Deuteronomio ܬܢܝܢ ܢܡܘܣܐ 34

¹ ܘܰܣܠܶܩ ܡܽܘܫܶܐ ܡܶܢ ܥܰܪܒܽܘܬ ܡܽܘܐܳܒ ܠܛܽܘܪܳܐ ܕܢܳܒܽܘ. ܠܪܺܝܫ ܪܳܡܬܳܐ ܕܠܽܘܩܒܰܠ ܐܺܝܪܺܝܚܽܘ. ܘܚܰܘܝܶܗ ܡܳܪܝܳܐ ܟܽܠܳܗ ܐܰܪܥܳܐ ܕܓܶܠܥܳܕ. ܘܰܕܓܳܕ. ܘܰܥܕܰܡܳܐ ܠܕܳܢ.

² ܘܟܽܠܶܗ ܢܰܦܬܳܠܺܝ. ܘܟܽܠܳܗ̇ ܐܰܪܥܳܐ ܕܰܐܦܪܶܝܡ. ܘܰܕܡܢܰܫܶܐ. ܘܟܽܠܳܗ̇ ܐܰܪܥܳܐ ܕܺܝܗܽܘܕܳܐ. ܥܕܰܡܳܐ ܠܝܰܡܳܐ ܐ̱ܚܪܳܝܳܐ ܘܰܠܬܰܝܡܢܳܐ.

³ ܘܰܠܟܳܟܳܪ ܕܒܰܦܩܰܥܬܳܐ ܕܺܐܝܪܺܝܚܽܘ ܩܪܺܝܬܳܐ ܕܕܶܩ̈ܠܶܐ. ܥܕܰܡܳܐ ܠܨܳܥܳܪ.

⁴ ܘܶܐܡܰܪ ܠܶܗ ܡܳܪܝܳܐ. ܗܳܕܳܐ ܗ̱ܝ ܐܰܪܥܳܐ ܕܺܝܡܺܝܬ ܠܰܐܒܪܳܗܳܡ. ܘܠܺܐܝܣܚܳܩ. ܘܰܠܝܰܥܩܽܘܒ. ܘܶܐܡܪܶܬ ܕܰܠܙܰܪܥܟܽܘܢ ܐܶܬܠܺܝܗ̇. ܚܰܘܺܝܬܳܗ̇ ܠܳܟ ܒܥܰܝܢܰܝ̈ܟ. ܘܰܠܬܰܡܳܢ ܠܳܐ ܬܶܥܽܘܠ.

⁵ ܘܡܺܝܬ ܬܰܡܳܢ ܡܽܘܫܶܐ ܥܰܒܕܶܗ ܕܡܳܪܝܳܐ ܒܰܐܪܥܳܐ ܕܡܽܘܐܳܒ. ܒܡܶܠܰܬ ܦܽܘܡܶܗ ܕܡܳܪܝܳܐ.

⁶ ܘܩܰܒܪܶܗ ܒܢܰܚܠܳܐ ܒܰܐܪܥܳܐ ܕܡܽܘܐܳܒ. ܠܽܘܩܒܰܠ ܒܶܝܬ ܦܥܽܘܪ. ܘܠܳܐ ܝܺܕܰܥ ܐ̱ܢܳܫ ܩܰܒܪܶܗ ܥܕܰܡܳܐ ܠܝܰܘܡܳܢܳܐ.

⁷ ܘܡܽܘܫܶܐ ܒܰܪ ܡܳܐܐ ܗܘܳܐ ܘܥܶܣܪܺܝܢ ܫܢܺܝ̈ܢ ܟܰܕ ܡܺܝܬ. ܠܳܐ ܝܶܩܪܰܬ ܥܰܝܢܶܗ. ܘܠܳܐ ܐܶܬܩܰܡܰܛܘ ܦܰܟܰܘ̈ܗܝ.

⁸ ܘܰܒܟܰܐܗܝ ܒܢܰܝ̈ ܝܺܣܪܳܐܶܝܠ ܠܡܽܘܫܶܐ ܒܥܰܪܒܽܘܬ ܡܽܘܐܳܒ ܬܠܳܬܺܝܢ ܝܰܘܡܺܝ̈ܢ. ܘܰܫܠܶܡܘ ܝܰܘ̈ܡܰܝ ܒܟܳܬܳܐ ܕܶܐܒܠܶܗ ܕܡܽܘܫܶܐ.

⁹ ܘܝܶܫܽܘܥ ܒܰܪܢܽܘܢ ܐܶܬܡܠܺܝ ܪܽܘܚܳܐ ܕܚܶܟܡܬܳܐ. ܡܶܛܽܠ ܕܣܳܡ ܡܽܘܫܶܐ ܐܺܝܕܰܘ̈ܗܝ ܥܠܰܘܗܝ. ܘܫܳܡܥܺܝܢ ܗܘܰܘ ܠܶܗ ܒܢܰܝ̈ ܝܺܣܪܳܐܶܝܠ. ܘܥܳܒܕܺܝܢ ܐܰܝܟ ܕܦܰܩܶܕ ܡܳܪܝܳܐ ܠܡܽܘܫܶܐ.

¹⁰ ܘܬܽܘܒ ܠܳܐ ܩܳܡ ܢܒܺܝܳܐ ܒܺܝܣܪܳܐܶܝܠ ܐܰܝܟ ܡܽܘܫܶܐ. ܕܝܰܕܥܶܗ ܡܳܪܝܳܐ ܐܰܦܺܝ̈ܢ ܠܽܘܩܒܰܠ ܐܰܦܺܝ̈ܢ.

¹¹ ܒܟܽܠܗܶܝܢ ܐܳܬܘ̈ܳܬܳܐ ܘܬܶܕܡܖ̈ܳܬܳܐ ܕܫܰܕܪܶܗ ܡܳܪܝܳܐ ܠܡܶܥܒܰܕ ܒܰܐܪܥܳܐ ܕܡܶܨܪܶܝܢ. ܠܦܶܪܥܽܘܢ ܘܰܠܟܽܠܗܽܘܢ ܥܰܒܕܰܘ̈ܗܝ ܘܰܠܟܽܠܳܗ̇ ܐܰܪܥܶܗ.

¹² ܘܰܠܟܽܠܳܗ̇ ܐܺܝܕܳܐ ܥܰܫܺܝܢܬܳܐ. ܘܰܠܟܽܠܶܗ ܚܶܙܘܳܐ ܪܰܒܳܐ. ܕܰܥܒܰܕ ܡܽܘܫܶܐ ܠܥܺܝܢ ܟܽܠܶܗ ܝܺܣܪܳܐܶܝܠ.