Ester ܐܣܬܝܪ 3

¹ ܘܒܬܪ ܡ̈ܠܐ ܗܠܝ̣ܢ. ܐܘܪܒ ܡ̇ܠܟܐ ܐܚܫܝܪܝܫ ܠܗܡ̣ܢ ܒܪܗܡܕܬ ܐܓܓܝܐ ܘܐܪܝܡܗ. ܘܐܪܝܡ ܟܘܪܣܝܗ ܠܥܠ ܡܢ ܟܘܠܗܘܢ ܪ̈ܘܪܒܢܐ ܕܥܡܗ.

² ܘܟܠܗܘܢ ܥܒ̣̈ܕܐ ܕܡ̇ܠܟܐ ܕܒܬܪܥܐ ܕܡ̇ܠܟܐ. ܒ̇ܪܟܝܢ ܗܘܘ ܘܣܓܕܝܢ ܠܗܡܢ. ܡܛܠ ܕܗܟܢܐ ܦܩ̣ܕ ܥܠܘܗܝ ܡ̇ܠܟܐ. ܘܡܘܪܕܟܝ̣ ܠܐ ܒ̇ܪܟ ܗܘܐ ܘܣ̇ܓܕ.

³ ܘܐܡ̇ܪܝܢ ܥ̈ܒ̣ܕܐ ܕܡ̇ܠܟܐ ܕܒܬܪܥܐ ܕܡ̇ܠܟܐ ܠܡܘܪܕܟܝ. ܠܡܢܐ ܥ̇ܒܪ ܐܢܬ ܥܠ ܦܘܩܕܢܐ ܕܡ̇ܠܟܐ.

⁴ ܘܟܕ ܐܡ̇ܪܝܢ ܗܘܘ ܟܠܝܘܡ ܘܠܐ ܫܡ̇ܥ ܗܘܐ ܠܗܘܢ܆ ܚܘ̇ܝܘ ܠܗܡܢ ܕܢܕܥܘܢ ܐܢ ܫܪ̈ܝܪܢ ܡ̈ܠܘܗܝ ܕܡܘܪܕܟܝ. ܡܛܠ ܕܚ̇ܘܝ ܐܢܘܢ ܕܝܗܘܕܝܐ ܗܘ.

⁵ ܘܚ̣ܙܐ ܗܡܢ ܕܡܘܪܕܟܝ ܠܐ ܒ̇ܪܟ ܗܘܐ ܘܣ̇ܓܕ ܠܗ܆ ܘܐܬܡܠܝ ܗܡܢ ܚܡܬܐ ܥܠ ܡܘܪܕܟܝ.

⁶ ܘܒܨܝܪܐ ܗܘܬ ܥܒܝܕܬܐ ܕܢܘܫܛ ܐܝܕ̣ܗ ܥܠ ܡܘܪܕܟܝ ܒܠܚܘܕܘܗܝ. ܡܛܠ ܕܚܘ̇ܝܘܗܝ ܥܡܗ ܕܡܘܪܕܟܝ. ܘܒܥ̣ܐ ܗܡܢ ܠܟܠܗܘܢ ܝܗܘ̈ܕܝܐ ܕܒܟܘܠܗ̇ ܡܠܟܘܬܗ ܕܐܚܫܝܪܝܫ ܥܡܗ ܕܡܘܪܕܟܝ ܀

⁷ ܒܝܪܚܐ ܩܕܡܝܐ ܕܗ̣ܘ ܢܝܣܢ. ܒܫܢܬ ܬܪ̈ܬܥܣܪܐ ܕܡ̇ܠܟܐ ܐܚܫܝܪܝܫ. ܐܪܡܝܘ ܦ̈ܨܐ. ܘܗ̈ܘܝ ܦܨ̈ܐ ܩܕܡ ܗܡܢ. ܡܢ ܝܘܡ ܠܝܘܡ. ܘܡܢ ܐܝܪܚ ܠܐܝܪܚ. . ܒܝܪܚܐ ܕܬܪܥܣܪ ܕܗ̣ܘ ܐܕܪ.

⁸ ܐܡ̣ܪ ܗܡܢ ܠܡ̇ܠܟܐ ܐܚܫܝܪܝܫ. ܐܝܬ ܥܡܐ ܚܕ ܡ̇ܒܕܪ ܘܡ̇ܒܙܩ̣ ܒܟܠܗܝܢ ܡܕܝ̈ܢܬܗ ܕܡ̇ܠܟܐ ܐܚܫܝܪܝܫ. ܢܡܘ̈ܣܝܗܘܢ ܦܪܝܫܝܢ ܡܢ ܟܠ ܥܡ. ܘܢܡܘܣܐ ܕܡ̇ܠܟܐ. ܠܐ ܥ̇ܒܕܝܢ. ܘܠܡ̇ܠܟܐ ܠܐ ܘ̇ܠܐ ܠܡܫܒܩ ܐܢܘܢ

⁹ ܐܢ ܥܠ ܡ̇ܠܟܐ ܫܦܝܪ܆ ܢ̇ܟܬܘܒ̣ ܕܢܐܒܕܘܢ܆ ܘܥܣܪ̈ܐ ܐ̈ܠܦܝܢ ܟܟܪ̈ܐ ܕܟܣܦܐ܆ ܐܬܩܘܠ ܥܠ ܐܝ̣ܕܐ ܕ̇ܥܒ̈ܕܝ ܥ̇ܒܕܐ܇ ܠܡܥܠܘ ܠܓܙܐ ܕܡ̇ܠܟܐ.

¹⁰ ܘܫܩ̣ܠ ܡ̇ܠܟܐ ܥܙܩܬܐ ܡܢ ܐܝܕܗ̣. ܘܝܗ̣ܒ ܠܗܡܢ ܒܪ ܗܡܕ̣ܬ ܐܓܓܝܐ ܒܥܠܕܒܒܐ ܕܝܗܘܕ̈ܝܐ.

¹¹ ܘܐܡ̣ܪ ܡ̇ܠܟܐ. ܟܣܦܟ ܝܗܝܒ ܠܟ. ܘܥܡܐ ܠܡܥܒܕ ܠܗ ܟܘܠ ܡܕܡ ܕܫܦܝܪ ܒܥ̈ܝܢܝܟ ܀܀

¹² ܘܐܬܩܪܝܘ ܣ̇ܦܪ̈ܐ ܕܡ̇ܠܟܐ ܒܙܒܢܐ ܗ̇ܘ. ܒܝܪܚܐ ܩܕܡܝܐ ܒܬܠܬܥܣܪܐ ܒܗ ܒܝܪܚܐ܆ ܐܬܟܬܒ ܟܠܡܕܡ ܕܦ̇ܩܕ ܗܡܢ ܠܪ̈ܒܝ ܚ̈ܝܠܐ ܕܡ̇ܠܟܐ܇ ܘܠܡܪ̈ܘܬܐ ܕܒܟܠ ܡܕܝܢܐ ܘܡܕܝܢܐ. ܘܠܪ̈ܘܪܒܢܝ ܥܡ̈ܡܐ. ܠܡܕܝܢܬܐ ܐܝܟ ܟܬܒܗ̇܆ ܘܠܥܡܐ ܐܝܟ ܠܫܢܗ. ܒܫܡ ܡ̇ܠܟܐ ܐܚܫܝܪܝܫ ܐܬܟܬܒ. ܘܐܬܚܬܡ ܒܥܙܩܬܐ ܕܡ̇ܠܟܐ܆

¹³ ܘܐܫܬܕܪ ܐܓܪ̈ܬܐ ܒܝܕ ܪ̈ܗܛܐ܇ ܠܟܠܗܝܢ ܡܕܝܢ̈ܬܗ ܕܡ̇ܠܟܐ܇ ܠܡܚܪܒ ܘܠܡܩܛܠ܇ ܘܠܡܘܒܕܘ ܠܟܠܗܘܢ ܝܗܘ̈ܕܝܐ. ܡܢ ܥܠܝܡ̈ܐ܆ ܘܥܕܡܐ ܠܣܒ̈ܐ. ܘ̈ܛܠܝܐ ܘܢܫ̈ܐ ܒܚܕ ܝܘܡ. ܒܬ̇ܠܬܥܣܪܐ ܒܐܝܪܚ ܐܕܪ. ܘܢܟܣܝܗܘܢ ܠܒܙܬܐ ܒܚܕ ܝܘܡ. ܒܐܝܪܚ ܐܕܪ ܒܬܠܬܥܣܪܐ ܐܬܟܬܒ.

¹⁴ ܘܦܪܫܓܢܗ ܕܟܬܒܐ܆ ܐܬܝܗܒ ܒܟܠ ܡܕܝܢܐ ܘܡܕܝܢܐ. ܘܦ̇ܩܕ ܠܟ̇ܠܗܘܢ ܥܡ̈ܡܐ ܕܢܗܘܘܢ ܡܛܝܒܝܢ ܠܝܘܡܐ ܗܢܐ.

¹⁵ ܘܪ̈ܗܛܐ ܢܦ̣ܩܘ ܟܕ ܡܣܪܗܒܝܢ ܒܦܘܩܕܢܐ ܕܡ̇ܠܟܐ. ܘܦܬܓܡܐ ܐܬܦܩܕ ܒܫܘܫܢ ܒܝܪܬܐ. ܘܡ̇ܠܟܐ ܘܗܡܢ ܐܣܬܡܟܘ ܠܡܫܬܐ ܐܟܚܕܐ. ܘܡܕܝܢܬܐ ܫܘܫܢ ܐܫܬܓ̣ܫܬ.