܪܬܰܥܶܣܖ̈ܶܐ ܥܰܠ ܫܡܳܗܰܝ̈ܗܽܘܢ. ܓܠܺܝ̈ܦܳܢ ܓܠܳܦܳܐ ܕܚܳܬܡܳܐ.

²² ܓܒܰܪ ܥܰܠ ܫܡܶܗ ܢܶܗܘ̈ܝܳܢ ܠܰܬܪܶܥܣܰܪ ܫܰܒܛܺܝ̈ܢ. ܘܰܥܒܶܕ ܥܰܠ ܦܪܺܝܣܳܐ ܫܺܫ̈ܠܳܬܳܐ ܡܰܐܬܶܡ̈ܳܬܳܐ ܥܒܳܕܳܐ ܓܕܺܝܠܳܐ ܕܕܰܗܒܳܐ ܕܰܟܝܳܐ.

²³ ܘܰܥܒܶܕ ܠܚܽܘܣܳܝܳܐ ܬܪܶܝܢ ܩܽܘܖ̈ܩܣܶܐ ܕܕܰܗܒܳܐ ܕܰܟܝܳܐ. ܘܗܰܒ ܬܪܶܝܢ ܩܽܘܖ̈ܩܣܺܝܢ ܥܰܠ ܬܪܶܝܢ ܣܶܛܖ̈ܰܘܗܝ ܕܚܽܘܣܳܝܳܐ.

²⁴ ܘܗܰܒ ܬܰܪܬܶܝܢ ܓܕܺܝ̈ܠܳܬܳܐ ܕܕܰܗܒܳܐ. ܥܰܠ ܬܪܶܝܢ ܩܽܘܖ̈ܩܣܺܝܢ. ܕܥܰܠ ܬܪܶܝܢ ܣܶܛܖ̈ܰܘܗܝ ܕܚܽܘܣܳܝܳܐ.

²⁵ ܘܬܰܪܬܶܝܢ ܓܕܺܝ̈ܠܳܬܳܐ ܬܶܬܶܠ ܥܰܠ ܬܰܪܬܶܝܢ ܡܰܘܚ̈ܕܳܬܳܐ ܘܬܶܬܶܠ ܥܰܠ ܟܰܬܦ̈ܳܬܳܗ̇ ܕܦܶܕܬܳܐ ܠܽܘܩܒܰܠ ܐܰܦܶܝ̈ܗ̇.

²⁶ ܘܰܥܒܶܕ ܬܪܶܝܢ ܩܽܘܖ̈ܩܣܶܐ ܕܕܰܗܒܳܐ. ܘܣܺܝܡ ܐܶܢܽܘܢ ܥܰܠ ܬܪܶܝܢ ܣܶܛܖ̈ܰܘܗܝ ܕܚܽܘܣܳܝܳܐ. ܥܰܠ ܣܶܛܪܳܐ ܕܥܰܠ ܣܶܦܬܳܗ̇ ܕܦܶܕܬܳܐ ܡܶܢ ܠܓܰܘ.

²⁷ ܘܰܥܒܶܕ ܬܪܶܝܢ ܩܽܘܖ̈ܩܣܶܐ ܕܕܰܗܒܳܐ. ܘܣܺܝܡ ܐܶܢܽܘܢ ܥܰܠ ܬܰܪܬܶܝܢ ܟܰܬܦ̈ܳܬܳܗ̇ ܕܦܶܕܬܳܐ ܡܶܢ ܠܬܰܚܬ. ܡܶܢ ܠܽܘܩܒܰܠ ܐܰܦܶܝ̈ܗ̇. ܠܽܘܩܒܰܠ ܕܶܒܩܳܗ̇ ܠܥܶܠ ܡܶܢ ܗܶܡܝܳܢܳܐ ܕܦܶܕܬܳܐ.

²⁸ ܘܰܢܕܰܒܩܽܘܢܶܗ ܠܰܦܪܺܝܣܳܐ ܡܶܢ ܙܰܩܙ̈ܩܳܬܶܗ ܠܙܰܩܙ̈ܩܳܬܳܗ̇ ܕܦܶܕܬܳܐ ܒܚܽܘܛܳܐ ܕܬܶܟܠܬܳܐ. ܠܡܶܗܘܳܐ ܥܰܠ ܗܶܡܝܳܢܳܐ ܕܦܶܕܬܳܐ. ܕܠܳܐ ܢܶܗܘܶܐ ܥܳܒܰܪ ܥܰܠ ܦܪܺܝܣܳܐ ܡܶܢ ܦܶܕܬܳܐ.

²⁹ ܘܢܶܗܘܶܐ ܫܳܩܶܠ ܐܰܗܪܽܘܢ ܫܡܳܗ̈ܶܐ ܕܰܒܢܰܝ̈ ܝܺܣܪܳܐܶܝܠ ܒܰܦܪܺܝܣܳܐ ܕܕܺܝܢܳܐ ܥܰܠ ܚܰܕܝܶܗ ܡܳܐ ܕܥܳܐܶܠ ܠܩܽܘܕܫܳܐ. ܕܽܘܟܪܳܢܳܐ ܩܕܳܡ ܡܳܪܝܳܐ ܐܰܡܺܝܢܳܐܺܝܬ.

³⁰ ܘܣܺܝܡ ܥܰܠ ܦܪܺܝܣܳܐ ܕܕܺܝܢܳܐ ܢܰܗܺܝܪܳܐ ܘܫܰܠܡܳܐ. ܘܢܶܗܘܽܘܢ ܥܰܠ ܚܰܕܝܶܗ ܡܳܐ ܕܥܳܐܶܠ ܩܕܳܡ ܡܳܪܝܳܐ. ܘܢܶܫܩܽܘܠ ܐܰܗܪܽܘܢ ܕܺܝܢ̈ܶܐ ܕܰܒܢܰܝ̈ ܝܺܣܪܳܐܶܝܠ ܥܰܠ ܚܰܕܝܶܗ. ܩܕܳܡ ܡܳܪܝܳܐ ܐܰܡܺܝܢܳܐܺܝܬ.

³¹ ܘܰܥܒܶܕ ܦܪܳܙܽܘܡܳܐ ܕܦܶܕܬܳܐ ܓܡܺܝܪܳܐ ܕܬܶܟܠܬܳܐ.

³² ܘܢܶܗܘܶܐ ܦܽܘܡܶܗ ܕܪܺܝܫܶܗ ܒܓܰܘܶܗ. ܘܣܶܦܬܳܐ ܬܶܗܘܶܐ ܠܦܽܘܡܶܗ ܟܰܕ ܚܳܕܰܪ. ܥܒܳܕܳܐ ܙܩܺܝܪܳܐ. ܐܰܝܟ ܦܽܘܡ ܣܺܝܪܶܣ ܢܶܗܘܶܐ ܠܶܗ ܕܠܳܐ ܢܶܨܛܪܶܐ.

³³ ܘܰܥܒܶܕ ܥܰܠ ܫܦܽܘܠܰܘ̈ܗܝ ܖ̈ܽܘܡܳܢ̈ܶܐ ܕܬܶܟܠܬܳܐ. ܘܕܰܐܪܓܘܳܢܳܐ. ܘܨܽܘܒܥܳܐ ܕܰܙܚܽܘܪܺܝܬܳܐ. ܥܰܠ ܫܦܽܘܠܰܘ̈ܗܝ ܟܰܕ ܚܳܕܰܪ. ܘܙܰܓ̈ܶܐ ܕܕܰܗܒܳܐ ܒܰܝܢܳܬܗܽܘܢ ܟܰܕ ܚܳܕܰܪ.

³⁴ ܘܙܰܓܳܐ ܙܰܓܳܐ ܕܕܰܗܒܳܐ. ܘܖ̈ܽܘܡܳܢܶܐ ܥܰܠ ܫܦܽܘܠܰܘ̈ܗܝ ܕܰܦܪܳܙܽܘܡܳܐ ܟܰܕ ܚܳܕܰܪ.

³⁵ ܘܢܶܗܘܶܐ ܥܰܠ ܐܰܗܪܽܘܢ ܠܬܶܫܡܶܫܬܳܐ. ܘܢܶܫܬܡܰܥ ܩܳܠܶܗ ܡܳܐ ܕܥܳܐܶܠ ܠܩܽܘܕܫܳܐ ܩܕܳܡ ܡܳܪܝܳܐ. ܘܡܳܐ ܕܢܳܦܶܩ. ܕܠܳܐ ܢܡܽܘܬ.

³⁶ ܘܰܥܒܶܕ ܟܠܺܝܠܳܐ ܕܕܰܗܒܳܐ ܕܰܟܝܳܐ. ܘܰܓܠܽܘܦ ܥܠܰܘܗ̱ܝ ܓܠܳܦܳܐ ܕܚܳܬܡܳܐ. ܩܽܘܕܫܳܐ ܠܡܳܪܝܳܐ.

³⁷ ܘܣܺܝܡܳܝܗܝ ܥܰܠ ܚܽܘܛܳܐ ܕܬܶܟܠܬܳܐ. ܘܢܶܗܘܶܐ ܥܰܠ ܡܰܨܢܰܦܬܳܐ. ܘܠܽܘܩܒܰܠ ܐܰܦܰܝ̈ ܡܰܨܢܰܦܬܳܐ ܢܶܗܘܶܐ.

³⁸ ܘܢܶܗܘܶܐ ܥܰܠ ܒܶܝܬ ܥܰܝܢܰܘ̈ܗܝ ܕܰܐܗܪܽܘܢ. ܘܢܶܗܘܶܐ ܫܳܩܶܠ ܐܰܗܪܽܘܢ ܚܛܳܗ̈ܶܐ ܕܩܽܘ̈ܕܫܶܐ ܕܰܡܩܰܕܫܺܝܢ ܒܢܰܝ̈ ܝܺܣܪܳܐܶܝܠ. ܠܟܽܠ ܡܰܘܗܒܰܬ ܩܽܘܕܫܰܝ̈ܗܽܘܢ. ܘܢܶܗܘܶܐ ܥܰܠ ܒܶܝܬ ܥܰܝܢܰܘ̈ܗܝ ܐܰܡܺܝܢܳܐܺܝܬ. ܠܨܶܒܝܳܢܳܐ ܠܗܽܘܢ ܩܕܳܡ ܡܳܪܝܳܐ.

³⁹ ܘܰܥܒܶܕ ܟܽܘܬܺܝܢܳܐ ܕܒܽܘܨܳܐ. ܘܰܥܒܶܕ ܡܰܨܢܰܦܬܳܐ ܕܒܽܘܨܳܐ. ܘܗܶܡܝܳܢܳܐ ܥܒܶܕ ܥܒܳܕܳܐ ܕܨܰܝܳܪܳܐ.

⁴⁰ ܘܠܰܒܢܰܝ̈ ܐܰܗܪܽܘܢ ܥܒܶܕ ܟܽܘܬܺܝ̈ܢܝܳܬܳܐ. ܘܰܥܒܶܕ ܠܗܽܘܢ ܗܶܡܝܳܢ̈ܶܐ. ܘܟܰܠܘ̈ܶܐ ܬܶܥܒܶܕ ܠܗܽܘܢ ܠܺܐܝܩܳܪܳܐ ܘܰܠܫܽܘܒܚܳܐ.

⁴¹ ܘܰܐܠܒܶܫ ܐܶܢܽܘܢ ܠܰܐܗܪܽܘܢ ܐܰܚܽܘܟ. ܘܠܰܒܢܰܘ̈ܗܝ ܥܰܡܶܗ. ܘܰܡܫܽܘܚ ܐܶܢܽܘܢ ܘܫܰܡܠܳܐ ܐܺܝܕܰܝ̈ܗܽܘܢ. ܘܩܰܕܶܫ ܐܶܢܽܘܢ ܠܺܝ ܘܰܢܟܰܗܢܽܘܢ ܠܺܝ.

⁴² ܘܰܥܒܶܕ ܠܗܽܘܢ ܦܖ̈ܳܙܽܘܡܶܐ ܕܒܽܘܨܳܐ. ܠܰܡܟܰܣܳܝܽܘ ܒܶܣܪܳܐ ܕܥܰܪܛܶܠܳܝܽܘܬܳܐ. ܡܶܢ ܚܰܨܰܝ̈ܗܽܘܢ ܘܰܥܕܰܡܳܐ ܠܥܰܛ̈ܡܳܬܗܽܘܢ ܢܶܗܘܽܘܢ.

⁴³ ܘܢܶܗܘܽܘܢ ܥܰܠ ܐܰܗܪܽܘܢ ܘܥܰܠ ܒܢܰܘ̈ܗܝ ܡܳܐ ܕܥܳܐܠܺܝܢ ܠܡܰܫܟܰܢ ܙܰܒܢܳܐ. ܘܡܳܐ ܕܩܳܪܒܺܝܢ ܠܡܰܕܒܚܳܐ ܠܰܡܫܰܡܳܫܽܘ ܒܩܽܘܕܫܳܐ. ܕܠܳܐ ܢܩܰܒܠܽܘܢ ܚܛܳܗܳܐ ܘܰܢܡܽܘܬܽܘܢ. ܢܳܡܽܘܣܳܐ ܠܥܳܠܰܡ ܠܶܗ ܘܰܠܙܰܪܥܶܗ ܡܶܢ ܒܳܬܪܶܗ.