Malachia ܡܠܐܟ̣ܝ 2

¹ ܡܟܝܠ ܦܘܩܕܢܐ ܗܢܐ ܥܠܝܟܘܢ ܗܘ ܟܗ̈ܢܐ

² ܐܠܐ ܬܫܡܥܘܢ ܘܐܠܐ ܬܣܝܡܘܢ ܒܠܒܟܘܢ ܠܡܬܠ ܐܝܩܪܐ ܠܫܡܝ ܐܡܪ ܡܪܝܐ ܚܝܠܬܢܐ ܐܫܕܪ ܥܠܝܟܘܢ ܠܘ̈ܛܬܐ ܘܐܠܘܛ ܒܘܪ̈ܟܬܟܘܢ ܡܛܠ ܕܠܐ ܣܝܡܝܢ ܐܢܬܘܢ ܒܠܒܟܘܢ

³ ܗܐ ܓܥܪ ܐܢܐ ܒܙܪܥܐ ܕܐܪܥܐ ܘܐܕܪܐ ܦܪܬܐ ܥܠ ܐ̈ܦܝܟܘܢ ܘܦܪܬܐ ܥܠ ܥܕܥܐ̈ܕܝܟܘܢ ܘܐܫܩܘܠܟܘܢ ܒܗ̇

⁴ ܘܬܕܥܘܢ ܕܫܕܪܬ ܠܟܘܢ ܦܘܩܕܢܐ ܗܢܐ ܕܬܗܘܐ ܕܝܬܩܐ ܥܡ ܠܘܝ ܐܡܪ ܡܪܝܐ ܚܝܠܬܢܐ

⁵ ܩܝܡܝ ܗܘܐ ܥܡܗ ܚ̈ܝܐ ܘܫܠܡܐ ܝܗܒܬ ܐܢܘܢ ܠܗ ܕܚܠܬܐ ܕܚܠ ܡܢܝ ܘܡܢ ܩܕܡ ܫܡܝ ܙܐܥ ܗܘܐ

⁶ ܢܡܘܣܐ ܕܩܘܫܬܐ ܗܘܐ ܒܦܘܡܗ ܘܥܘܠܐ ܠܐ ܐܫܬܟܚ ܒܣ̈ܦܘܬܗ ܒܫܠܡܐ ܘܒܬܪܝܨܘܬܐ ܗܠܟ ܥܡܝ ܘܣ̈ܓܝܐܐ ܐܗܦܟ ܡܢ ܥܘܠܐ

⁷ ܡܛܠ ܕܣ̈ܦܘܬܗ ܕܟܗܢܐ ܢܛܪ̈ܢ ܐܝܕܥܬܐ ܘܢܡܘܣܐ ܫܐܠܝܢ ܡܢ ܦܘܡܗ ܡܛܠ ܕܡܠܐܟܗ ܗܘ ܕܡܪܝܐ ܚܝܠܬܢܐ

⁸ ܐܢܬܘܢ ܕܝܢ ܣܛܝܬܘܢ ܡܢ ܐܘܪܚܐ ܘܐܟܫܠܬܘܢ ܠܣ̈ܓܝܐܐ ܡܢ ܢܡܘܣܐ ܘܚܒܠܬܘܢ ܩܝܡܐ ܕܠܘܝ ܐܡܪ ܡܪܝܐ ܚܝܠܬܢܐ

⁹ ܐܦ ܐܢܐ ܝܗܒܬܟܘܢ ܫܝܛܝܢ ܘܡܟܝܟܝܢ ܒܟܠ ܥܡ ܥܠ ܕܠܐ ܢܛܪܬܘܢ ܐܘܪ̈ܚܬܝ ܘܢܣܒܬܘܢ ܒܐ̈ܦܐ ܒܢܡܘܣܐ

¹⁰ ܕܠܡܐ ܠܐ ܗܘܐ ܚܕ ܐܒܐ ܠܟܠܢ ܐܘ ܠܐ ܗܘܐ ܚܕ ܐܠܗܐ ܒܪܢ ܠܡܢܐ ܡܕܓܠܝܢܢ ܓܒܪ ܒܐܚܘܗܝ ܘܡܛܢܦܝܢܢ ܩܝܡܐ ܕܐ̈ܒܗܝܢ

¹¹ ܕܓܠ ܝܗܘܕܐ ܘܛܢܦܘܬܐ ܐܬܥܒܕܬ ܒܐܝܣܪܝܠ ܘܒܐܘܪܫܠܡ ܡܛܠ ܕܛܢܦ ܝܗܘܕܐ ܩܘܕܫܗ ܕܡܪܝܐ ܚܝܠܬܢܐ ܘܪܚܡ ܘܦܠܚ ܠܐ̈ܠܗܐ ܢܘܟܪ̈ܝܐ

¹² ܢܘܒܕ ܡܪܝܐ ܠܓܒܪܐ ܕܢܥܒܕ ܗܕܐ ܘܠܒܪܗ ܘܠܒܪ ܒܪܗ ܡܢ ܡܫܟܢܗ ܕܝܥܩܘܒ ܘܠܐ ܢܗܘܐ ܠܗ ܕܡܩܪܒ ܩܘܪܒܢܐ ܠܡܪܝܐ ܚܝܠܬܢܐ

¹³ ܘܗܕܐ ܐܚܪܬܐ ܕܥܒܕܬܘܢ ܟܣܝܬ ܕܡܥܬܐ ܠܒܝܬܗ ܕܡܪܝܐ ܘܒܟܬܐ ܘܬܢܚ̈ܬܐ ܡܛܠ ܕܠܐ ܡܬܦܢܐ ܥܠ ܩܘܪ̈ܒܢܝܟܘܢ ܘܠܐ ܡܩܒܠ ܠܗ ܠܨܒܝܢܐ ܡܢ ܐ̈ܝܕܝܟܘܢ

¹⁴ ܘܐܢ ܐܡܪܝܢ ܐܢܬܘܢ ܥܠ ܡܢܐ ܥܠ ܕܐܣܗܕ ܡܪܝܐ ܒܝܢܝܟ ܠܐܢܬܬ ܛܠܝܘܬܟ ܕܐܢܬ ܕܓܠܬ ܒܗ̇ ܘܗܝ ܫܘܬܦܬܟ ܘܐܢܬܬ ܩܝܡܟ

¹⁵ ܕܠܡܐ ܠܐ ܗܘܐ ܚܕ ܓܒܪ ܘܫܪܟܐ ܕܪ̈ܘܚܬܐ ܕܝܠܗ ܗܘ ܚܕ ܒܥܐ ܙܪܥܐ ܡܢ ܐܠܗܐ ܐܙܕܗܪܘ ܒܪܘܚܟܘܢ ܘܐܢܫ ܒܐܢܬܬ ܛܠܝܘܬܗ ܠܐ ܢܕܓܠ

¹⁶ ܐܡܪ ܡܪܝܐ ܚܝܠܬܢܐ ܐܠܗܐ ܕܐܝܣܪܝܠ ܘܥܘܠܐ ܒܡܪܛܘܛܗ ܠܐ ܢܟܣܐ ܐܡܪ ܡܪܝܐ ܚܝܠܬܢܐ ܐܙܕܗܪܘ ܒܪܘܚܟܘܢ ܘܠܐ ܬܕܓܠܘܢ

¹⁷ ܐܠܐܝܬܘܢ ܠܡܪܝܐ ܒܦܬ̈ܓܡܝܟܘܢ ܘܐܢ ܐܡܪܝܢ ܐܢܬܘܢ ܒܡܢܐ ܐܠܐܝܢܝܗܝ ܒܕܐܡܪܝܢ ܐܢܬܘܢ ܕܟܠ ܕܥܒܕ ܕܒܝܫ ܫܦܝܪ ܒܥܝܢ̈ܝ ܡܪܝܐ ܘܒܗܘܢ ܗܘ ܨܒܐ ܘܐܠܐ ܐܝܟܘ ܐܠܗܐ ܕܕܐܢ ܕܝ̈ܢܐ