Esodo ܡܦܩܢܐ 5

¹ ܘܒܳܬܰܪ ܗܳܝܕܶܝܢ. ܥܰܠܘ ܡܽܘܫܶܐ ܘܰܐܗܪܽܘܢ. ܘܶܐܡܰܪܘ ܠܦܶܪܥܽܘܢ. ܗܳܟܰܢܳܐ ܐܳܡܰܪ ܡܳܪܝܳܐ ܐܰ‌ܠܳܗܳܐ ܕܺܝܣܪܳܐܶܝܠ. ܫܰܕܰܪ ܠܥܰܡܝ ܘܰܢܚܰܓܽܘܢ ܠܺܝ ܒܡܰܕܒܪܳܐ.

² ܘܶܐܡܰܪ ܦܶܪܥܽܘܢ. ܡܰܢܽܘ ܡܳܪܝܳܐ ܕܶܐܫܡܰܥ ܒܩܳܠܶܗ ܠܰܡܫܰܕܳܪܽܘ ܠܺܝܣܪܳܐܶܝܠ. ܠܳܐ ܝܳܕܰܥ ܐ̱ܢܳܐ ܠܡܳܪܝܳܐ. ܘܳܐܦ ܠܺܝܣܪܳܐܶܝܠ ܠܳܐ ܡܫܰܕܰܪ ܐ̱ܢܳܐ.

³ ܘܶܐܡܰܪܘ. ܡܳܪܝܳܐ ܐܰ‌ܠܳܗܳܐ ܕܥܶܒܖ̈ܳܝܶܐ ܐܶܬܓܠܺܝ ܥܠܰܝܢ. ܢܺܐܙܰܠ ܡܰܪܕܶܐ ܬܠܳܬܳܐ ܝܰܘܡܺܝ̈ܢ ܒܡܰܕܒܪܳܐ. ܘܰܢܕܰܒܰܚ ܠܡܳܪܝܳܐ ܐܰܠܳܗܰܢ. ܕܰܠܡܳܐ ܢܶܐܪܥܰܢ ܒܚܰܪܒܳܐ ܐܰܘ ܒܡܰܘܬܳܐ.

⁴ ܘܶܐܡܰܪ ܠܗܽܘܢ ܡܰܠܟܳܐ ܕܡܶܨܪܶܝܢ. ܠܡܳܢܳܐ ܡܽܘܫܶܐ ܘܰܐܗܪܽܘܢ ܡܒܰܛܠܺܝܢ ܐܰܢ̱ܬܽܘܢ ܠܥܰܡܳܐ ܡܶܢ ܥܒܳܕܗܽܘܢ. ܙܶܠܘ ܠܫܽܘܥܒܳܕܟܽܘܢ.

⁵ ܘܶܐܡܰܪ ܠܗܽܘܢ ܦܶܪܥܽܘܢ. ܗܳܐ ܣܰܓܺܝܐܺܝܢ ܗܳܫܳܐ ܥܰܡܳܐ ܕܰܐܪܥܳܐ. ܡܒܰܛܠܺܝܢ ܐܰܢ̱ܬܽܘܢ ܠܗܽܘܢ ܡܶܢ ܥܒܳܕܗܽܘܢ.

⁶ ܘܦܰܩܶܕ ܦܶܪܥܽܘܢ ܒܝܰܘܡܳܐ ܗܰܘ ܠܫܰܠܺܝܛܰܘ̈ܗܝ ܕܥܰܡܳܐ. ܘܰܠܣܳܦܖ̈ܰܘܗܝ. ܘܶܐܡܰܪ ܠܗܽܘܢ.

⁷ ܠܳܐ ܬܰܘܣܦܽܘܢ ܠܡܶܬܰܠ ܬܶܒܢܳܐ ܠܥܰܡܳܐ ܠܡܰܪܡܳܝܽܘ ܠܶܒܢ̈ܶܐ. ܐܰܝܟ ܕܶܐܬܡܳܠܝ ܘܰܐܝܟ ܕܡܢܳܬܡܳܠܝ. ܗܶܢܽܘܢ ܢܺܐܙܽܠ̱ܘܢ ܢܶܩܫܽܘܢ ܠܗܽܘܢ ܬܶܒܢܳܐ.

⁸ ܘܚܽܘܫܒܳܢܳܐ ܕܠܶܒܢ̈ܶܐ ܕܥܳܒܕܺܝܢ ܗܘܰܘ. ܐܰܝܟ ܕܡܶܢ ܐܶܬܡܳܠܝ ܘܰܐܝܟ ܕܡܶܢ ܡܢܳܬܡܳܠܝ. ܬܰܪܡܽܘܢ ܥܠܰܝܗܽܘܢ. ܘܠܳܐ ܬܒܰܨܪܽܘܢ ܡܶܢܗܽܘܢ. ܡܶܛܽܠ ܕܒ̈ܰܛܳܠܶܐ ܐܶܢܽܘܢ. ܡܶܛܽܠ ܗܳܢܳܐ ܡܒܰܓܢܺܝܢ ܘܳܐܡܪܺܝܢ. ܢܺܐܙܰܠ ܢܕܰܒܰܚ ܠܰܐܠܳܗܰܢ.

⁹ ܬܶܥܫܰܢ ܥܒܺܝܕܬܳܐ ܥܰܠ ܓܰܒܖ̈ܶܐ ܘܢܶܪܢܽܘܢ ܒܳܗ̇. ܘܠܳܐ ܢܶܪܢܽܘܢ ܒܡ̈ܶܠܶܐ ܣܖ̈ܺܝܩܳܬܳܐ.

¹⁰ ܘܰܢܦܰܩܘ ܫܰܠܺܝܛܰܘ̈ܗܝ ܕܥܰܡܳܐ ܘܣܳܦܖ̈ܰܘܗܝ. ܘܶܐܡܰܪܘ ܠܥܰܡܳܐ. ܗܳܟܰܢܳܐ ܐܶܡܰܪ ܦܶܪܥܽܘܢ. ܠܳܐ ܝܳܗܶܒ ܐ̱ܢܳܐ ܠܟܽܘܢ ܬܶܒܢܳܐ.

¹¹ ܐܰܢ̱ܬܽܘܢ ܙܶܠܘ ܣܰܒܘ ܠܟܽܘܢ ܬܶܒܢܳܐ ܡܶܢ ܐܰܝܡܶܟܳܐ ܕܡܶܫܟܚܺܝܢ ܐܰܢ̱ܬܽܘܢ. ܘܡܶܕܶܡ ܠܳܐ ܢܶܬܒܰܨܰܪ ܡܶܢ ܥܒܳܕܟܽܘܢ.

¹² ܘܶܐܬܒܰܕܰܪ ܥܰܡܳܐ ܒܟܽܠܳܗ̇ ܐܰܪܥܳܐ ܕܡܶܨܪܶܝܢ. ܠܡܶܩܰܫ ܩܶܫܬܳܐ ܕܬܶܒܢܳܐ.

¹³ ܘܫܰܠܺܝ̈ܛܶܐ ܐܳܠܨܺܝܢ ܘܳܐܡܪܺܝܢ. ܐܰܫܠܶܡܘ ܥܒܳܕܟܽܘܢ ܐܰܝܟ ܕܰܒܟܽܠܙܒܰܢ. ܐܰܝܟ ܕܡܶܬܝܗܶܒ ܗܘܳܐ ܠܟܽܘܢ ܬܶܒܢܳܐ.

¹⁴ ܘܶܐܬܪܕܺܝܘ ܣܳܦܖ̈ܶܐ ܕܰܒܢܰܝ̈ ܝܺܣܪܳܐܶܝܠ. ܕܰܐܩܺܝܡܘ ܥܠܰܝܗܽܘܢ ܫܰܠܺܝܛܳܢܰܘ̈ܗܝ ܕܦܶܪܥܽܘܢ. ܘܳܐܡܪܺܝܢ. ܠܡܳܢܳܐ ܠܳܐ ܐܰܫܠܶܡܬܽܘܢ ܚܽܘܫܒܳܢܟܽܘܢ ܕܠܶܒܢ̈ܶܐ. ܐܰܝܟ ܕܶܐܬܡܳܠܝ ܘܰܐܝܟ ܕܶܡܢܳܬܡܳܠܝ. ܘܳܐܦ ܐܶܬܡܳܠܝ ܘܝܰܘܡܳܢܳܐ.

¹⁵ ܘܶܐܬܰܘ ܣܳܦܖ̈ܶܐ ܕܰܒܢܰܝ̈ ܝܺܣܪܳܐܶܝܠ. ܘܰܡܒܰܓܢܺܝܢ ܩܕܳܡ ܦܶܪܥܽܘܢ ܘܳܐܡܪܺܝܢ. ܠܡܳܢܳܐ ܡܶܬܥܒܶܕ ܗܳܟܰܢܳܐ ܠܥܰܒܕܰܝ̈ܟ.

¹⁶ ܬܶܒܢܳܐ ܠܳܐ ܡܶܬܝܗܶܒ ܠܥܰܒܕܰܝ̈ܟ. ܘܠܶܒܢ̈ܶܐ ܐܳܡܪܺܝܢ ܠܰܢ ܐܰܪܡܰܘ ܘܗܳܐ ܥܰܒܕܰܝ̈ܟ ܒܳܠܥܺܝܢ. ܘܚܳܛܶܐ ܐܰܢ̱ܬ ܥܰܠ ܥܰܡܳܟ.

¹⁷ ܘܶܐܡܰܪ ܠܗܽܘܢ ܦܶܪܥܽܘܢ. ܡܶܒܛܰܠ ܗܽܘ ܒܰܛܳܠܺܝܢ ܐܰܢ̱ܬܽܘܢ. ܡܶܛܽܠ ܗܳܢܳܐ ܐܳܡܪܺܝܢ ܐܰܢ̱ܬܽܘܢ ܢܺܐܙܰܠ ܢܕܰܒܰܚ ܠܡܳܪܝܳܐ.

¹⁸ ܗܳܫܳܐ ܙܶܠܘ ܘܰܥܒܶܕܘ. ܘܬܶܒܢܳܐ ܠܳܐ ܢܶܬܝܗܶܒ ܠܟܽܘܢ. ܘܚܽܘܫܒܳܢܳܐ ܕܠܶܒܢ̈ܶܐ ܬܶܬܠܽܘܢ.

¹⁹ ܘܰܚܙܰܘ ܐܶܢܽܘܢ ܣܳܦܖ̈ܶܐ ܠܰܒܢܰܝ̈ ܝܺܣܪܳܐܶܝܠ ܒܺܝܫܳܐܺܝܬ. ܘܳܐܡܪܺܝܢ ܠܗܽܘܢ. ܠܳܐ ܡܒܰܨܪܺܝܢ ܐܰܢ̱ܬܽܘܢ ܡܶܢ ܠܶܒܢܰܝ̈ܟܽܘܢ. ܐܶܠܳܐ ܐܰܝܟ ܕܰܒܟܽܠܝܽܘܡ.

²⁰ ܘܰܦܓܰܥܘ ܒܡܽܘܫܶܐ ܘܰܐܗܪܽܘܢ ܟܰܕ ܩܳܝܡܺܝܢ ܠܽܘܩܒܰܠܗܽܘܢ. ܟܰܕ ܢܦܰܩܘ ܡܶܢ ܩܕܳܡ ܦܶܪܥܽܘܢ.

²¹ ܘܶܐܡܰܪܘ ܠܗܽܘܢ. ܢܶܚܙܶܐ ܥܠܰܝܟܽܘܢ ܡܳܪܝܳܐ ܘܰܢܕܽܘܢ. ܕܰܐܒܐܶܫܬܽܘܢ ܠܪܽܘܚܰܢ ܒܥܰܝ̈ܢܰܝ ܦܶܪܥܽܘܢ ܘܰܒܥܰܝ̈ܢܰܝ ܥܰܒܕܰܘ̈ܗܝ. ܠܡܶܬܠܰܢ ܠܚܰܪܒܳܐ ܒܺܐܝܕܰܝ̈ܗܽܘܢ ܘܰܠܡܶܚܪܒܰܢ.

²² ܘܰܗܦܰܟ ܡܽܘܫܶܐ ܠܘܳܬ ܡܳܪܝܳܐ ܘܶܐܡܰܪ. ܡܳܪܝ. ܠܡܳܢܳܐ ܐܰܒܐܶܫܬ ܠܥܰܡܳܐ ܗܳܢܳܐ. ܘܰܠܡܳܢܳܐ ܫܰܕܰܪܬܳܢܝ.

²³ ܕܡܶܢ ܫܳܥܬܳܐ ܕܶܐܬܺܝܬ ܠܘܳܬ ܦܶܪܥܽܘܢ ܠܰܡܡܰܠܠܽܘ ܒܰܫܡܳܟ. ܒܐܶܫ ܠܥܰܡܳܐ ܗܳܢܳܐ. ܘܡܶܦܪܰܩ ܠܳܐ ܦܪܰܩܬ ܠܥܰܡܳܟ.