Salmi תהילים (Tehillim) 54

Stuttgartensia - Delitzsch	Modern Hebrew Bible
¹ לַמְנַצֵּחַ בִּנְגִינֹת מַשְׂכִּיל לְדָוִד	¹ למנצח בנגינת משכיל לדוד בבוא הזיפים ויאמרו לשאול הלא דוד מסתתר עמנו אלהים בשמך הושיעני ובגבורתך תדינני
² בְּבֹוא הַזִּיפִים וַיֹּאמְרוּ לְשָׁאוּל הֲלֹא דָוִד מִסְתַּתֵּר עִמָּנוּ	² אלהים שמע תפלתי האזינה לאמרי פי
³ אֱלֹהִים בְּשִׁמְךָ הֹושִׁיעֵנִי וּבִגְבוּרָתְךָ תְדִינֵנִי	³ כי זרים קמו עלי ועריצים בקשו נפשי לא שמו אלהים לנגדם סלה
⁴ אֱלֹהִים שְׁמַע תְּפִלָּתִי הַאֲזִינָה לְאִמְרֵי־פִי	⁴ הנה אלהים עזר לי אדני בסמכי נפשי
⁵ כִּי זָרִים ׀ קָמוּ עָלַי וְעָרִיצִים בִּקְשׁוּ נַפְשִׁי לֹא שָׂמוּ אֱלֹהִים לְנֶגְדָּם סֶלָה	⁵ ישוב הרע לשררי באמתך הצמיתם
⁶ הִנֵּה אֱלֹהִים עֹזֵר לִי אֲדֹנָי בְּסֹמְכֵי נַפְשִׁי	⁶ בנדבה אזבחה לך אודה שמך יהוה כי טוב
⁷ [יָשֹׁוב כ] (יָשִׁיב ק) הָרַע לְשֹׁרְרָי בַּאֲמִתְּךָ הַצְמִיתֵם	⁷ כי מכל צרה הצילני ובאיבי ראתה עיני
⁸ בִּנְדָבָה אֶזְבְּחָה־לָּךְ אֹודֶה שִּׁמְךָ יְהוָה כִּי־טֹוב
⁹ כִּי מִכָּל־צָרָה הִצִּילָנִי וּבְאֹיְבַי רָאֲתָה עֵינִי