Giobbe איוב Iyov 23

Modern Hebrew Bible	תנ"ך - מקרא על פי המסורה
¹ ויען איוב ויאמר	¹ וַיַּעַן אִיֹּוב וַיֹּאמַר
² גם היום מרי שחי ידי כבדה על אנחתי	² גַּם־הַיֹּום מְרִי שִׂחִי יָדִי כָּבְדָה עַל־אַנְחָתִי
³ מי יתן ידעתי ואמצאהו אבוא עד תכונתו	³ מִי־יִתֵּן יָדַעְתִּי וְאֶמְצָאֵהוּ אָבֹוא עַד־תְּכוּנָתֹו
⁴ אערכה לפניו משפט ופי אמלא תוכחות	⁴ אֶעֶרְכָה לְפָנָיו מִשְׁפָּט וּפִי אֲמַלֵּא תֹוכָחֹות
⁵ אדעה מלים יענני ואבינה מה יאמר לי	⁵ אֵדְעָה מִלִּים יַעֲנֵנִי וְאָבִינָה מַה־יֹּאמַר לִי
⁶ הברב כח יריב עמדי לא אך הוא ישם בי	⁶ הַבְּרָב־כֹּחַ יָרִיב עִמָּדִי לֹא אַךְ־הוּא יָשִׂם בִּי
⁷ שם ישר נוכח עמו ואפלטה לנצח משפטי	⁷ שָׁם יָשָׁר נֹוכָח עִמֹּו וַאֲפַלְּטָה לָנֶצַח מִשֹּׁפְטִי
⁸ הן קדם אהלך ואיננו ואחור ולא אבין לו	⁸ הֵן קֶדֶם אֶהֱלֹךְ וְאֵינֶנּוּ וְאָחֹור וְלֹא־אָבִין לֹו
⁹ שמאול בעשתו ולא אחז יעטף ימין ולא אראה	⁹ שְׂמֹאול בַּעֲשֹׂתֹו וְלֹא־אָחַז יַעְטֹף יָמִין וְלֹא אֶרְאֶה
¹⁰ כי ידע דרך עמדי בחנני כזהב אצא	¹⁰ כִּי־יָדַע דֶּרֶךְ עִמָּדִי בְּחָנַנִי כַּזָּהָב אֵצֵא
¹¹ באשרו אחזה רגלי דרכו שמרתי ולא אט	¹¹ בַּאֲשֻׁרֹו אָחֲזָה רַגְלִי דַּרְכֹּו שָׁמַרְתִּי וְלֹא־אָט
¹² מצות שפתיו ולא אמיש מחקי צפנתי אמרי פיו	¹² מִצְוַת פָתָיו וְלֹא אָמִישׁ מֵחֻקִּי צָפַנְתִּי אִמְרֵי־פִיו
¹³ והוא באחד ומי ישיבנו ונפשו אותה ויעש	¹³ וְהוּא בְאֶחָד וּמִי יְשִׁיבֶנּוּ וְנַפְשֹׁו אִוְּתָה וַיָּעַשׂ
¹⁴ כי ישלים חקי וכהנה רבות עמו	¹⁴ כִּי יַשְׁלִים חֻקִּי וְכָהֵנָּה רַבֹּות עִמֹּו
¹⁵ על כן מפניו אבהל אתבונן ואפחד ממנו	¹⁵ עַל־כֵּן מִפָּנָיו אֶבָּהֵל אֶתְבֹּונֵן וְאֶפְחַד מִמֶּנּוּ
¹⁶ ואל הרך לבי ושדי הבהילני	¹⁶ וְאֵל הֵרַךְ לִבִּי וְשַׁדַּי הִבְהִילָנִי
¹⁷ כי לא נצמתי מפני חשך ומפני כסה אפל	¹⁷ כִּי־לֹא נִצְמַתִּי מִפְּנֵי־חֹשֶׁךְ וּמִפָּנַי כִּסָּה־אֹפֶל