Baruch ܒܪܘܟ ܒܪ ܢܪܝܐ 4

¹ ܗܢܘ ܟܬܒܐ ܕܕܘܟܪܢܐ ܕܦܘܩ̈ܕܢܘܗܝ ܕܐܠܗܐ̇. ܘܢܡܘܣܐ ܕܐܝܬܘܗܝ ܠܥܠܡ. ܠܟܠܗܘܢ ܐܝܠܝܢ ܕܡܚܡܣܢܝܢ ܒܗ ܬܗܘܐ ܠܗܘܢ̣ ܠܚܝ̈ܐ. ܘܐܝܠܝܢ ܕܫܒܩܝܢ ܠܗܘܢ̣ ܢܡܘܬܘܢ

² ܐܬ̣ܦܢܝ̣ ܘܐ̇ܬܝܠܦ ܝܥܩܘܒ̇̈ ܘܚܡܣܢ̣ ܘܗ̇ܠܟ ܒܐܘܪܚܗ̇. ܠܘܩܒܠ ܙܗܪܐ ܕܢܘܗܪܗ

³ ܠܐ ܬܬܠ ܠܐܚܪܝܢ ܬܫܒܘܚܬܟ ܘܐܝܩܪܟ̇. ܘܡܕܡ ܕܛܒ ܠܟ̇ ܘܦܩܚ ܠܟ ܠܥܡܐ ܢܘܟܪܝܐ

⁴ ܛܘܒ̈ܢܐ ܚܢܢ. ܘܛܘܒܝܟ ܐܝܣܪܝܠ.. ܡܛܠ ܕܡܕܡ ܕܫܦܝܪ ܠܐܠܗܢ̣ ܝܕܥܝܢܢ

⁵ ܐ̣ܬܒܝܐܘ̇ ܥܡܗ܈ ܕܐܠܗܐ. ܕܘܟܪܢܐ ܠܐܝܣܪܝܠ

⁶ ܡܛܠ ܕܐܙܕܒ̇ܢܬܘܢ ܠܥܡ̈ܡܐ̣ ܠܐ ܗܘܐ ܠܐܒܕܢܐ. ܐܠܐ ܡܛܠ ܕܐܪܓܙܬܘܢ ܠܐܠܗܐ ܐܫܬܠܡܬܘܢ ܠܒ̈ܥܠܕܒܒܝܟܘܢ

⁷ ܐܪܓܙܬܘܢ ܓܝܪ̣ ܠܗ̇ܘ ܕܥܒܕܟܘܢ ܠܐܠܗܐ ܕܠܥܠܡ. ܥܠ ܕܕܒܚ̇ܬܘܢ ܠܫܐ̈ܕܐ ܘܠܐ ܠܐܠܗܐ̇

⁸ ܘܛܥܝܬܘܢ ܠܡܪܒܝܢܟܘܢ ܠܐܠܗܐ ܕܠܥܠܡ. ܐܟ̣ܪܝܬܘܢ ܕܝ̣ܢ ܐܦ ܠܡܪܒ̇ܝܢܝܬܟܘܢ ܐܘܪܫܠܡ

⁹ ܚ̇ܙܝܬ ܓܝܪ ܕܐܬ̣ܐ ܥܠܝܟܘܢ ܪܘܓܙܐ ܘܚܡܬܐ̇ ܡܢ ܩܕܡ ܡܪܝܐ ܘܐ̇ܡܪܬ. ܫܘܡܥܘܢܝ̇ ܥܡܘܪ̈ܐ݃ ܕܨܗܝܘܢ. ܐܝܬܝ ܓܝܪ ܥܠܝ ܡܪܝܐ ܐܠܗܐ̣. ܐܒܠܐ ܪܒܐ ܕܠܥܠܡ

¹⁰ ܚ̇ܙܝܬ ܓܝܪ ܒܫܒܝܐ ܕܒܢ̈ܝ ܘܕܒܢ̈ܬܝ ܕܐܝܬܝ ܥܠܝܗܘܢ ܡܪܐ ܥ̈ܠܡܐ

¹¹ ܪܒ̇ܝܬ ܐܢܘܢ ܓܝܪ ܒܚܕܘܬܐ̣ ܘܫ̇ܕܪܬ ܐܢܘܢ ܒܒܟܬܐ̇ ܘܒܐܒܠܐ̣ ܘܒܬܐ̈ܢܚܬܐ

¹² ܠܐ ܐܢܫ ܢܚܕܐ ܠܐܪܡܠܘܬܝ ܕܐܫܬܒܩܬ̇. ܘܨ̇ܕܝܬ ܡܢ ܥܡܐ ܣܓܝܐܐ. ܡܛܠ ܚ̈ܛܗܐ ܕܒܢ̈ܝ. ܡܛܠ ܕܣ̣ܛܘ ܡܢ ܐܘܪܚܗ ܕܡܪܝܐ ܐܠܗܐ̣

¹³ ܘܦܘܩ̈ܕܢܘܗܝ ܘܕܝܢ̣̈ܘܗܝ ܠܐ ܝܕܥܘ. ܐܦ ܠܐ ܗܠܟܘ ܒܐܘܪܚܐ ܕܦܘܩ̈ܕܢܘܗܝ ܕܐܠܗܐ. ܐܦ ܠܐ ܒܫܒܝܠܐ ܕܡܪܕܘܬܐ ܕܩܘܫܬܐ̇ ܒܙܕܝܩܘܬܐ

¹⁴ ܕܪܟܘ ܐܘ ܐ̣ܬܛܦܝܣܘ. ܐܢܬܘܢ ܥܡܘܪ̈ܐ ܕܨܗܝܘܢ̣. ܐܬ̣ܕܟܪܘ ܫܒܝܬܐ ܕܒܢ̈ܝ ܘܕܒܢ̈ܬܝ ܕܐܝܬܝ ܥܠܝܗܘܢ ܡܪܐ ܥ̈ܠܡܐ

¹⁵ ܐܝܬܝ ܓܝܪ ܥܠܝܗܘܢ ܥܡܐ̣ ܡܢ ܪܘܚܩܐ. ܥܡܐ ܚܨܝܦܐ ܘܡܡܠܠ ܒܠܫܢܐ ܐܚܪܢܐ. ܘܠܐ ܒܗܬܘ ܡܢ ܣܒ̈ܐ. ܘܥܠ ܥ̈ܠܝܡܐ̣ ܠܐ ܐܬܪܚ̇ܡܘ

¹⁶ ܘܫܒ̣ܘ ܘܕܒ̣ܪܘ ܠܚܒ̈ܝܒܝܗ̇ ܕܐܪܡܠܬܐ̣ ܘܠܒܢ̈ܬܗ̇. ܘܠܝܚܝܕܬܐ̇ ܘܠܡܫܘܚܕܬܐ̣ ܐܚܪܒܘ

¹⁷ ܐܢܐ ܓܝ̣ܪ ܠܐ ܡܫܟܚܐ ܐܢܐ ܕܐܥܕܪܟܘܢ

¹⁸ ܗ̇ܘ ܓܝܪ ܡ̇ܢ ܕܐܝܬܝ ܥܠܝܟܘܢ ܒܝܫܬܐ̣. ܗ̣ܘ ܦܪܩ̇ ܠܟܘܢ ܡܢ ܐܝܕܐ ܕܒ̈ܥܠܕܒܒܝܟܘܢ

¹⁹ ܙܠܘ ܒ̈ܢܝ̈ ܙܠܘ. ܐܢܐ ܓܝܪ ܐܫܬܒ̇ܩܬ ܚܪܒܬܐ̣ ܘܨ̇ܕܝܬܐ

²⁰ ܫ̇ܠܚܬ ܐܣܛܠܐ ܕܫ̇ܠܡܐ̣. ܘܠܒܫܬ ܣܩܐ ܒܒܥܘܬܝ. ܐܓܥܐ ܠܘܬܟ ܚܝ ܥ̈ܠܡܐ݃ ܒܝ̈ܘܡܬܐ

²¹ ܐܬܬܥܝܪܘ ܒܢܝ̣̈ ܘܓܥܘ ܠܘܬ ܡܪܝܐ. ܘܢܦܨܝܟܘܢ ܡܢ ܐ̈ܝܕܝ ܥܫܝ̈ܢܐ. ܘܡܢ ܐܝ̈ܕܝ ܫ̈ܠܝܛܢܐ. ܘܡܢ ܐ̈ܝܕܝ ܒ̈ܥܠܕܒܒܐ

²² ܐܢܐ ܓܝܪ ܣܒ̇ܪܬ ܥܠ ܚܝ ܥ̈ܠܡܐ ܠܦܘܪܩܢܟܘܢ. ܘܐܬܬ ܠܝ ܚܕܘܬܐ ܡܢ ܩܕܡ ܡܪܝܐ ܐܠܗܐ ܕܠܥܠܡ. ܡܛܠ ܕܒܥܓܠ ܐܬ̇ܪܚܡ ܥܠܝܗܘܢ. ܡܛܠ ܪ̈ܚܡܘܗܝ ܕܐܠܗܐ ܦܪܘܩܗܘܢ ܕܠܥܠܡ

²³ ܫܕܪܬܟܘܢ ܓܝܪ ܒܐܒܠܐ̣ ܘܒܒܟܬܐ. ܘܢܦܢܝܟܘܢ ܠܝ ܐܠܗܐ ܘܐܩ̇ܒܠܟܘܢ ܡܢܗ. ܒܚܕܘܬܐ̇ ܘܒܒܘܣܡܐ ܕܠܥܠܡ

²⁴ ܕܐܝܟܢܐ ܕܗܫܐ ܚܙܘ ܥܡܘܪ̈ܝܗ̇ ܕܨܗܝܘܢ ܫܒܝܬ̣ܟܘܢ̣. ܗܟܢܐ ܒܥܓܠ ܢܚܙܘܢ ܦܘܪܩܢܟܘܢ ܕܡܢ ܠܘܬ ܡܪܝܐ̣ ܐܠܗܢ̇. ܘܢܝܬܟܘܢ ܒܚܕܘܬܐ ܪܒܬܐ̇. ܘܒܬܫܒܘܚܬܐ ܘܒܢܘܗܪܗ ܕܡܪܐ ܥ̈ܠܡܐ

²⁵ ܒ̈ܢܝ̣ ܐܓܪܘ ܪܘܚܟܘܢ. ܘܣܝ̇ܒܪܘ ܪܘܓܙܐ ܕܡܢ ܡܪܝܐ ܐܠܗܐ ܐܬ̣ܐ ܥܠܝܟܘܢ. ܪܕܦܟ ܒܥܠܕܒܒܟ. ܡܛܠ ܗܢܐ̣ ܒܥܓܠ ܬܚܙܐ ܒܐܒܕܢܗ. ܘܥܠ ܨܘܪܗܘܢ ܬܕܪܘܟ

²⁶ ܡܦܢ̈ܩܝ̣ ܐܙܠ̣ܘ ܒܫܒܝܐ. ܘܗܠܟܘ ܒܐܘܪ̈ܚܬܐ ܩܫܝ̈ܬܐ ܕܥܪ̈ܡܐ. ܘܐ̇ܬܒܕܪܘ ܒܐܘܪ̈ܚܬܐ ܥܣ̈ܩܬܐ. ܘܐܬ̇ܒܕܪܘ̣ ܐܝܟ ܓܙܪܐ ܕܐܬܚ̣ܛܦ ܡܢ ܐ̈ܝܕܝ ܒ̈ܥܠܕܒܒܐ

²⁷ ܐܬܒܝܐܘ ܒ̈ܢܝ̈ ܘܐܙܥܩܘ ܠܘܬ ܡܪܝܐ ܐܠܗܐ. ܢܗܘܐ ܠܟܘܢ ܓܝܪ ܠܘܬ ܡܪܝܐ ܕܘܟܪܢܐ̇. ܡܢ ܗ̇ܘ ܕܐܝܬܝ ܥܠܝܟܘܢ ܗܠܝܢ

²⁸ ܡܛܠ ܕܐܝܟܢܐ ܕܛܥ̇ܐ ܗܘܐ ܪܥܝܢܟܘܢ ܡܢ ܡܪܝܐ̣. ܚܕ ܒܥܣܪ̈ܐ ܬܘܒܘ̣ ܘܐܬܦܢܘ ܠܘܬ ܡܪܝܐ. ܘܬܒܥܘܢܗ ܠܐܠܗܐ

²⁹ ܗ̇ܘ ܓܝܪ ܡ̇ܢ ܕܐܝܬܝ ܥܠܝܟܘܢ ܒܝ̣ܫܬܐ̣. ܗ̣ܘ ܢܝܬܐ ܥܠܝܟܘܢ ܚܕܘܬܐ̣ ܠܥܠܡ ܥܡ ܦܘܪܩܢܟܘܢ

³⁰ ܐܬܒܝܐ ܐܘܪܫܠܡ.. ܡܒܝܐ ܗܘ ܠܟܝ ܗ̇ܘ ܡ̇ܢ ܕܣܡ ܠܟܝ ܫܡܐ

³¹ ܢܕܚ̈ܠܢ ܡܕܝܢ̈ܬܐ ܐܝܠܝܢ ܕܐܒܐܫ ܠܟܝ ܘܚܕܝ ܥܠ ܡܦܘܠܬܟܝ

³² ܢܬܪ̈ܗܒܢ ܡܕܝܢ̈ܬܐ ܐܝܠܝܢ ܕܫܥ̣ܒܕ ܠܒܢܝ̈ܟܝ. ܬܚܕܝܢ ܥܠ ܡܦܘܠܬܗܝܢ. ܢܕܚܠܘܢ ܐܝܠܝܢ ܕܐܒܐܫܘ ܠܟܝ. ܬܬ̣ܪܗܒ ܗ̇ܝ ܕܩܒ̣ܠܬ ܠܒܢܝ̈ܟܝ

³³ ܐܝܟܢܐ ܓܝܪ ܕܚ̇ܕ̣ܝܬ ܥܠ ܡܦܘܠܬܟܝ̣. ܗܟܢܐ ܬܬܥܝܩ ܘܬ̇ܟܪܐ ܠܗ̇ ܥܠ ܚܘܪܒܗ̇

³⁴ ܘܐܫܩܘܠ ܡܢܗ̇ ܓܠܝ̈ܦܐ. ܘܕܝܨ̇ܐ ܕܟܢ̈ܫܐ ܣ̈ܓܝܐܐ ܘܚܕܘܬܗ̇ ܬܗܘܐ ܠܐܒܠܐ

³⁵ ܢܘܪܐ ܓܝܪ ܬܫܬܕܪ ܥܠܝܗ̇ ܡܢ ܠܘܬ ܚܝ ܥ̈ܠܡܐ̣ ܢܘܓܪܐ̣ ܕܝܘ̈ܡܬܐ. ܘܢܥܡ̣ܪܘܢ ܒܗ̇ ܫܐ̈ܕܐ ܟܠܗ ܙܒܢܐ

³⁶ ܚܘܪܝ ܠܡ̣ܕܢܚܐ ܐܘܪܫܠܡ.. ܘܚܙܝ ܚܕܘܬܐ ܕܡܢ ܠܘܬ ܐܠܗܐ ܐܬܝܐ ܠܟܝ

³⁷ ܗܐ ܓܝܪ ܐܬ̇ܝܢ ܠܟܝ ܒܢܝ̈ܟܝ ܐܝܠܝܢ ܕܫܕܪܬܝ. ܐܬ̇ܝ̣ܢ ܘܡܬ̇ܟܢܫܝܢ. ܡܢ ܡܕܢܚ̈ܘܗܝ ܕܫܡܫܐ ܘܥܕܡܐ ܠܡܥܪ̈ܒܘܗܝ. ܒܡܠܬܗ ܕܡܪܝܐ ܐܠܗܐ ܩܕܝܫܐ. ܘܚ̇ܕܝܢ ܒܬܫܒܘܚܬܗ ܕܐܠܗܐ.