Salmi תהילים (Tehillim) 98

Modern Hebrew Bible	תנ"ך - מקרא על פי המסורה
¹ מזמור שירו ליהוה שיר חדש כי נפלאות עשה הושיעה לו ימינו וזרוע קדשו	¹ מִזְמֹור שִׁירוּ לַיהוָה ׀ שִׁיר חָדָשׁ כִּי־נִפְלָאֹות עָשָׂה הֹושִׁיעָה־לֹּו יְמִינֹו וּזְרֹועַ קָדְשֹׁו
² הודיע יהוה ישועתו לעיני הגוים גלה צדקתו	² הֹודִיעַ יְהוָה יְשׁוּעָתֹו לְעֵינֵי הַגֹּויִם גִּלָּה צִדְקָתֹו
³ זכר חסדו ואמונתו לבית ישראל ראו כל אפסי ארץ את ישועת אלהינו	³ זָכַר חַסְדֹּו ׀ וֶאֱמוּנָתֹו לְבֵית יִשְׂרָאֵל רָאוּ כָל־אַפְסֵי־אָרֶץ אֵת יְשׁוּעַת אֱלֹהֵינוּ
⁴ הריעו ליהוה כל הארץ פצחו ורננו וזמרו	⁴ הָרִיעוּ לַיהוָה כָּל־הָאָרֶץ פִּצְחוּ וְרַנְּנוּ וְזַמֵּרוּ
⁵ זמרו ליהוה בכנור בכנור וקול זמרה	⁵ זַמְּרוּ לַיהוָה בְּכִנֹּור בְּכִנֹּור וְקֹול זִמְרָה
⁶ בחצצרות וקול שופר הריעו לפני המלך יהוה	⁶ בַּחֲצֹצְרֹות וְקֹול שֹׁופָר הָרִיעוּ לִפְנֵי ׀ הַמֶּלֶךְ יְהוָה
⁷ ירעם הים ומלאו תבל וישבי בה	⁷ יִרְעַם הַיָּם וּמְלֹאֹו תֵּבֵל וְיֹשְׁבֵי בָהּ
⁸ נהרות ימחאו כף יחד הרים ירננו	⁸ נְהָרֹות יִמְחֲאוּ־כָף יַחַד הָרִים יְרַנֵּנוּ
⁹ לפני יהוה כי בא לשפט הארץ ישפט תבל בצדק ועמים במישרים	⁹ לִפְנֵי־יְהוָה כִּי בָא לִשְׁפֹּט הָאָרֶץ יִשְׁפֹּט־תֵּבֵל בְּצֶדֶק וְעַמִּים בְּמֵישָׁרִים