Gioele ܝܘܐܝܠ 4

¹ ܡܛܠ ܕܒܝ̈ܘܡܬܐ ܗ̇ܢܘܢ ܘܒܙܒܢܐ ܗ̇ܘ ܕܡܗܦܟ ܐܢܐ ܫܒܝܬܐ ܕܝܗܘܕܐ ܘܕܐܘܪܫܠܡ

² ܐܟܢܫ ܠܟܠܗܘܢ ܥܡ̈ܡܐ ܘܐܚܬ ܐܢܘܢ ܠܢܚܠܐ ܕܝܘܫܦܛ ܘܐܕܘܢ ܥܡܗܘܢ ܬܡܢ ܥܠ ܐ̈ܦܝ ܥܡܝ ܘܥܠ ܐ̈ܦܝ ܐܝܣܪܝܠ ܝܪܬܘܬܝ ܕܐܬܒܕܪܘ ܒܝܬ ܥܡ̈ܡܐ ܥܠ ܕܦܠܓܘ ܐܪܥܝ

³ ܘܥܠ ܥܡܝ ܐܪܡܝܘ ܦܨ̈ܐ ܘܝܗܒܘ ܛ̈ܠܝܐ ܒܐܓܪ ܙܢܝ̈ܬܐ ܘܛܠܝ̈ܬܐ ܙܒܢܘ ܒܚܡܪܐ ܘܐܫܬܝܘ

⁴ ܡܢܐ ܚܫܝ̈ܒܢ ܐܢܬܝܢ ܠܝ ܨܘܪ ܘܨܝܕܢ ܘܟܠܗ ܓܠܝܠܐ ܕܦܠܫܬ ܕܠܡܐ ܦܘܪܥܢܐ ܦܪܥܝܢ ܐܢܬܘܢ ܠܝ ܘܐܢ ܚ̈ܘܒܠܐ ܪܡܝܢ ܐܢܬܘܢ ܥܠܝ ܒܥܓܠ ܘܡܣܪܗܒܐܝܬ ܐܗܦܟ ܦܘܪܥܢܟܘܢ ܒܪܝܫܟܘܢ

⁵ ܥܠ ܕܢܣܒܬܘܢ ܟܣܦܝ ܘܕܗܒܝ ܘܡܐ̈ܢܝ ܫܦܝܪ̈ܐ ܐܥܠܬܘܢ ܠܗܝ̈ܟܠܝܟܘܢ

⁶ ܘܒܢ̈ܝ ܝܗܘܕܐ ܘܒܢ̈ܝ ܐܘܪܫܠܡ ܙܒܢܬܘܢ ܠܒܢ̈ܝ ܝܘ̈ܢܝܐ ܕܬܪܚܩܘܢ ܐܢܘܢ ܡܢ ܬܚܘܡܗܘܢ

⁷ ܗܐ ܐܢܐ ܡܥܝܪ ܐܢܐ ܠܗܘܢ ܡܢ ܐܬܪܐ ܕܙܒܢܬܘܢ ܐܢܘܢ ܠܬܡܢ ܘܐܗܦܟ ܦܘܪܥܢܟܘܢ ܒܪܝܫܟܘܢ

⁸ ܘܐܫܠܡ ܒ̈ܢܝܟܘܢ ܘܒܢ̈ܬܟܘܢ ܒܝܕ ܒܢ̈ܝ ܝܗܘܕܐ ܘܢܙܒܢܘܢ ܐܢܘܢ ܠܫܒܐ ܠܥܡܐ ܪܚܝܩܐ ܡܛܠ ܕܡܪܝܐ ܡܠܠ

⁹ ܐܟܪܙܘ ܗܕܐ ܒܝܬ ܥܡ̈ܡܐ ܩܕܫܘ ܩܪܒܐ ܐܥܝܪܘ ܠܓܢܒܪ̈ܐ ܢܩܪܒܘܢ ܘܢܣܩܘܢ ܟܠܗܘܢ ܓܒܪ̈ܐ ܩܪ̈ܒܬܢܐ

¹⁰ ܪܘܥܘ ܣ̈ܟܝ ܦܕܢܝ̈ܟܘܢ ܠܣ̈ܝܦܐ ܘܡ̈ܓܠܝܟܘܢ ܠܪ̈ܘܡܚܐ ܘܡ̇ܢ ܕܚܠܫ ܢܐܡܪ ܕܓܢܒܪܐ ܐܢܐ

¹¹ ܐܬܟܢܫܘ ܘܬܘ ܟܠܟܘܢ ܥܡ̈ܡܐ ܕܚܕܝܪ̈ܝܢ ܐܬܩܪܒܘ ܘܬܡܢ ܬܒܪ ܡܪܝܐ ܓܢܒܪܘܬܟܘܢ

¹² ܢܬܬܥܝܪܘܢ ܘܢܣܩܘܢ ܥܡ̈ܡܐ ܠܥܘܡܩܐ ܕܝܘܫܦܛ ܡܛܠ ܕܬܡܢ ܐܬܒ ܠܡܕܢ ܠܟܠܗܘܢ ܥܡ̈ܡܐ ܕܚܕܝܪ̈ܝܢ

¹³ ܫܪܪܘ ܡ̈ܓܠܐ ܡܛܠ ܕܒܫܠ ܩܛܦܐ ܥܘܠܘ ܕܘܫܘ ܡܛܠ ܕܡܠܘ ܓܘ̈ܒܐ ܘܫܦܥ ܡܥܨܪ̈ܬܐ ܡܛܠ ܕܣܓܝܬ ܒܝܫܘܬܗܘܢ

¹⁴ ܪܓܫܐ ܕܪ̈ܓܘܫܝܐ ܒܥܘܡܩܐ ܕܦܣ̈ܝܩܬܐ ܡܛܠ ܕܩܪܝܒ ܗܘ ܝܘܡܗ ܕܡܪܝܐ ܒܥܘܡܩܐ ܕܦܣܝ̈ܩܬܐ

¹⁵ ܫܡܫܐ ܘܣܗܪܐ ܚܫܟܘ ܘܥܪܒ ܢܘܗܪܐ ܕܟܘ̈ܟܒܐ

¹⁶ ܘܡܪܝܐ ܡܢ ܨܗܝܘܢ ܢܢܗܡ ܘܡܢ ܐܘܪܫܠܡ ܢܬܠ ܩܠܗ ܘܢܙܘܥܘܢ ܫܡܝܐ ܘܐܪܥܐ ܘܡܪܝܐ ܢܚܘܣ ܥܠ ܥܡܗ ܘܢܚܝܠ ܠܒܢ̈ܝ ܐܝܣܪܝܠ

¹⁷ ܘܬܕܥܘܢ ܕܐܢܐ ܐܢܐ ܡܪܝܐ ܐܠܗܟܘܢ ܕܥܡܪ ܐܢܐ ܒܨܗܝܘܢ ܛܘܪܐ ܕܩܘܕܫܝ ܘܬܗܘܐ ܐܘܪܫܠܡ ܩܕܝܫܐ ܘܢܘܟܪ̈ܝܐ ܬܘܒ ܠܐ ܢܥܡܪܘܢ ܒܗ̇

¹⁸ ܒܗ ܒܝܘܡܐ ܗ̇ܘ ܢܛܦܘܢ ܛܘܪ̈ܐ ܚܠܝܘܬܐ ܘܪ̈ܡܬܐ ܢܪ̈ܕܝܢ ܚܠܒܐ ܘܟܠܗܘܢ ܦܨ̈ܝܕܐ ܕܝܗܘܕܐ ܢܪܕܘܢ ܡ̈ܝܐ ܘܡܒܘܥܐ ܡܢ ܒܝܬܗ ܕܡܪܝܐ ܢܦܘܩ ܘܢܫܩܐ ܠܢܚܠܐ ܕܣܛܝܡ

¹⁹ ܡܨܪܝܢ ܠܚܒܠܐ ܬܗܘܐ ܘܐܕܘܡ ܠܡܕܒܪܐ ܚܪܒܐ ܡܢ ܚܛܘܦܝܐ ܕܒܢ̈ܝ ܝܗܘܕܐ ܕܐܫܕܘ ܕܡܐ ܙܟܝܐ ܒܐܪܥܗܘܢ

²⁰ ܝܗܘܕܐ ܠܥܠܡ ܬܬܒ ܘܐܘܪܫܠܡ ܠܕܪ̈ܕܪܝܢ

²¹ ܘܐܬܒܥ ܕܡܗܘܢ ܘܠܐ ܐܚܣܐ ܘܡܪܝܐ ܥܡܪ ܒܨܗܝܘܢ