SCRUTATIO

Dienstag, 1 Juli 2025 - Preziosissimo Sangue di Gesù ( Letture di oggi)

Jó 30

font
NOVA VULGATAVULGATA
1 Nunc autem derident me
iuniores tempore,
quorum non dignabar patres
ponere cum canibus gregis mei;
1 Nunc autem derident me juniores tempore,
quorum non dignabar patres ponere cum canibus gregis mei :
2 quorum virtus manuum mihi erat pro nihilo,
et robur iuvenile perierat totum.
2 quorum virtus manuum mihi erat pro nihilo,
et vita ipsa putabantur indigni :
3 Egestate et fame steriles, qui rodebant in solitudine,
serotino tempore fiebant turbo et vastatio;
3 egestate et fame steriles, qui rodebant in solitudine,
squallentes calamitate et miseria.
4 et mandebant herbas et arborum frutices,
et radix iuniperorum erat cibus eorum.
4 Et mandebant herbas, et arborum cortices,
et radix juniperorum erat cibus eorum :
5 De medio eiciebantur,
clamabant contra eos tamquam fures;
5 qui de convallibus ista rapientes,
cum singula reperissent, ad ea cum clamore currebant.
6 ad ripas habitabant torrentium
et in cavernis terrae et petrarum;
6 In desertis habitabant torrentium,
et in cavernis terræ, vel super glaream :
7 inter frutices rudebant,
sub sentibus se congerebant;
7 qui inter hujuscemodi lætabantur,
et esse sub sentibus delicias computabant :
8 filii stultorum et ignobilium
et de terra penitus exturbati.
8 filii stultorum et ignobilium,
et in terra penitus non parentes.
9 Nunc in eorum canticum versus sum
et factus sum eis in proverbium.
9 Nunc in eorum canticum versus sum,
et factus sum eis in proverbium.
10 Abominantur me et longe fugiunt a me
et faciem meam conspuere non verentur.
10 Abominantur me, et longe fugiunt a me,
et faciem meam conspuere non verentur.
11 Pharetram enim suam aperuit et afflixit me
et frenum in os meum immisit.
11 Pharetram enim suam aperuit, et afflixit me,
et frenum posuit in os meum.
12 Ad dexteram progenies surrexerunt;
pedes meos subverterunt
et complanaverunt contra me semitas ruinae.
12 Ad dexteram orientis calamitates meæ illico surrexerunt :
pedes meos subverterunt,
et oppresserunt quasi fluctibus semitis suis.
13 Dissipaverunt itinera mea,
insidiati sunt mihi et praevaluerunt,
et non fuit qui ferret auxilium.
13 Dissipaverunt itinera mea ;
insidiati sunt mihi, et prævaluerunt :
et non fuit qui ferret auxilium.
14 Quasi rupto muro et aperto irruerunt super me
et sub ruinis devoluti sunt.
14 Quasi rupto muro, et aperta janua, irruerunt super me,
et ad meas miserias devoluti sunt.
15 Versi sunt contra me in terrores,
persequitur quasi ventus principatum meum,
et velut nubes pertransiit salus mea.
15 Redactus sum in nihilum :
abstulisti quasi ventus desiderium meum,
et velut nubes pertransiit salus mea.
16 Nunc autem in memetipso effunditur anima mea;
et possident me dies afflictionis.
16 Nunc autem in memetipso marcescit anima mea,
et possident me dies afflictionis.
17 Nocte os meum perforatur doloribus;
et, qui me comedunt, non dormiunt.
17 Nocte os meum perforatur doloribus,
et qui me comedunt, non dormiunt.
18 In multitudine roboris tenent vestimentum meum
et quasi capitio tunicae succinxerunt me.
18 In multitudine eorum consumitur vestimentum meum,
et quasi capitio tunicæ succinxerunt me.
19 Proiecit me in lutum,
et assimilatus sum favillae et cineri.
19 Comparatus sum luto,
et assimilatus sum favillæ et cineri.
20 Clamo ad te, et non exaudis me;
sto, et non respicis me.
20 Clamo ad te, et non exaudis me :
sto, et non respicis me.
21 Mutatus es mihi in crudelem
et in duritia manus tuae adversaris mihi.
21 Mutatus es mihi in crudelem,
et in duritia manus tuæ adversaris mihi.
22 Elevasti me
et quasi super ventum ponens dissolvisti me.
22 Elevasti me, et quasi super ventum ponens ;
elisisti me valide.
23 Scio quia morti trades me,
ubi constituta est domus omni viventi.
23 Scio quia morti trades me,
ubi constituta est domus omni viventi.
24 Verumtamen non ad ruinam mittit manum;
et in exitio eius erit salvatio.
24 Verumtamen non ad consumptionem eorum emittis manum tuam :
et si corruerint, ipse salvabis.
25 An non flebam quondam super eo, qui afflictus erat,
et compatiebatur anima mea pauperi?
25 Flebam quondam super eo qui afflictus erat,
et compatiebatur anima mea pauperi.
26 Exspectabam bona, et venerunt mihi mala;
praestolabar lucem, et eruperunt tenebrae.
26 Expectabam bona, et venerunt mihi mala :
præstolabar lucem, et eruperunt tenebræ.
27 Interiora mea efferbuerunt absque ulla requie;
praevenerunt me dies afflictionis.
27 Interiora mea efferbuerunt absque ulla requie :
prævenerunt me dies afflictionis.
28 Taetro vultu incedebam sine consolatione,
consurgens in turba clamabam.
28 Mœrens incedebam sine furore ;
consurgens, in turba clamabam.
29 Frater fui draconum
et socius struthionum.
29 Frater fui draconum,
et socius struthionum.
30 Cutis mea denigrata est super me,
et ossa mea aruerunt prae caumate.
30 Cutis mea denigrata est super me,
et ossa mea aruerunt præ caumate.
31 Versa est in luctum cithara mea,
et organum meum in vocem flentium.
31 Versa est in luctum cithara mea,
et organum meum in vocem flentium.