Giobbe איוב Iyov 5

Torna indietro

Modern Hebrew Bible	תנ"ך - מקרא על פי המסורה
¹ קרא נא היש עונך ואל מי מקדשים תפנה	¹ קְרָא־נָא הֲיֵשׁ עֹונֶךָּ וְאֶל־מִי מִקְּדֹשִׁים תִּפְנֶה
² כי לאויל יהרג כעש ופתה תמית קנאה	² כִּי־לֶאֱוִיל יַהֲרָג־כָּעַשׂ וּפֹתֶה תָּמִית קִנְאָה
³ אני ראיתי אויל משריש ואקוב נוהו פתאם	³ אֲ‍נִי־רָאִיתִי אֱוִיל מַשְׁרִישׁ וָאֶקֹּוב נָוֵהוּ פִתְאֹם
⁴ ירחקו בניו מישע וידכאו בשער ואין מציל	⁴ יִרְחֲקוּ בָנָיו מִיֶּשַׁע וְיִדַּכְּאוּ בַשַּׁעַר וְאֵין מַצִּיל
⁵ אשר קצירו רעב יאכל ואל מצנים יקחהו ושאף צמים חילם	⁵ אֲשֶׁר קְצִירֹו ׀ רָעֵב יֹאכֵל וְאֶל־מִצִּנִּים יִקָּחֵהוּ וְשָׁאַף צַמִּים חֵילָם
⁶ כי לא יצא מעפר און ומאדמה לא יצמח עמל	⁶ כִּי ׀ לֹא־יֵצֵא מֵעָפָר אָוֶן וּמֵאֲדָמָה לֹא־יִצְמַח עָמָל
⁷ כי אדם לעמל יולד ובני רשף יגביהו עוף	⁷ כִּי־אָדָם לְעָמָל יוּלָּד וּבְנֵי־רֶשֶׁף יַגְבִּיהוּ עוּף
⁸ אולם אני אדרש אל אל ואל אלהים אשים דברתי	⁸ אוּלָם אֲנִי אֶדְרֹשׁ אֶל־אֵל וְאֶל־אֱלֹהִים אָשִׂים דִּבְרָתִי
⁹ עשה גדלות ואין חקר נפלאות עד אין מספר	⁹ עֹשֶׂה גְדֹלֹות וְאֵין חֵקֶר נִפְלָאֹות עַד־אֵין מִסְפָּר
¹⁰ הנתן מטר על פני ארץ ושלח מים על פני חוצות	¹⁰ הַנֹּתֵן מָטָר עַל־פְּנֵי־אָרֶץ וְשֹׁלֵחַ מַיִם עַל־פְּנֵי חוּצֹות
¹¹ לשום שפלים למרום וקדרים שגבו ישע	¹¹ לָשׂוּם שְׁפָלִים לְמָרֹום וְקֹדְרִים שָׂגְבוּ יֶשַׁע
¹² מפר מחשבות ערומים ולא תעשינה ידיהם תושיה	¹² מֵפֵר מַחְשְׁבֹות עֲרוּמִים וְלֹא־תַעֲשֶׂינָה יְדֵיהֶם תּוּשִׁיָּה
¹³ לכד חכמים בערמם ועצת נפתלים נמהרה	¹³ לֹכֵד חֲכָמִים בְּעָרְמָם וַעֲצַת נִפְתָּלִים נִמְהָרָה
¹⁴ יומם יפגשו חשך וכלילה ימששו בצהרים	¹⁴ יֹומָם יְפַגְּשׁוּ־חֹשֶׁךְ וְכַלַּיְלָה יְמַשְׁשׁוּ בַצָּהֳרָיִם
¹⁵ וישע מחרב מפיהם ומיד חזק אביון	¹⁵ וַיֹּשַׁע מֵחֶרֶב מִפִּיהֶם וּמִיַּד חָזָק אֶבְיֹון
¹⁶ ותהי לדל תקוה ועלתה קפצה פיה	¹⁶ וַתְּהִי לַדַּל תִּקְוָה וְעֹלָתָה קָפְצָה פִּיהָ
¹⁷ הנה אשרי אנוש יוכחנו אלוה ומוסר שדי אל תמאס	¹⁷ הִנֵּה אַשְׁרֵי אֱנֹושׁ יֹוכִחֶנּוּ אֱלֹוהַּ וּמוּסַר דַּי אַל־תִּמְאָס
¹⁸ כי הוא יכאיב ויחבש ימחץ וידו תרפינה	¹⁸ כִּי הוּא יַכְאִיב וְיֶחְבָּשׁ יִמְחַץ [וְיָדֹו כ] (וְיָדָיו ק) תִּרְפֶּינָה
¹⁹ בשש צרות יצילך ובשבע לא יגע בך רע	¹⁹ בְּשֵׁשׁ צָרֹות יַצִּילֶךָּ וּבְשֶׁבַע ׀ לֹא־יִגַּע בְּךָ רָע
²⁰ ברעב פדך ממות ובמלחמה מידי חרב	²⁰ בְּרָעָב פָּדְךָ מִמָּוֶת וּבְמִלְחָמָה מִידֵי חָרֶב
²¹ בשוט לשון תחבא ולא תירא משד כי יבוא	²¹ בְּשֹׁוט לָשֹׁון תֵּחָבֵא וְלֹא־תִירָא מִשֹּׁד כִּי יָבֹוא
²² לשד ולכפן תשחק ומחית הארץ אל תירא	²² לְשֹׁד וּלְכָפָן תִּשְׂחָק וּמֵחַיַּת הָאָרֶץ אַל־תִּירָא
²³ כי עם אבני השדה בריתך וחית השדה השלמה לך	²³ כִּי עִם־אַבְנֵי הַשָּׂדֶה בְרִיתֶךָ וְחַיַּת הַשָּׂדֶה הָשְׁלְמָה־לָךְ
²⁴ וידעת כי שלום אהלך ופקדת נוך ולא תחטא	²⁴ וְיָדַעְתָּ כִּי־שָׁלֹום אָהֳלֶךָ וּפָקַדְתָּ נָוְךָ וְלֹא תֶחֱטָא
²⁵ וידעת כי רב זרעך וצאצאיך כעשב הארץ	²⁵ וְיָדַעְתָּ כִּי־רַב זַרְעֶךָ וְצֶאֱצָאֶיךָ כְּעֵשֶׂב הָאָרֶץ
²⁶ תבוא בכלח אלי קבר כעלות גדיש בעתו	²⁶ תָּבֹוא בְכֶלַח אֱלֵי־קָבֶר כַּעֲלֹות גָּדִישׁ בְּעִתֹּו
²⁷ הנה זאת חקרנוה כן היא שמענה ואתה דע לך	²⁷ הִנֵּה־זֹאת חֲקַרְנוּהָ כֶּן־הִיא מָעֶנָּה וְאַתָּה דַע־לָךְ׃ פ

Cambia Bibbia

Confronta con un'altra Bibbia

Versetti esaminati