Esodo ܡܦܩܢܐ 30

¹ ܘܰܥܒܶܕ ܡܰܕܒܚܳܐ ܕܡܰܥܛܰܪ ܥܶܛܪܳܐ. ܕܩܰܝܣܳܐ ܕܶܐܫܟܳܪܥܳܐ ܬܶܥܒܕܺܝܘܗܝ.

² ܐܰܡܳܐ ܐܽܘܪܟܶܗ. ܘܰܐܡܳܐ ܦܬܳܝܶܗ. ܡܪܰܒܥ ܢܶܗܘܶܐ. ܘܬܰܪܬܶܝܢ ܐܰܡܺܝ̈ܢ ܪܰܘܡܶܗ. ܡܶܢܶܗ ܢܶܗܘ̈ܝܳܢ ܩܰܖ̈ܢܳܬܶܗ.

³ ܘܰܩܪܽܘܡܳܝܗܝ ܕܰܗܒܳܐ ܕܰܟܝܳܐ. ܐܶܓܳܪܶܗ ܘܶܐܣܰܘ̈ܗܝ ܟܰܕ ܚܳܕܰܪ. ܘܩܰܖ̈ܢܳܬܶܗ. ܘܰܥܒܶܕ ܠܶܗ ܟܠܺܝܠܳܐ ܕܕܰܗܒܳܐ ܟܰܕ ܚܳܕܰܪ.

⁴ ܘܬܰܪܬܶܝܢ ܙܰܩܙ̈ܩܳܬܳܐ ܕܕܰܗܒܳܐ ܬܶܥܒܶܕ ܠܶܗ ܠܬܰܚܬ ܡܶܢ ܟܠܺܝܠܶܗ. ܥܰܠ ܬܰܪܬܶܝܢ ܙܳܘ̈ܝܳܬܶܗ ܬܶܥܒܶܕ ܥܰܠ ܬܪܶܝܢ ܣܶܛܖ̈ܰܘܗܝ. ܘܢܶܗܘ̈ܝܳܢ ܕܽܘܟܬܳܐ ܠܩܽܘܦ̈ܶܐ ܠܡܶܫܩܠܶܗ ܒܗܽܘܢ.

⁵ ܘܰܥܒܶܕ ܩܽܘܦ̈ܶܐ ܕܩܰܝܣܳܐ ܕܶܐܫܟܳܪܥܳܐ. ܘܰܩܪܽܘܡ ܐܶܢܽܘܢ ܕܰܗܒܳܐ.

⁶ ܘܣܺܝܡܳܝܗܝ ܩܕܳܡ ܦܪܳܣܳܐ ܕܥܰܠ ܩܺܒܽܘܬܳܐ ܕܣܳܗܕܽܘܬܳܐ. ܩܕܳܡ ܚܽܘܣܳܝܳܐ ܕܥܰܠ ܣܳܗܕܽܘܬܳܐ. ܘܶܐܬܘܰܥܰܕ ܠܳܟ ܬܰܡܳܢ.

⁷ ܘܢܶܗܘܶܐ ܡܰܥܛܰܪ ܥܠܰܘܗ̱ܝ ܐܰܗܪܽܘܢ ܥܶܛܪܳܐ ܕܒܶܣ̈ܡܶܐ ܡܶܢ ܨܦܰܪ ܠܰܨܦܰܪ. ܡܳܐ ܕܰܡܛܰܝܶܒ ܫܖ̈ܳܓܶܐ ܢܰܥܛܪܺܝܘܗܝ.

⁸ ܘܡܳܐ ܕܡܰܕܠܶܩ ܐܰܗܪܽܘܢ ܫܖ̈ܳܓܶܐ ܒܶܝܬ ܫܶܡ̈ܫܶܐ. ܢܰܥܛܪܺܝܘܗܝ ܥܶܛܪܳܐ ܐܰܡܺܝܢܳܐܺܝܬ ܩܕܳܡ ܡܳܪܝܳܐ ܠܕܳܖ̈ܰܝܟܽܘܢ.

⁹ ܠܳܐ ܬܰܣܩܽܘܢ ܥܠܰܘܗ̱ܝ ܥܶܛܪܳܐ ܢܽܘܟܪܳܝܳܐ. ܘܰܥܠܳܬܳܐ. ܘܩܽܘܪܒܳܢܳܐ. ܘܢܽܘܩܳܝܳܐ ܠܳܐ ܬܢܰܩܽܘܢ ܥܠܰܘܗ̱ܝ.

¹⁰ ܘܰܢܚܰܣܶܐ ܐܰܗܪܽܘܢ ܥܰܠ ܩܰܖ̈ܢܳܬܶܗ ܕܡܰܕܒܚܳܐ ܚܕܳܐ ܒܫܰܢ̱ܬܳܐ. ܡܶܢ ܕܡܳܐ ܕܰܚܛܳܗܳܐ ܕܚܽܘܣܳܝܳܐ. ܚܕܳܐ ܒܫܰܢ̱ܬܳܐ ܢܚܰܣܶܐ ܥܠܰܘܗ̱ܝ ܠܕܳܖ̈ܰܝܟܽܘܢ ܩܕܽܘܫܩܽܘ̈ܕܫܺܝܢ ܗ̱ܘ ܠܡܳܪܝܳܐ.

¹¹ ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.

¹² ܟܰܕ ܬܩܰܒܶܠ ܚܽܘܫܒܳܢܳܐ ܕܰܒܢܰܝ̈ ܝܺܣܪܳܐܶܝܠ ܠܡܶܢܝܳܢܗܽܘܢ. ܢܶܬܠܽܘܢ ܓܒܰܪ ܦܽܘܪܩܳܢ ܢܰܦܫܶܗ ܠܡܳܪܝܳܐ. ܡܳܐ ܕܰܡܢܰܝܬ ܐܶܢܽܘܢ. ܕܠܳܐ ܢܶܗܘܶܐ ܒܗܽܘܢ ܡܰܘܬܳܐ ܡܳܐ ܕܰܡܢܰܝܬ ܐܶܢܽܘܢ.

¹³ ܗܳܟܰܢܳܐ ܢܶܬܠܽܘܢ ܟܽܠ ܕܥܳܒܰܪ ܒܡܶܢܝܳܢܳܐ. ܦܶܠܓܽܘܬ ܡܰܬܩܳܠܳܐ ܒܡܰܬܩ̈ܳܠܰܝ ܩܽܘܕܫܳܐ. ܥܶܣܪܺܝܢ ܙܽܘܙܺܝ̈ܢ ܡܰܬܩܳܠܳܐ. ܦܶܠܓܽܘܬ ܡܰܬܩܳܠܳܐ ܦܽܘܪܫܳܢܳܐ ܠܡܳܪܝܳܐ.

¹⁴ ܟܽܠ ܕܥܳܒܰܪ ܒܡܶܢܝܳܢܳܐ ܡܶܢ ܒܰܪ ܥܶܣܪܺܝܢ ܫܢܺܝ̈ܢ ܘܰܠܥܶܠ. ܢܶܬܶܠ ܦܽܘܪܫܳܢܳܐ ܠܡܳܪܝܳܐ.

¹⁵ ܕܥܰܬܺܝܪ ܠܳܐ ܢܰܣܓܶܐ. ܘܰܕܡܶܣܟܺܝܢ ܠܳܐ ܢܰܙܥܰܪ ܡܶܢ ܦܶܠܓܽܘܬ ܡܰܬܩܳܠܳܐ. ܠܡܶܬܰܠ ܦܽܘܪܫܳܢܳܐ ܠܡܳܪܝܳܐ. ܠܰܡܚܰܣܳܝܽܘ ܥܰܠ ܢܰܦ̈ܫܳܬܟܽܘܢ.

¹⁶ ܘܬܶܣܰܒ ܟܶܣܦܳܐ ܕܚܽܘܣܳܝܳܐ ܡܶܢ ܒܢܰܝ̈ ܝܺܣܪܳܐܶܝܠ. ܘܬܶܬܶܠ ܠܦܽܘܠܚܳܢܳܐ ܕܡܰܫܟܰܢ ܙܰܒܢܳܐ. ܘܢܶܗܘܶܐ ܠܰܒܢܰܝ̈ ܝܺܣܪܳܐܶܝܠ ܕܽܘܟܪܳܢܳܐ ܩܕܳܡ ܡܳܪܝܳܐ. ܠܰܡܚܰܣܳܝܽܘ ܥܰܠ ܢܰܦ̈ܫܳܬܗܽܘܢ.

¹⁷ ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.

¹⁸ ܥܒܶܕ ܠܰܩܢܳܐ ܕܰܢܚܳܫܳܐ. ܘܟܰܢܳܗ̇ ܕܰܢܚܳܫܳܐ ܠܰܫܝܳܓܬܳܐ. ܘܣܺܝܡܶܝܗ̇ ܒܶܝܬ ܡܰܫܟܰܢܙܰܒܢܳܐ ܘܒܶܝܬ ܡܰܕܒܚܳܐ. ܘܗܰܒ ܬܰܡܳܢ ܡܰܝ̈ܳܐ.

¹⁹ ܘܰܢܫܺܝܓܽܘܢ ܐܰܗܪܽܘܢ ܘܰܒܢܰܘ̈ܗܝ ܡܶܢܳܗ̇ ܐܺܝܕܰܝ̈ܗܽܘܢ ܘܖ̈ܶܓܠܰܝܗܽܘܢ.

²⁰ ܡܳܐ ܕܥܳܐܠܺܝܢ ܠܡܰܫܟܰܢ ܙܰܒܢܳܐ. ܢܫܺܝܓܽܘܢ ܒܡܰܝ̈ܳܐ ܘܠܳܐ ܢܡܽܘܬܽܘܢ. ܘܡܳܐ ܕܩܳܪܒܺܝܢ ܠܡܰܕܒܚܳܐ ܠܰܡܫܰܡܳܫܽܘ ܘܰܠܡܰܥܛܳܪܽܘ ܩܽܘܪܒܳܢܳܐ ܠܡܳܪܝܳܐ.

²¹ ܢܫܺܝܓܽܘܢ ܐܺܝܕܰܝ̈ܗܽܘܢ ܘܖ̈ܶܓܠܰܝܗܽܘܢ. ܘܠܳܐ ܢܡܽܘܬܽܘܢ. ܘܬܶܗܘܶܐ ܠܗܽܘܢ ܠܰܩܝܳܡܳܐ ܕܰܠܥܳܠܰܡ. ܠܶܗ ܘܰܠܙܰܪܥܶܗ ܠܕܳܖ̈ܰܝܗܽܘܢ.

²² ܘܡܰܠܶܠ ܡܳܪܝܳܐ ܥܰܡ ܡܽܘܫܶܐ. ܘܶܐܡܰܪ ܠܶܗ.

²³ ܐܰܢ̱ܬ ܣܰܒ ܠܳܟ ܒܶܣܡܳܐ ܪܺܝܫܳܝܳܐ. ܡܽܘܪܳܐ ܕܰܟܝܳܐ ܚܰܡܶܫܡܳܐܐ. ܘܩܶܘܢܳܘܡܽܘܢ ܒܶܣܡܳܐ ܦܶܠܓܽܘܬܶܗ ܡܰܐܬܶܝܢ ܘܚܰܡܫܺܝܢ. ܘܩܰܢܝܳܐ ܕܒܶܣܡܳܐ ܡܰܐܬܶܝܢ ܘܚܰܡܫܺܝܢ.

²⁴ ܘܩܰܣܝܳܐ ܚܰܡܶܫܡܳܐܐ ܒܡܰܬܩ̈ܳܠܰܝ ܩܽܘܕܫܳܐ. ܘܡܶܫܚܳܐ ܕܙܰܝܬܳܐ ܗܶܡܝܳܢܳܐ.

²⁵ ܘܰܥܒܶܕܳܝܗܝ ܡܶܫܚܳܐ. ܡܫܺܝܚܽܘܬ ܩܽܘܕܫܳܐ. ܘܒܶܣܡܳܐ ܡܒܰܣܡܳܐ ܥܒܶܕ. ܡܒܰܣܰܡ ܡܶܫܚܳܐ ܕܰܡܫܺܝܚܽܘܬܳܐ. ܘܩܽܘܕܫܳܐ ܢܶܗܘܶܐ.

²⁶ ܘܬܶܡܫܽܘܚ ܒܶܗ ܡܰܫܟܰܢ ܙܰܒܢܳܐ. ܘܩܺܒܽܘܬܳܐ ܕܣܳܗܕܽܘܬܳܐ.

²⁷ ܘܦܳܬܽܘܪܳܐ ܘܟܽܠܗܽܘܢ ܡܳܐܢܰܘ̈ܗܝ. ܘܠܰܡܢܳܪܬܳܐ ܘܰܠܡܳܐܢܶܝ̈ܗ̇. ܘܰܠܡܰܕܒܚܳܐ ܕܥܶܛܪܳܐ.

²⁸ ܘܰܠܡܰܕܒܚܳܐ ܕܰܥܠܳܬܳܐ ܘܰܠܟܽܠܗܽܘܢ ܡܳܐܢܰܘ̈ܗܝ. ܘܰܠܠܰܩܢܳܐ ܘܰܠܟܰܢܳܐ.

²⁹ ܘܩܰܕܶܫ ܐܶܢܽܘܢ. ܘܢܶܗܘܽܘܢ ܩܕܽܘܫܩܽܘ̈ܕܫܺܝܢ. ܘܟܽܠ ܕܢܶܩܪܽܘܒ ܠܗܽܘܢ ܢܶܬܩܰܕܰܫ.

³⁰ ܘܠܰܐܗܪܽܘܢ ܘܠܰܒܢܰܘ̈ܗܝ ܬܶܡܫܽܘܚ. ܘܰܬܩܰܕܶܫ ܐܶܢܽܘܢ ܠܰܡܟܰܗܳܢܽܘ ܠܺܝ.

³¹ ܘܥܰܡ ܕܒܶܝܬ ܝܺܣܪܳܐܶܝܠ ܡܰܠܶܠ. ܘܶܐܡܰܪ. ܡܶܫܚܳܐ ܕܰܡܫܺܝܚܽܘܬܳܐ ܠܩܽܘܕܫܳܐ ܢܶܗܘܶܐ ܠܺܝ ܗܳܢܳܐ ܠܕܳܖ̈ܰܝܟܽܘܢ.

³² ܥܰܠ ܒܶܣܪܳܐ ܕܐ̱ܢܳܫܳܐ ܠܳܐ ܢܶܬܬܫܺܝܦ. ܘܒܰܕܡܽܘܬܶܗ ܠܳܐ ܬܶܥܒܕܽܘܢ. ܡܶܛܽܠ ܕܩܽܘܕܫܰܐ ܗ̱ܘ. ܘܩܽܘܕܫܳܐ ܢܶܗܘܶܐ ܠܟܽܘܢ.

³³ ܘܓܰܒܪܳܐ ܕܰܢܒܰܣܶܡ ܐܰܟܘܳܬܶܗ. ܘܰܕܢܶܬܶܠ ܡܶܢܶܗ ܠܢܽܘܟܪܳܝܳܐ. ܢܺܐܒܰܕ ܡܶܢ ܥܰܡܶܗ.

³⁴ ܘܶܐܡܰܪ ܡܳܪܝܳܐ ܠܡܽܘܫܶܐ. ܣܰܒ ܠܳܟ ܒܶܣܡܳܐ ܢܛܳܦܬܳܐ. ܘܛܶܦܪܳܐ. ܘܚܶܠܒܳܢܺܝܬܳܐ ܒܶܣܡܳܐ. ܘܰܠܒܽܘܢܬܳܐ ܕܟܺܝܬܳܐ. ܡܰܬܩܳܠ ܡܰܬܩܳܠ ܢܶܗܘܶܐ.

³⁵ ܘܰܥܒܶܕܳܝܗܝ ܥܶܛܪܳܐ ܕܒܶܣ̈ܡܶܐ ܥܒܳܕܳܐ ܡܒܰܣܡܳܐ. ܦܺܝ̈ܠܶܐ ܕܰܕܟܶܝܢ ܠܩܽܘܕܫܳܐ.

³⁶ ܘܰܫܚܽܘܩ ܡܶܢܶܗ ܘܰܐܕܶܩ. ܘܗܰܒ ܡܶܢܶܗ ܩܕܳܡ ܣܳܗܕܽܘܬܳܐ ܒܡܰܫܟܰܢ ܙܰܒܢܳܐ. ܕܶܐܬܘܰܥܰܕ ܠܳܟ ܬܰܡܳܢ. ܩܕܽܘܫ ܩܽܘܕ̈ܫܺܝܢ ܢܶܗܘܶܐ ܠܟܽܘܢ.

³⁷ ܘܥܶܛܪܳܐ ܕܬܶܥܒܕܽܘܢ. ܒܰܕܡܽܘܬܶܗ ܠܳܐ ܬܶܥܒܕܽܘܢ ܠܟܽܘܢ. ܩܽܘܕܫܳܐ ܢܶܗܘܶܐ ܠܳܟ ܠܡܳܪܝܳܐ.

³⁸ ܘܓܰܒܪܳܐ ܕܢܶܥܒܶܕ ܐܰܟܘܳܬܶܗ ܠܰܡܪܳܚܽܘ ܒܶܗ. ܢܺܐܒܰܕ ܡܶܢ ܥܰܡܶܗ.