Salmi תהילים (Tehillim) 69

Torna indietro

Modern Hebrew Bible	תנ"ך - מקרא על פי המסורה
¹ למנצח על שושנים לדוד הושיעני אלהים כי באו מים עד נפש	¹ לַמְנַצֵּחַ עַל־שֹׁושַׁנִּים לְדָוִד
² טבעתי ביון מצולה ואין מעמד באתי במעמקי מים ושבלת שטפתני	² הֹושִׁיעֵנִי אֱלֹהִים כִּי בָאוּ מַיִם עַד־נָפֶשׁ
³ יגעתי בקראי נחר גרוני כלו עיני מיחל לאלהי	³ טָבַעְתִּי ׀ בִּיוֵן מְצוּלָה וְאֵין מָעֳמָד בָּאתִי בְמַעֲמַקֵּי־מַיִם וְשִׁבֹּלֶת שְׁטָפָתְנִי
⁴ רבו משערות ראשי שנאי חנם עצמו מצמיתי איבי שקר אשר לא גזלתי אז אשיב	⁴ יָגַעְתִּי בְקָרְאִי נִחַר גְּרֹונִי כָּלוּ עֵינַי מְיַחֵל לֵאלֹהָי
⁵ אלהים אתה ידעת לאולתי ואשמותי ממך לא נכחדו	⁵ רַבּוּ ׀ מִשַּׂעֲרֹות רֹאשִׁי שֹׂנְאַי חִנָּם עָצְמוּ מַצְמִיתַי אֹיְבַי שֶׁקֶר אֲשֶׁר לֹא־גָזַלְתִּי אָז אָשִׁיב
⁶ אל יבשו בי קויך אדני יהוה צבאות אל יכלמו בי מבקשיך אלהי ישראל	⁶ אֱ‍לֹהִים אַתָּה יָדַעְתָּ לְאִוַּלְתִּי וְאַשְׁמֹותַי מִמְּךָ לֹא־נִכְחָדוּ
⁷ כי עליך נשאתי חרפה כסתה כלמה פני	⁷ אַל־יֵבֹשׁוּ בִי ׀ קֹוֶיךָ אֲדֹנָי יְהוִה צְבָאֹות אַל־יִכָּלְמוּ בִי מְבַקְשֶׁיךָ אֱלֹהֵי יִשְׂרָאֵל
⁸ מוזר הייתי לאחי ונכרי לבני אמי	⁸ כִּי־עָלֶיךָ נָשָׂאתִי חֶרְפָּה כִּסְּתָה כְלִמָּה פָנָי
⁹ כי קנאת ביתך אכלתני וחרפות חורפיך נפלו עלי	⁹ מוּזָר הָיִיתִי לְאֶחָי וְנָכְרִי לִבְנֵי אִמִּי
¹⁰ ואבכה בצום נפשי ותהי לחרפות לי	¹⁰ כִּי־קִנְאַת בֵּיתְךָ אֲכָלָתְנִי וְחֶרְפֹּות חֹורְפֶיךָ נָפְלוּ עָלָי
¹¹ ואתנה לבושי שק ואהי להם למשל	¹¹ וָאֶבְכֶּה בַצֹּום נַפְשִׁי וַתְּהִי לַחֲרָפֹות לִי
¹² ישיחו בי ישבי שער ונגינות שותי שכר	¹² וָאֶתְּנָה לְבוּשִׁי שָׂק וָאֱהִי לָהֶם לְמָשָׁל
¹³ ואני תפלתי לך יהוה עת רצון אלהים ברב חסדך ענני באמת ישעך	¹³ יָשִׂיחוּ בִי יֹשְׁבֵי שָׁעַר וּנְגִינֹות שֹׁותֵי שֵׁכָר
¹⁴ הצילני מטיט ואל אטבעה אנצלה משנאי וממעמקי מים	¹⁴ וַאֲנִי תְפִלָּתִי־לְךָ ׀ יְהוָה עֵת רָצֹון אֱלֹהִים בְּרָב־חַסְדֶּךָ עֲנֵנִי בֶּאֱמֶת יִשְׁעֶךָ
¹⁵ אל תשטפני שבלת מים ואל תבלעני מצולה ואל תאטר עלי באר פיה	¹⁵ הַצִּילֵנִי מִטִּיט וְאַל־אֶטְבָּעָה אִנָּצְלָה מִשֹּׂנְאַי וּמִמַּעֲמַקֵּי־מָיִם
¹⁶ ענני יהוה כי טוב חסדך כרב רחמיך פנה אלי	¹⁶ אַל־תִּשְׁטְפֵנִי ׀ שִׁבֹּלֶת מַיִם וְאַל־תִּבְלָעֵנִי מְצוּלָה וְאַל־תֶּאְטַר־עָלַי בְּאֵר פִּיהָ
¹⁷ ואל תסתר פניך מעבדך כי צר לי מהר ענני	¹⁷ עֲנֵנִי יְהוָה כִּי־טֹוב חַסְדֶּךָ כְּרֹב רַחֲמֶיךָ פְּנֵה אֵלָי
¹⁸ קרבה אל נפשי גאלה למען איבי פדני	¹⁸ וְאַל־תַּסְתֵּר פָּנֶיךָ מֵעַבְדֶּךָ כִּי־צַר־לִי מַהֵר עֲנֵנִי
¹⁹ אתה ידעת חרפתי ובשתי וכלמתי נגדך כל צוררי	¹⁹ קָרְבָה אֶל־נַפְשִׁי גְאָלָהּ לְמַעַן אֹיְבַי פְּדֵנִי
²⁰ חרפה שברה לבי ואנושה ואקוה לנוד ואין ולמנחמים ולא מצאתי	²⁰ אַתָּה יָדַעְתָּ חֶרְפָּתִי וּבָשְׁתִּי וּכְלִמָּתִי נֶגְדְּךָ כָּל־צֹורְרָי
²¹ ויתנו בברותי ראש ולצמאי ישקוני חמץ	²¹ חֶרְפָּה ׀ שָׁבְרָה לִבִּי וָאָנוּשָׁה וָאֲקַוֶּה לָנוּד וָאַיִן וְלַמְנַחֲמִים וְלֹא מָצָאתִי
²² יהי שלחנם לפניהם לפח ולשלומים למוקש	²² וַיִּתְּנוּ בְּבָרוּתִי רֹאשׁ וְלִצְמָאִי יַשְׁקוּנִי חֹמֶץ
²³ תחשכנה עיניהם מראות ומתניהם תמיד המעד	²³ יְהִי־שֻׁלְחָנָם לִפְנֵיהֶם לְפָח וְלִשְׁלֹומִים לְמֹוקֵשׁ
²⁴ שפך עליהם זעמך וחרון אפך ישיגם	²⁴ תֶּחְשַׁכְנָה עֵינֵיהֶם מֵרְאֹות וּמָתְנֵיהֶם תָּמִיד הַמְעַד
²⁵ תהי טירתם נשמה באהליהם אל יהי ישב	²⁵ שְׁפָךְ־עֲלֵיהֶם זַעְמֶךָ וַחֲרֹון אַפְּךָ יַשִּׂיגֵם
²⁶ כי אתה אשר הכית רדפו ואל מכאוב חלליך יספרו	²⁶ תְּהִי־טִירָתָם נְשַׁמָּה בְּאָהֳלֵיהֶם אַל־יְהִי יֹשֵׁב
²⁷ תנה עון על עונם ואל יבאו בצדקתך	²⁷ כִּי־אַתָּה אֲשֶׁר־הִכִּיתָ רָדָפוּ וְאֶל־מַכְאֹוב חֲלָלֶיךָ יְסַפֵּרוּ
²⁸ ימחו מספר חיים ועם צדיקים אל יכתבו	²⁸ תְּנָה־עָוֹן עַל־עֲוֹנָם וְאַל־יָבֹאוּ בְּצִדְקָתֶךָ
²⁹ ואני עני וכואב ישועתך אלהים תשגבני	²⁹ יִמָּחוּ מִסֵּפֶר חַיִּים וְעִם צַדִּיקִים אַל־יִכָּתֵבוּ
³⁰ אהללה שם אלהים בשיר ואגדלנו בתודה	³⁰ וַאֲנִי עָנִי וְכֹואֵב יְשׁוּעָתְךָ אֱלֹהִים תְּשַׂגְּבֵנִי
³¹ ותיטב ליהוה משור פר מקרן מפריס	³¹ אֲהַלְלָה שֵׁם־אֱלֹהִים בְּשִׁיר וַאֲגַדְּלֶנּוּ בְתֹודָה
³² ראו ענוים ישמחו דרשי אלהים ויחי לבבכם	³² וְתִיטַב לַיהוָה מִשֹּׁור פָּר מַקְרִן מַפְרִיס
³³ כי שמע אל אביונים יהוה ואת אסיריו לא בזה	³³ רָאוּ עֲנָוִים יִשְׂמָחוּ דֹּרְשֵׁי אֱלֹהִים וִיחִי לְבַבְכֶם
³⁴ יהללוהו שמים וארץ ימים וכל רמש בם	³⁴ כִּי־שֹׁמֵעַ אֶל־אֶבְיֹונִים יְהוָה וְאֶת־אֲסִירָיו לֹא בָזָה
³⁵ כי אלהים יושיע ציון ויבנה ערי יהודה וישבו שם וירשוה	³⁵ יְהַלְלוּהוּ שָׁמַיִם וָאָרֶץ יַמִּים וְכָל־רֹמֵשׂ בָּם
³⁶ וזרע עבדיו ינחלוה ואהבי שמו ישכנו בה	³⁶ כִּי אֱלֹהִים ׀ יֹושִׁיעַ צִיֹּון וְיִבְנֶה עָרֵי יְהוּדָה וְיָשְׁבוּ ם וִירֵשׁוּהָ
	³⁷ וְזֶרַע עֲבָדָיו יִנְחָלוּהָ וְאֹהֲבֵי מֹו יִשְׁכְּנוּ־בָהּ

Cambia Bibbia

Confronta con un'altra Bibbia

Versetti esaminati