Esodo ܡܦܩܢܐ 33

¹ ܘܶܐܡܰܪ ܡܳܪܝܳܐ ܠܡܽܘܫܶܐ. ܣܰܩ ܙܶܠ ܡܶܟܳܐ. ܐܰܢ̱ܬ ܘܥܰܡܳܟ ܕܰܐܦܶܩܬ ܡܶܢ ܡܶܨܪܶܝܢ. ܠܰܐܪܥܳܐ ܕܺܝܡܺܝܬ ܠܰܐܒܪܳܗܳܡ. ܘܠܺܐܝܣܚܳܩ. ܘܰܠܝܰܥܩܽܘܒ. ܘܶܐܡܪܶܬ ܠܗܽܘܢ ܕܰܠܙܰܪܥܳܟ ܐܶܬܠܺܝܗ̇.

² ܘܶܐܫܰܕܰܪ ܩܕܳܡܰܝܟ ܡܰܠܰܐܟܳܐ. ܘܢܶܚܪܽܘܒ ܠܰܟܢܰܥܢܳܝ̈ܶܐ. ܘܠܳܐܡܽܘܖ̈ܳܝܶܐ. ܘܰܠܚܺܝܬܳܝ̈ܶܐ. ܘܰܠܦܰܖ̈ܙܳܝܶܐ. ܘܰܠܚܳܘܳܝ̈ܶܐ. ܘܰܠܝܳܒܽܘܣܳܝ̈ܶܐ.

³ ܠܰܐܪܥܳܐ ܕܡܰܪܕܝܳܐ ܚܰܠܒܳܐ ܘܕܶܒܫܳܐ. ܡܶܛܽܠ ܕܠܳܐ ܣܳܠܶܩ ܐ̱ܢܳܐ ܒܰܝܢܳܬܟܽܘܢ. ܡܶܛܽܠ ܕܥܰܡܳܐ ܐܰܢ̱ܬܽܘܢ ܩܫܶܐ ܩܕܳܠܳܐ. ܕܰܠܡܳܐ ܐܰܘܒܕܟܽܘܢ ܒܽܐܘܪܚܳܐ.

⁴ ܘܰܫܡܰܥܘ ܥܰܡܳܐ ܦܶܬܓܳܡܳܐ ܗܳܢܳܐ ܒܺܝܫܳܐ. ܘܟܶܪܝܰܬ ܠܗܽܘܢ. ܘܠܳܐ ܫܩܰܠܘ ܓܒܰܪ ܙܰܝܢܶܗ ܥܠܰܘܗ̱ܝ.

⁵ ܘܶܐܡܰܪ ܡܳܪܝܳܐ ܠܡܽܘܫܶܐ. ܐܶܡܰܪ ܠܰܕܒܶܝܬ ܝܺܣܪܳܐܶܝܠ. ܐܰܢ̱ܬܽܘܢ ܥܰܡܳܐ ܐܰܢ̱ܬܽܘܢ ܩܫܶܐ ܩܕܳܠܳܐ. ܫܳܥܬܳܐ ܚܕܳܐ ܐܶܣܰܩ ܒܰܝܢܳܬܟܽܘܢ. ܘܰܐܘܒܶܕܟܽܘܢ. ܗܳܫܳܐ ܐܰܥܒܰܪ ܙܰܝܢܟܽܘܢ ܡܶܢܟܽܘܢ. ܘܶܐܕܰܥ ܡܳܢܳܐ ܐܶܥܒܶܕ ܠܟܽܘܢ.

⁶ ܘܰܫܩܰܠܘ ܒܢܰܝ̈ ܝܺܣܪܳܐܶܝܠ ܙܰܝܢܗܽܘܢ ܡܶܢܗܽܘܢ. ܡܶܢ ܛܽܘܪܳܐ ܕܚܽܘܪܺܝܒ.

⁷ ܘܡܽܘܫܶܐ ܢܣܰܒ ܡܰܫܟܢܶܗ. ܘܢܰܩܫܶܗ ܠܶܗ ܠܒܰܪ ܡܶܢ ܡܰܫܪܺܝܬܳܐ. ܐܰܪܚܩܶܗ ܡܶܢ ܡܰܫܪܺܝܬܳܐ. ܘܰܩܪܳܝܗܝ ܡܰܫܟܰܢ ܙܰܒܢܳܐ. ܘܟܽܠ ܡܰܢ ܕܫܳܐܶܠ ܗܘܳܐ ܡܶܢ ܡܳܪܝܳܐ. ܢܳܦܶܩ ܠܡܰܫܟܰܢܙܰܒܢܳܐ. ܠܒܰܪ ܡܶܢ ܡܰܫܪܺܝܬܳܐ.

⁸ ܘܡܳܐ ܕܢܳܦܶܩ ܡܽܘܫܶܐ ܠܡܰܫܟܢܳܐ. ܩܳܝܡܺܝܢ ܟܽܠܶܗ ܥܰܡܳܐ. ܘܡܶܬܛܰܝܒܺܝܢ ܐ̱ܢܳܫ ܒܰܬܪܰܥ ܡܰܫܟܢܶܗ. ܘܚܳܝܪܺܝܢ ܒܳܬܪܶܗ ܕܡܽܘܫܶܐ ܥܕܰܡܳܐ ܕܥܳܐܶܠ ܠܡܰܫܟܢܳܐ.

⁹ ܘܡܳܐ ܕܥܳܐܶܠ ܡܽܘܫܶܐ ܠܡܰܫܟܢܳܐ. ܢܳܚܶܬ ܥܰܡܽܘܕܳܐ ܕܰܥܢܳܢܳܐ. ܘܩܳܐܶܡ ܒܬܰܪܥܳܐ ܕܡܰܫܟܢܳܐ. ܘܡܶܬܡܰܠܶܠ ܥܰܡ ܡܽܘܫܶܐ.

¹⁰ ܘܰܚܙܳܐ ܟܽܠܶܗ ܥܰܡܳܐ ܥܰܡܽܘܕܳܐ ܕܰܥܢܳܢܳܐ ܕܩܳܐܶܡ ܒܬܰܪܥܳܐ ܕܡܰܫܟܢܳܐ. ܘܩܳܝܡܺܝܢ ܟܽܠܶܗ ܥܰܡܳܐ. ܘܣܳܓܕܺܝܢ ܐ̱ܢܳܫ ܒܰܬܪܰܥ ܡܰܫܟܢܶܗ.

¹¹ ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ ܐܰܦܺܝ̈ܢ ܠܽܘܩܒܰܠ ܐܰܦܺܝ̈ܢ. ܐܰܝܟ ܕܰܡܡܰܠܶܠ ܓܰܒܪܳܐ ܥܰܡ ܚܰܒܪܶܗ. ܘܰܗܦܰܟ ܠܡܰܫܪܺܝܬܳܐ. ܘܰܡܫܰܡܫܳܢܶܗ ܗܽܘܫܳܥ ܒܰܪ ܢܽܘܢ ܛܰܠܝܳܐ. ܠܳܐ ܥܳܢܶܕ ܗܘܳܐ ܡܶܢ ܓܰܘ ܡܰܫܟܢܳܐ.

¹² ܘܶܐܡܰܪ ܡܽܘܫܶܐ ܠܡܳܪܝܳܐ. ܚܙܺܝ. ܕܰܐܢ̱ܬ ܐܶܡܰܪܬ ܠܺܝ ܐܰܣܶܩܳܝܗܝ ܠܥܰܡܳܐ ܗܳܢܳܐ. ܘܰܐܢ̱ܬ ܠܳܐ ܚܰܘܺܝܬܳܢܝ ܡܰܢ ܕܰܡܫܰܕܰܪ ܐܰܢ̱ܬ ܥܰܡܝ. ܘܰܐܢ̱ܬ ܐܶܡܰܪܬ. ܝܺܕܰܥܬܳܟ ܒܰܫܡܳܐ. ܘܳܐܦ ܐܶܫܟܰܚܬ ܖ̈ܰܚܡܶܐ ܒܥܰܝ̈ܢܰܝ.

¹³ ܗܳܫܳܐ ܐܶܢ ܐܶܫܟܚܶܬ ܖ̈ܰܚܡܶܐ ܒܥܰܝ̈ܢܰܝܟ. ܚܰܘܳܢܝ ܐܽܘܪܚܳܟ ܘܶܐܕܥܳܟ ܡܶܛܽܠ ܕܶܐܫܟܰܚ ܖ̈ܰܚܡܶܐ ܒܥܰܝ̈ܢܰܝܟ. ܘܰܚܙܺܝ ܕܥܰܡܳܟ ܗܳܢܳܐ ܥܰܡܰܐ ܗ̱ܘ ܪܰܒܳܐ.

¹⁴ ܘܶܐܡܰܪ ܡܳܪܝܳܐ ܠܡܽܘܫܶܐ. ܩܕܳܡܰܝ ܙܶܠ. ܘܰܐܢܺܝܚ ܠܳܟ.

¹⁵ ܐܶܡܰܪ ܠܶܗ. ܐܶܢ ܐܰܢ̱ܬ ܠܳܐ ܐܳܙܶܠ ܐܰܢ̱ܬ ܥܰܡܰܢ. ܠܳܐ ܬܰܣܩܰܢ ܡܶܟܳܐ.

¹⁶ ܘܰܒܡܳܢܳܐ ܢܶܬܺܝܕܰܥ ܗܳܪܟܳܐ ܕܶܐܫܟܚܶܬ ܖ̈ܰܚܡܶܐ ܒܥܰܝ̈ܢܰܝܟ. ܐܶܢܳܐ ܘܥܰܡܳܟ. ܐܶܠܳܐ ܡܳܐ ܕܶܐܙܰܠܬ ܥܰܡܰܢ. ܘܰܗܘܰܝܢ ܦܪܺܝܫܺܝܢ ܐܶܢܳܐ ܘܥܰܡܳܟ ܡܶܢ ܟܽܠܗܽܘܢ ܥܰܡ̈ܡܶܐ ܕܺܐܝܬ ܥܰܠ ܐܰܦܰܝ̈ ܐܰܪܥܳܐ.

¹⁷ ܘܶܐܡܰܪ ܡܳܪܝܳܐ ܠܡܽܘܫܶܐ. ܐܰܝܟ ܡܶܠܬܳܐ ܗܳܕܶܐ ܕܶܐܡܰܪܬ ܐܶܥܒܶܕ. ܡܶܛܽܠ ܕܶܐܫܟܰܚܬ ܖ̈ܰܚܡܶܐ ܒܥܰܝ̈ܢܰܝ. ܘܶܐܕܥܳܟ ܒܰܫܡܳܐ.

¹⁸ ܘܶܐܡܰܪ ܚܰܘܳܢܝ ܫܽܘܒܚܳܟ.

¹⁹ ܘܶܐܡܰܪ. ܐܶܢܳܐ ܐܰܥܒܰܪ ܟܽܠܶܗ ܛܽܘܒܝ ܩܕܳܡܰܝܟ. ܘܶܐܩܪܶܐ ܒܰܫܡܳܐ ܕܡܳܪܝܳܐ ܩܕܳܡܰܝܟ. ܘܶܐܚܽܘܢ ܠܡܰܢ ܕܶܐܚܽܘܢ. ܘܶܐܪܰܚܶܡ ܠܡܰܢ ܕܶܐܪܰܚܶܡ.

²⁰ ܘܶܐܡܰܪ. ܠܳܐ ܡܶܫܟܰܚ ܐܰܢ̱ܬ ܠܡܶܚܙܳܐ ܐܰܦܰܝ̈. ܡܶܛܽܠ ܕܠܳܐ ܚܳܙܶܐ ܠܺܝ ܒܰܪܢܳܫܳܐ ܘܚܳܝܶܐ.

²¹ ܘܶܐܡܰܪ ܡܳܪܝܳܐ ܠܡܽܘܫܶܐ. ܗܳܐ ܐܰܬܪܳܐ ܩܕܳܡܰܝ. ܩܽܘܡ ܥܰܠ ܛܰܪܳܢܳܐ.

²² ܘܡܳܐ ܕܥܳܒܰܪ ܐܺܝܩܳܪܝ. ܐܶܣܺܝܡܳܟ ܒܰܡܥܰܪܬܳܐ ܕܛܰܪܳܢܳܐ. ܘܰܐܓܶܢ ܐܺܝܕܝ ܥܠܰܝܟ ܥܕܰܡܳܐ ܕܶܐܥܒܰܪ.

²³ ܘܰܐܥܒܰܪ ܐܺܝܕܝ. ܘܬܶܚܙܶܐ ܒܶܣܬܰܪܝ. ܘܰܐܦܰܝ̈ ܠܳܐ ܢܶܬܚܰܙ̈ܝܳܢ.