Giona ܝܘܢܢ 3

¹ ܘܗܘܐ ܦܬܓܡܗ ܕܡܪܝܐ ܥܠ ܝܘܢܢ ܕܬܪ̈ܬܝܢ ܙܒܢܝ̈ܢ ܠܡܐܡܪ

² ܩܘܡ ܙܠ ܠܢܝܢܘܐ ܡܕܝܢܬܐ ܪܒܬܐ ܘܐܟܪܙ ܥܠܝܗ̇ ܟܪܘܙܘܬܐ ܕܐܡܪ ܐܢܐ ܠܟ

³ ܘܩܡ ܝܘܢܢ ܘܐܙܠ ܠܢܝܢܘܐ ܐܝܟ ܡܠܬܗ ܕܡܪܝܐ ܘܢܝܢܘܐ ܡܕܝܢܬܐ ܗܘܬ ܪܒܬܐ ܠܐܠܗܐ ܡܪܕܐ ܬܠܬܐ ܝܘ̈ܡܝܢ

⁴ ܘܫܪܝ ܝܘܢܢ ܠܡܥܠ ܠܢܝܢܘܐ ܡܪܕܐ ܝܘܡܐ ܚܕ ܘܐܟܪܙ ܘܐܡܪ ܡܟܐ ܠܐܪ̈ܒܥܝܢ ܝܘܡ̈ܝܢ ܢܝܢܘܐ ܡܬܗܦܟܐ

⁵ ܘܗܝܡܢܘ ܐܢܫ̈ܝܗ̇ ܕܢܝܢܘܐ ܒܐܠܗܐ ܘܦܣܩܘ ܨܘܡܐ ܘܠܒܫܘ ܣܩ̈ܐ ܡܢ ܪ̈ܘܪܒܢܝܗܘܢ ܘܥܕܡܐ ܠܙܥܘܪ̈ܝܗܘܢ

⁶ ܘܡܛܬ ܡܠܬܐ ܠܡܠܟܐ ܕܢܝܢܘܐ ܘܩܡ ܡܢ ܟܘܪܣܝܗ ܘܫܩܠ ܬܓܗ ܡܢܗ ܘܠܒܫ ܣܩܐ ܘܝܬܒ ܥܠ ܩܛܡܐ

⁷ ܘܐܟܪܙ ܘܐܡܪ ܒܢܝܢܘܐ ܡܢ ܦܘܩܕܢܐ ܕܡܠܟܐ ܘܕܪ̈ܘܪܒܢܘܗܝ ܒܢ̈ܝ ܐܢܫܐ ܘܒܥܝܪܐ ܘܬܘܪ̈ܐ ܘܥܢܐ ܠܐ ܢܛܥܡܘܢ ܡܕܡ ܘܠܐ ܢܪܥܘܢ ܐܦ ܠܐ ܡ̈ܝܐ ܢܫܬܘܢ

⁸ ܐܠܐ ܢܬܟܣܘܢ ܣܩ̈ܐ ܒܢ̈ܝ ܐܢܫܐ ܘܒܥܝܪܐ ܘܢܩܪܘܢܗ ܠܐܠܗܐ ܒܚܢܓܬܐ ܘܢܗܦܘܟ ܐܢܫ ܡܢ ܐܘܪܚܗ ܒܝܫܬܐ ܘܡܢ ܚܛܘܦܝܐ ܕܐܝܬ ܒܐ̈ܝܕܘܗܝ

⁹ ܡ̇ܢ ܝܕܥ ܐܢ ܡܬܦܢܐ ܐܠܗܐ ܘܡܪܚܡ ܥܠܝܢ ܘܡܗܦܟ ܡܢܢ ܚܡܬܐ ܕܪܘܓܙܗ ܕܠܐ ܢܐܒܕ

¹⁰ ܘܚܙܐ ܐܠܗܐ ܥܒ̈ܕܝܗܘܢ ܕܬܒܘ ܡܢ ܐܘܪ̈ܚܬܗܘܢ ܒܝܫ̈ܬܐ ܘܐܗܦܟ ܡܢܗܘܢ ܚܡܬܐ ܕܪܘܓܙܗ ܘܠܐ ܐܘܒܕ ܐܢܘܢ