Paralipomenon I 26

Torna indietro

Bibbia Vulgata Clementina	Nova Vulgata
¹ Divisiones autem janitorum : de Coritis Meselemia, filius Core, de filiis Asaph.	¹ Divisiones autem ianitorum. De Coritis: Meselemia filius Core de filiis Abiasaph.
² Filii Meselemiæ : Zacharias primogenitus, Jadihel secundus, Zabadias tertius, Jathanaël quartus,	² Filii Meselemiae: Zacharias primogenitus, Iedihel secundus, Zabadias tertius, Iathanael quartus,
³ Ælam quintus, Johanan sextus, Elioënai septimus.	³ Elam quintus, Iohanan sextus, Elioenai septimus.
⁴ Filii autem Obededom : Semeias primogenitus, Jozabad secundus, Joaha tertius, Sachar quartus, Nathanaël quintus,	⁴ Filii autem Obededom: Semeias primogenitus, Iozabad secundus, Ioah tertius, Sachar quartus, Nathanael quintus,
⁵ Ammiel sextus, Issachar septimus, Phollathi octavus : quia benedixit illi Dominus.	⁵ Ammiel sextus, Issachar septimus, Phollathi octavus, quia benedixit illi Deus.
⁶ Semei autem filio ejus nati sunt filii, præfecti familiarum suarum : erant enim viri fortissimi.	⁶ Semeiae autem filio eius nati sunt filii praefecti familiarum suarum, erant enim viri fortissimi;
⁷ Filii ergo Semeiæ : Othni, et Raphaël, et Obed, Elzabad, fratres ejus viri fortissimi : Eliu quoque et Samachias.	⁷ filii ergo Semeiae: Othni et Raphael et Obed, Elzabad, fratres eius viri fortissimi, Eliu quoque et Samachias;
⁸ Omnes hi, de filiis Obededom : ipsi, et filii et fratres eorum, fortissimi ad ministrandum, sexaginta duo de Obededom.	⁸ omnes hi de filiis Obededom, ipsi et filii et fratres eorum fortissimi ad ministrandum sexaginta duo de Obededom.
⁹ Porro Meselemiæ filii, et fratres eorum robustissimi, decem et octo.	⁹ Porro Meselemiae filii et fratres eorum robustissimi decem et octo.
¹⁰ De Hosa autem, id est, de filiis Merari : Semri princeps (non enim habuerat primogenitum, et idcirco posuerat eum pater ejus in principem),	¹⁰ De Hosa autem, de filiis Merari, erant filii: Semri princeps — non enim fuerat primogenitus, et idcirco posuerat eum pater eius in principem —
¹¹ Helcias secundus, Tabelias tertius, Zacharias quartus : omnes hi filii et fratres Hosa, tredecim.	¹¹ Helcias secundus, Tabelias tertius, Zacharias quartus; omnes hi filii et fratres Hosa tredecim.
¹² Hi divisi sunt in janitores, ut semper principes custodiarum, sicut et fratres eorum ministrarent in domo Domini.	¹² Hae divisiones ianitorum: secundum capita virorum habebant ministeria sicut et fratres eorum ad ministrandum in domo Domini.
¹³ Missæ sunt ergo sortes ex æquo, et parvis et magnis, per familias suas in unamquamque portarum.	¹³ Missae sunt ergo sortes ex aequo et parvis et magnis per familias suas in unamquamque portarum.
¹⁴ Cecidit ergo sors orientalis, Selemiæ. Porro Zachariæ filio ejus, viro prudentissimo et erudito, sortito obtigit plaga septentrionalis.	¹⁴ Cecidit igitur sors orientalis Selemiae; porro Zachariae filio eius consiliario prudentissimo et erudito sortito obtigit plaga septentrionalis;
¹⁵ Obededom vero et filiis ejus ad austrum : in qua parte domus erat seniorum concilium.	¹⁵ Obededom vero australis, et filiis eius horreum;
¹⁶ Sephim et Hosa ad occidentem, juxta portam, quæ ducit ad viam ascensionis : custodia contra custodiam.	¹⁶ Sephim et Hosa occidentalis iuxta portam Sallecheth apud viam ascensionis. Custodia iuxta custodiam:
¹⁷ Ad orientem vero Levitæ sex : et ad aquilonem, quatuor per diem : atque ad meridiem similiter in die quatuor : et ubi erat concilium bini et bini.	¹⁷ ad orientem per diem sex et ad aquilonem quattuor per diem, atque ad meridiem similiter in die quattuor et pro horreo bini et bini,
¹⁸ In cellulis quoque janitorum ad occidentem quatuor in via, binique per cellulas.	¹⁸ pro Parbar quoque ad occidentem quattuor in via, duo pro Parbar.
¹⁹ Hæ sunt divisiones janitorum filiorum Core et Merari.	¹⁹ Hae sunt divisiones ianitorum filiorum Core et Merari.
²⁰ Porro Achias erat super thesauros domus Dei, et vasa sanctorum.	²⁰ Porro Levitae fratres eorum super thesauros domus Dei ac thesauros rerum consecratarum.
²¹ Filii Ledan, filii Gersonni : de Ledan principes familiarum Ledan, et Gersonni, Jehieli.	²¹ De filiis Ladan Gersonitae principes familiarum Ladan Gersonitae erant Iahielitae.
²² Filii Jehieli : Zathan, et Joël fratres ejus super thesauros domus Domini.	²² Filii Iahiel et Zetham et Ioel fratrum eius erant super thesauros domus Domini.
²³ Amramitis, et Isaaritis, et Hebronitis, et Ozihelitis.	²³ De Amramitis et Isaaritis et Hebronitis et Ozielitis:
²⁴ Subaël autem filius Gersom filii Moysi, præpositus thesauris.	²⁴ Subael filius Gersam filii Moysi praepositus thesauris.
²⁵ Fratres quoque ejus Eliezer, cujus filius Rahabia, et hujus filius Isaias, et hujus filius Joram, hujus quoque filius Zechri, et hujus filius Selemith.	²⁵ Fratres quoque eius Eliezer, cuius filius Rohobia et huius filius Iesaias; et huius filius Ioram, huius quoque filius Zechri et huius filius Selemith.
²⁶ Ipse Selemith, et fratres ejus, super thesauros sanctorum quæ sanctificavit David rex, et principes familiarum, et tribuni, et centuriones, et duces exercitus,	²⁶ Ipse Selemith et fratres eius super omnes thesauros rerum consecratarum, quas sanctificavit David rex et principes familiarum et tribuni et centuriones et duces exercitus
²⁷ de bellis et manubiis præliorum, quæ consecraverant ad instaurationem et supellectilem templi Domini.	²⁷ de bellis et manubiis proeliorum, quas consecraverant ad sustentandum templum Domini.
²⁸ Hæc autem universa sanctificavit Samuel videns, et Saul filius Cis, et Abner filius Ner, et Joab filius Sarviæ : omnes qui sanctificaverant ea per manum Selemith et fratrum ejus.	²⁸ Et universa, quae consecraverant Samuel videns et Saul filius Cis et Abner filius Ner et Ioab filius Sarviae, omnia donaria sacra erant sub manu Selemith et fratrum eius.
²⁹ Isaaritis vero præerat Chonenias, et filii ejus ad opera forinsecus super Israël ad docendum et judicandum eos.	²⁹ De Isaaritis vero erant Chonenias et filii eius ad opera forinsecus super Israel praefecti et iudices.
³⁰ Porro de Hebronitis Hasabias, et fratres ejus viri fortissimi, mille septingenti præerant Israëli trans Jordanem contra occidentem, in cunctis operibus Domini, et in ministerium regis.	³⁰ Porro de Hebronitis Hasabias et fratres eius viri strenui mille septingenti erant magistratus Israel trans Iordanem contra occidentem in cunctis operibus Domini et in ministerium regis;
³¹ Hebronitarum autem princeps fuit Jeria secundum familias et cognationes eorum. Quadragesimo anno regni David recensiti sunt, et inventi sunt viri fortissimi in Jazer Galaad,	³¹ Hebronitarum autem princeps fuit Ieria secundum cognationes et familias eorum. Quadragesimo anno regni David recensiti sunt et inventi viri fortes in Iazer Galaad
³² fratresque ejus robustioris ætatis, duo millia septingenti principes familiarum. Præposuit autem eos David rex Rubenitis, et Gadditis, et dimidiæ tribui Manasse, in omne ministerium Dei et regis.	³² fratresque eius viri strenui duo milia septingenti principes familiarum; praeposuit autem eos David rex Rubenitis et Gadditis et dimidio tribus Manasse in omne ministerium Dei et regis.

Vetus Testamentum

Novum Testamentum

Cambia Bibbia

Confronta con un'altra Bibbia

Versetti esaminati