Zaccaria ܙܟ̣ܪܝܐ 7

¹ ܘܗܘܐ ܒܫܢܬ ܐܪ̈ܒܥ ܕܕܪܝܘܫ ܡܠܟܐ ܗܘܐ ܦܬܓܡܗ ܕܡܪܝܐ ܥܠ ܙܟܪܝܐ ܒܐܪܒܥܬܐ ܒܝܪܚܐ ܕܬܫܥܐ ܕܗܘ ܟܢܘܢ

² ܘܫܕܪ ܠܒܝܬ ܐܝܠ ܠܫܪܐܨܪ ܘܪܒܡܓ ܘܫܠܚ ܡܠܟܐ ܘܓܢܒܪ̈ܘܗܝ ܠܡܨܠܝܘ ܥܠܘܗܝ ܩܕܡ ܡܪܝܐ

³ ܘܠܡܐܡܪ ܠܟܗ̈ܢܐ ܕܒܒܝܬܗ ܕܡܪܝܐ ܚܝܠܬܢܐ ܘܠܢܒ̈ܝܐ ܐܒܟܐ ܒܝܪܚܐ ܚܡܝܫܝܐ ܐܘ ܐܬܢܙܪ ܐܝܟ ܡܐ ܕܥܒܕ ܗܘܝܬ ܗܐ ܟܡܐ ܫܢ̈ܝܢ

⁴ ܘܗܘܐ ܥܠܝ ܦܬܓܡܗ ܕܡܪܝܐ ܠܡܐܡܪ

⁵ ܐܡܪ ܠܟܠܗ ܥܡܐ ܕܐܪܥܐ ܘܠܟܗ̈ܢܐ ܕܨܡܬܘܢ ܘܐܪܩܕܬܘܢ ܒܝܪܚܐ ܚܡܝܫܝܐ ܘܫܒܝܥܝܐ ܗܐ ܫܒܥܝܢ ܫ̈ܢܝܢ ܕܠܡܐ ܨܘܡܐ ܨܡܬܘܢ ܠܝ

⁶ ܘܐܢ ܐܟܠܝܢ ܐܢܬܘܢ ܘܫܬܝܢ ܠܐ ܗܘܐ ܐܢܬܘܢ ܐܟܠܝܢ ܘܫܬܝܢ

⁷ ܗܠܝܢ ܐܢܝܢ ܡ̈ܠܐ ܕܐܟܪܙ ܡܪܝܐ ܒܐܝܕܐ ܕܢܒ̈ܝܐ ܩܕܡ̈ܝܐ ܟܕ ܝܬܒܐ ܗܘܬ ܐܘܪܫܠܡ ܘܫܠܝܐ ܘܩܘܪ̈ܝܐ ܚܕܝܪ̈ܢ ܠܗ̇ ܘܛܘܪ̈ܐ ܘܦܩ̈ܥܬܐ ܝܬܒܝܢ ܗܘܘ

⁸ ܘܗܘܐ ܦܬܓܡܗ ܕܡܪܝܐ ܥܠ ܙܟܪܝܐ ܠܡܐܡܪ

⁹ ܗܟܢܐ ܐܡܪ ܡܪܝܐ ܚܝܠܬܢܐ ܕܝܢܐ ܕܩܘܫܬܐ ܕܘܢܘ ܘܛܝܒܘܬܐ ܘܪ̈ܚܡܐ ܥܒܕܘ ܐܢܫ ܥܡ ܐܚܘܗܝ

¹⁰ ܘܠܐܪ̈ܡܠܬܐ ܘܠܝܬ̈ܡܐ ܘܠܡܣ̈ܟܢܐ ܘܠܕܡܬܦܢܐ ܠܘܬܝ ܠܐ ܬܥܠܒܘܢ ܘܠܐ ܬܛܠܡܘܢ ܘܒܝܫܬܐ ܓܒܪ ܥܠ ܐܚܘܗܝ ܠܐ ܬܬܚܫܒܘܢ ܒܠܒܟܘܢ

¹¹ ܘܠܐ ܨܒܘ ܠܡܫܡܥܢܝ ܘܥܒܕܘ ܟܬܦܗܘܢ ܡܪܘܕܬܐ ܘܐ̈ܕܢܝܗܘܢ ܣܟܪܘ ܕܠܐ ܢܫܡܥܘܢ

¹² ܘܠܒܗܘܢ ܥܒܕܘ ܐܝܟ ܫܡܝܪܐ ܕܠܐ ܢܫܡܥܘܢ ܢܡܘ̈ܣܐ ܘܦܘܩ̈ܕܢܐ ܕܫܕܪ ܡܪܝܐ ܚܝܠܬܢܐ ܒܪܘܚܗ ܒܝܕ ܢܒ̈ܝܐ ܩܕܡ̈ܝܐ ܘܗܘܐ ܪܘܓܙܐ ܪܒܐ ܡܢ ܩܕܡ ܡܪܝܐ ܚܝܠܬܢܐ

¹³ ܥܠ ܕܩܪܝܬ ܐܢܘܢ ܘܠܐ ܫܡܥܘ ܗܟܢܐ ܢܩܪܘܢܢܝ ܘܠܐ ܐܫܡܥ ܐܢܘܢ ܐܡܪ ܡܪܝܐ ܚܝܠܬܢܐ

¹⁴ ܘܐܒܕܪ ܐܢܘܢ ܒܟܠܗܘܢ ܥܡ̈ܡܐ ܕܠܐ ܝܕܥܘ ܐܢܘܢ ܘܐܪܥܐ ܬܨܕܐ ܒܬܪܗܘܢ ܡܢ ܒܠܝ ܕܥܒܪ ܘܕܬܐܒ ܥܠ ܕܥܒܕܘ ܐܪܥܐ ܕܪܓܬܐ ܠܚܘܪܒܐ