Esodo ܡܦܩܢܐ 38

¹ ܘܰܥܒܰܕ ܡܰܕܒܚܳܐ ܕܝܰܩܕܳܐ ܕܩܰܝܣܳܐ ܕܶܐܫܟܳܪܥܳܐ. ܚܰܡܶܫ ܐܰܡܺܝ̈ܢ ܐܽܘܪܟܶܗ. ܘܚܰܡܶܫ ܐܰܡܺܝ̈ܢ ܦܬܳܝܶܗ. ܡܪܰܒܰܥ. ܘܰܬܠܳܬ ܐܰܡܺܝ̈ܢ ܪܰܘܡܶܗ.

² ܘܰܥܒܰܕ ܩܰܖ̈ܢܳܬܶܗ ܥܰܠ ܐܰܪܒܰܥ ܙܳܘ̈ܝܳܬܶܗ. ܡܶܢܶܗ ܗܘܰܝ̈ ܩܰܖ̈ܢܳܬܶܗ. ܘܩܰܪܡܶܗ ܢܚܳܫܳܐ.

³ ܘܰܥܒܰܕ ܟܽܠܗܽܘܢ ܡܳܐܢܰܘ̈ܗܝ ܕܡܰܕܒܚܳܐ. ܩܰܕܣ̈ܶܐ. ܘܺܐܝܕ̈ܶܐ. ܘܩܰܖ̈ܕܳܠܶܐ. ܘܫܳܚ̈ܠܶܐ. ܘܡܰܫ̈ܠܘܳܬܳܐ. ܘܦܺܝܖ̈ܡܶܐ. ܘܟܽܠܗܽܘܢ ܡܳܐܢܰܘ̈ܗܝ ܥܒܰܕ ܕܰܢܚܳܫܳܐ.

⁴ ܘܰܥܒܰܕ ܠܡܰܕܒܚܳܐ ܩܰܪܩܶܠ ܥܒܳܕܳܐ ܕܰܡܨܺܝܕܬܳܐ ܕܰܢܚܳܫܳܐ ܬܚܶܝܬ ܫܦܽܘܠܰܘ̈ܗܝ ܡܶܢ ܠܬܰܚܬ ܘܰܥܕܰܡܳܐ ܠܦܶܠܓܶܗ.

⁵ ܘܰܚܫܰܠ ܠܶܗ ܐܰܪܒܰܥ ܙܰܩܙ̈ܩܳܢ ܒܰܐܪܒܰܥ ܙܳܘ̈ܝܳܬܶܗ. ܠܒܳܣܶܣ ܕܰܢܚܳܫܳܐ. ܕܽܘܟܬܳܐ ܠܩܽܘܦ̈ܶܐ.

⁶ ܘܰܥܒܰܕ ܩܽܘܦ̈ܶܐ ܕܩܰܝܣܳܐ ܕܶܐܫܟܳܪܥܳܐ. ܘܰܩܪܰܡ ܐܶܢܽܘܢ ܢܚܳܫܳܐ.

⁷ ܘܰܐܥܶܠ ܩܽܘܦ̈ܶܐ ܒܙܰܩܙ̈ܩܳܬܳܐ. ܥܰܠ ܣܶܛܖ̈ܰܘܗܝ ܕܡܰܕܒܚܳܐ. ܠܡܶܫܩܠܶܗ ܒܗܽܘܢ. ܚܠܺܝܠܳܐ ܕܕܰܦ̈ܶܐ ܥܰܒܕܶܗ.

⁸ ܘܰܥܒܰܕ ܠܰܩܢܳܐ ܕܰܢܚܳܫܳܐ. ܘܟܰܢܳܗ̇ ܕܺܝܠܳܗ̇ ܕܰܢܚܳܫܳܐ. ܒܶܝܬ ܡܰܚܙܝܳܐ ܕܢܶܫ̈ܶܐ ܕܳܐܬܝ̈ܳܢ ܠܰܡܨܰܠܳܝܽܘ ܒܬܰܪܥܳܐ ܕܡܰܫܟܰܢܙܰܒܢܳܐ.

⁹ ܘܰܥܒܰܕ ܕܳܪܬܳܐ ܠܣܶܛܪܳܐ ܕܪܽܘܚܳܐ ܕܬܰܝܡܢܳܐ. ܣܶܕܖ̈ܶܐ ܕܕܳܪܬܳܐ ܕܒܽܘܨܳܐ ܥܙܺܝܠܳܐ ܡܳܐܐ ܐܰܡܺܝ̈ܢ.

¹⁰ ܥܰܡܽܘܕܰܝ̈ܗܽܘܢ ܥܶܣܪܺܝܢ. ܘܣܳܡܟܰܝ̈ܗܽܘܢ ܥܶܣܪܺܝܢ ܕܰܢܚܳܫܳܐ. ܘܩܽܘܒܥܰܝ̈ܗܽܘܢ ܕܥܰܡܽܘܕ̈ܶܐ ܘܰܩܪܳܡܗܽܘܢ ܕܣܺܐܡܳܐ.

¹¹ ܘܰܠܣܶܛܪܳܐ ܕܓܰܪܒܝܳܐ ܡܳܐܐ ܐܰܡܺܝ̈ܢ. ܥܰܡܽܘܕܰܝ̈ܗܽܘܢ ܥܶܣܪܺܝܢ. ܘܣܳܡܟܰܝ̈ܗܽܘܢ ܥܶܣܪܺܝܢ ܕܰܢܚܳܫܳܐ. ܘܩܽܘܒܥܰܝ̈ܗܽܘܢ ܕܥܰܡܽܘܕ̈ܶܐ ܘܰܩܪܳܡܗܽܘܢ ܕܣܺܐܡܳܐ.

¹² ܘܰܠܣܶܛܪܳܐ ܕܡܰܥܪܒܐ ܣܶܕܖ̈ܶܐ ܚܰܡܫܺܝܢ ܐܰܡܺܝ̈ܢ. ܥܰܡܽܘܕܰܝ̈ܗܽܘܢ ܥܶܣܪܳܐ. ܘܣܳܡܟܰܝ̈ܗܽܘܢ ܥܶܣܪܳܐ. ܘܩܽܘܒܥܰܝ̈ܗܽܘܢ ܕܥܰܡܽܘܕ̈ܶܐ ܘܰܩܪܳܡܗܽܘܢ ܕܣܺܐܡܳܐ.

¹³ ܘܰܠܣܶܛܪܳܐ ܕܪܽܘܚܳܐ ܕܡܰܕܢܚܳܐ ܚܰܡܫܺܝܢ ܐܰܡܺܝ̈ܢ ܣܶܕܖ̈ܶܐ.

¹⁴ ܘܚܰܡܫܰܥܶܣܪܶܐ ܐܰܡܺܝ̈ܢ ܠܣܶܛܪܳܐ. ܥܰܡܽܘܕܰܝ̈ܗܽܘܢ ܬܠܳܬܳܐ. ܘܣܳܡܟܰܝ̈ܗܽܘܢ ܬܠܳܬܳܐ.

¹⁵ ܘܰܠܣܶܛܪܳܐ ܐ̱ܚܪܺܢܳܐ. ܡܶܟܳܐ ܘܡܶܟܳܐ ܠܬܰܪܥܳܐ ܕܕܳܪܬܳܐ. ܣܶܕܖ̈ܶܐ ܚܰܡܫܰܥܶܣܖ̈ܶܐ ܐܰܡܺܝ̈ܢ ܠܣܶܛܪܳܐ. ܥܰܡܽܘܕܰܝ̈ܗܽܘܢ ܬܠܳܬܳܐ. ܘܣܳܡܟܰܝ̈ܗܽܘܢ ܬܠܳܬܳܐ.

¹⁶ ܟܽܠܗܽܘܢ ܣܶܛܖ̈ܶܐ ܕܕܳܪܬܳܐ ܟܰܕ ܚܳܕܪܳܐ. ܕܒܽܘܨܳܐ ܥܙܺܝܠܳܐ.

¹⁷ ܘܣܳܡܟ̈ܶܐ ܠܥܰܡܽܘܕ̈ܶܐ ܕܰܢܚܳܫܳܐ. ܘܩܽܘܒܥܰܝ̈ܗܽܘܢ ܕܥܰܡܽܘܕ̈ܶܐ. ܘܰܩܪܳܡܗܽܘܢ ܕܣܺܐܡܳܐ. ܘܰܩܪܳܡܳܐ ܕܖ̈ܺܝܫܰܝܗܽܘܢ ܕܣܺܐܡܳܐ. ܘܗܶܢܽܘܢ ܩܪܺܝܡܺܝܢ ܣܺܐܡܳܐ. ܟܽܠܗܽܘܢ ܥܰܡܽܘܕ̈ܶܐ ܕܕܳܪܬܳܐ.

¹⁸ ܘܰܦܪܳܣܳܐ ܕܬܰܪܥܳܐ ܕܕܳܪܬܳܐ. ܥܒܳܕܳܐ ܕܨܰܝܳܪܳܐ. ܬܶܟܠܬܳܐ. ܘܰܐܪܓܘܳܢܳܐ. ܘܨܽܘܒܥܳܐ ܕܰܙܚܽܘܪܺܝܬܳܐ. ܘܒܽܘܨܳܐ ܥܙܺܝܠܳܐ. ܥܶܣܪܺܝܢ ܐܰܡܺܝ̈ܢ ܐܽܘܪܟܳܐ. ܘܪܰܘܡܳܐ ܘܰܦܬܳܝܳܐ ܚܰܡܶܫ ܐܰܡܺܝ̈ܢ. ܠܽܘܩܒܰܠ ܣܶܕܖ̈ܶܐ ܕܕܳܪܬܳܐ.

¹⁹ ܥܰܡܽܘܕܰܝ̈ܗܽܘܢ ܐܰܪܒܥܳܐ. ܘܣܳܡܟܰܝ̈ܗܽܘܢ ܐܰܪܒܥܳܐ ܕܰܢܚܳܫܳܐ. ܘܩܽܘܒܥܰܝ̈ܗܽܘܢ ܕܣܺܐܡܳܐ. ܘܰܩܪܳܡܳܐ ܕܖ̈ܺܝܫܰܝܗܽܘܢ. ܘܰܩܪܳܡܗܽܘܢ ܕܣܺܐܡܳܐ.

²⁰ ܘܟܽܠܗܽܘܢ ܣܶܟ̈ܶܐ ܕܡܰܫܟܢܳܐ ܘܰܕܕܳܪܬܳܐ ܟܰܕ ܚܳܕܪܳܐ ܕܰܢܚܳܫܳܐ.

²¹ ܗܳܠܶܝܢ ܡܶܢܝܳܢ̈ܶܐ ܕܡܰܫܟܢܳܐ. ܡܰܫܟܢܳܐ ܕܣܳܗܕܽܘܬܳܐ. ܕܶܐܬܡܢܺܝܘ ܥܰܠ ܡܶܠܰܬ ܦܽܘܡܶܗ ܕܡܽܘܫܶܐ. ܘܦܽܘܠܚܳܢܳܐ ܕܠܶܘ̈ܳܝܶܐ. ܒܺܐܝܕܳܐ ܕܺܐܝܬܳܡܰܪ ܒܪܶܗ ܕܰܐܗܪܽܘܢ ܟܳܗܢܳܐ.

²² ܘܒܰܨܠܺܝܐܶܝܠ ܒܰܪ ܐܽܘܪܺܝ ܒܰܪ ܚܽܘܪ. ܡܶܢ ܫܰܒܛܳܐ ܕܺܝܗܽܘܕܳܐ. ܥܒܰܕ ܟܽܠ ܡܶܕܶܡ ܕܦܰܩܶܕ ܡܳܪܝܳܐ ܠܡܽܘܫܶܐ.

²³ ܘܥܰܡܶܗ ܐܶܠܺܝܗܰܒ ܒܰܪ ܐܰܚܺܝܣܡܳܟ ܡܶܢ ܫܰܒܛܳܐ ܕܕܳܢ. ܢܰܓܳܪ. ܐܘܡܳܢ. ܘܨܰܝܳܪ ܒܬܶܟܠܬܳܐ. ܘܒܰܐܪܓܘܳܢܳܐ. ܘܰܒܨܽܘܒܥܳܐ ܕܰܙܚܽܘܪܺܝܬܳܐ. ܘܰܒܒܽܘܨܳܐ.

²⁴ ܟܽܠܶܗ ܕܰܗܒܳܐ ܕܶܐܬܥܒܶܕ ܠܰܥܒܳܕܳܐ. ܒܟܽܠܶܗ ܥܒܳܕܳܐ ܕܩܽܘܕܫܳܐ. ܗܘܳܐ ܕܰܗܒܳܐ ܕܦܽܘܪܫܳܢܳܐ ܥܶܣܪܺܝܢ ܘܰܬܫܰܥ ܟܰܟܖ̈ܺܝܢ. ܘܰܫܒܰܥ ܡܳܐܐ ܘܰܬܠܳܬܺܝܢ ܡܰܬܩ̈ܳܠܺܝܢ. ܒܡܰܬܩܳܠܳܐ ܕܩܽܘܕܫܳܐ.

²⁵ ܘܣܺܐܡܳܐ ܕܡܶܢܝܳܢܳܐ ܕܰܟܢܽܘܫܬܳܐ ܡܳܐܐ ܟܰܟܖ̈ܺܝܢ. ܘܳܐܠܶܦ ܘܰܫܒܰܥܡܳܐܐ ܘܫܰܒܥܺܝܢ ܡܰܬܩ̈ܳܠܺܝܢ. ܒܡܰܬܩܳܠܳܐ ܕܩܽܘܕܫܳܐ.

²⁶ ܡܰܬܩܳܠܳܐ ܠܪܺܝܫܳܐ. ܦܶܠܓܽܘܬ ܡܰܬܩܳܠܳܐ ܒܡܰܬܩ̈ܳܠܰܝ ܩܽܘܕܫܳܐ. ܟܽܠ ܕܥܳܒܰܪ ܒܡܶܢܝܳܢܳܐ. ܡܶܢ ܒܰܪ ܥܶܣܪܺܝܢ ܫܢܺܝ̈ܢ ܘܰܠܥܶܠ. ܫܶܬܡܳܐܐ ܐܰܠܦܺܝ̈ܢ. ܘܰܬܠܳܬܳܐ ܐܰܠܦܺܝ̈ܢ. ܘܚܰܡܶܫܡܳܐܐ ܘܚܰܡܫܺܝܢ.

²⁷ ܘܰܗܘܰܝ̈ ܡܳܐܐ ܟܰܟܖ̈ܺܝܢ ܕܣܺܐܡܳܐ. ܠܡܶܚܫܰܠ ܣܳܡܟ̈ܶܐ ܕܩܽܘܕܫܳܐ. ܘܣܳܡܟ̈ܶܐ ܕܰܦܪܳܣܳܐ. ܡܳܐܐ ܣܳܡܟܺܝ̈ܢ. ܡܶܢ ܡܳܐܐ ܟܰܟܖ̈ܺܝܢ. ܟܰܟܪܳܐ ܠܣܳܡܟܳܐ.

²⁸ ܘܳܐܠܶܦ ܘܰܫܒܰܥ ܡܳܐܐ ܘܫܰܒܥܺܝܢ ܘܚܰܡܫܳܐ. ܥܒܰܕ ܩܽܘܒܥ̈ܶܐ ܠܥܰܡܽܘܕ̈ܶܐ. ܘܰܩܪܳܡܳܐ ܠܖ̈ܺܝܫܰܝܗܽܘܢ. ܘܰܩܪܰܡ ܐܶܢܽܘܢ ܣܺܐܡܳܐ.

²⁹ ܟܽܠܶܗ ܢܚܳܫܳܐ ܕܦܽܘܪܫܳܢܳܐ ܫܰܒܥܺܝܢ ܟܰܟܖ̈ܺܝܢ. ܘܰܬܪܶܝܢ ܐܰܠܦܺܝ̈ܢ. ܘܰܐܪܒܰܥܡܳܐܐ ܡܰܬܩ̈ܳܠܺܝܢ.

³⁰ ܘܰܥܒܰܕ ܒܶܗ ܣܳܡܟ̈ܶܐ ܕܬܰܪܥܳܐ ܕܡܰܫܟܰܢ ܙܰܒܢܳܐ. ܘܡܰܕܒܚܳܐ ܕܰܢܚܳܫܳܐ. ܘܩܰܪܩܶܠ ܕܺܝܠܶܗ ܕܰܢܚܳܫܳܐ. ܘܟܽܠܗܽܘܢ ܡܳܐܢ̈ܶܐ ܕܡܰܕܒܚܳܐ. ܘܣܳܡܟ̈ܶܐ ܕܕܳܪܬܳܐ ܟܰܕ ܚܳܕܪܳܐ.

³¹ ܘܣܳܡܟ̈ܶܐ ܕܬܰܪܥܳܐ ܕܕܳܪܬܳܐ. ܘܟܽܠܗܶܝܢ ܣܶܟ̈ܶܐ ܕܡܰܫܟܢܳܐ ܘܟܽܠܗܶܝܢ ܣܶܟ̈ܶܐ ܕܕܳܪܬܳܐ ܟܰܕ ܚܳܕܪܳܐ.