Giobbe איוב Iyov 12

Torna indietro

Stuttgartensia - Delitzsch	Modern Hebrew Bible
¹ וַיַּעַן אִיֹּוב וַיֹּאמַר	¹ ויען איוב ויאמר
² אָמְנָם כִּי אַתֶּם־עָם וְעִמָּכֶם תָּמוּת חָכְמָה	² אמנם כי אתם עם ועמכם תמות חכמה
³ גַּם־לִי לֵבָב ׀ כְּמֹוכֶם לֹא־נֹפֵל אָנֹכִי מִכֶּם וְאֶת־מִי־אֵין כְּמֹו־אֵלֶּה	³ גם לי לבב כמוכם לא נפל אנכי מכם ואת מי אין כמו אלה
⁴ שְׂחֹק לְרֵעֵהוּ ׀ אֶהְיֶה קֹרֵא לֶאֱלֹוהַּ וַיַּעֲנֵהוּ חֹוק צַדִּיק תָּמִים	⁴ שחק לרעהו אהיה קרא לאלוה ויענהו שחוק צדיק תמים
⁵ לַפִּיד בּוּז לְעַשְׁתּוּת שַׁאֲנָן נָכֹון לְמֹועֲדֵי רָגֶל	⁵ לפיד בוז לעשתות שאנן נכון למועדי רגל
⁶ יִשְׁלָיוּ אֹהָלִים ׀ לְשֹׁדְדִים וּבַטֻּחֹות לְמַרְגִּיזֵי אֵל לַאֲשֶׁר הֵבִיא אֱלֹוהַּ בְּיָדֹו	⁶ ישליו אהלים לשדדים ובטחות למרגיזי אל לאשר הביא אלוה בידו
⁷ וְאוּלָם שְׁאַל־נָא בְהֵמֹות וְתֹרֶךָּ וְעֹוף הַשָּׁמַיִם וְיַגֶּד־לָךְ	⁷ ואולם שאל נא בהמות ותרך ועוף השמים ויגד לך
⁸ אֹו שִׂיחַ לָאָרֶץ וְתֹרֶךָּ וִיסַפְּרוּ לְךָ דְּגֵי הַיָּם	⁸ או שיח לארץ ותרך ויספרו לך דגי הים
⁹ מִי לֹא־יָדַע בְּכָל־אֵלֶּה כִּי יַד־יְהוָה עָשְׂתָה זֹּאת	⁹ מי לא ידע בכל אלה כי יד יהוה עשתה זאת
¹⁰ אֲשֶׁר בְּיָדֹו נֶפֶשׁ כָּל־חָי וְרוּחַ כָּל־בְּשַׂר־אִישׁ	¹⁰ אשר בידו נפש כל חי ורוח כל בשר איש
¹¹ הֲלֹא־אֹזֶן מִלִּין תִּבְחָן וְחֵךְ אֹכֶל יִטְעַם־לֹו	¹¹ הלא אזן מלין תבחן וחך אכל יטעם לו
¹² בִּישִׁישִׁים חָכְמָה וְאֹרֶךְ יָמִים תְּבוּנָה	¹² בישישים חכמה וארך ימים תבונה
¹³ עִמֹּו חָכְמָה וּגְבוּרָה לֹו עֵצָה וּתְבוּנָה	¹³ עמו חכמה וגבורה לו עצה ותבונה
¹⁴ הֵן יַהֲרֹוס וְלֹא יִבָּנֶה יִסְגֹּר עַל־אִישׁ וְלֹא יִפָּתֵחַ	¹⁴ הן יהרוס ולא יבנה יסגר על איש ולא יפתח
¹⁵ הֵן יַעְצֹר בַּמַּיִם וְיִבָשׁוּ וִישַׁלְּחֵם וְיַהַפְכוּ אָרֶץ	¹⁵ הן יעצר במים ויבשו וישלחם ויהפכו ארץ
¹⁶ עִמֹּו עֹז וְתוּשִׁיָּה לֹו שֹׁגֵג וּמַשְׁגֶּה	¹⁶ עמו עז ותושיה לו שגג ומשגה
¹⁷ מֹולִיךְ יֹועֲצִים שֹׁולָל וְשֹׁפְטִים יְהֹולֵל	¹⁷ מוליך יועצים שולל ושפטים יהולל
¹⁸ מוּסַר מְלָכִים פִּתֵּחַ וַיֶּאְסֹר אֵזֹור בְּמָתְנֵיהֶם	¹⁸ מוסר מלכים פתח ויאסר אזור במתניהם
¹⁹ מֹולִיךְ כֹּהֲנִים שֹׁולָל וְאֵתָנִים יְסַלֵּף	¹⁹ מוליך כהנים שולל ואתנים יסלף
²⁰ מֵסִיר פָה לְנֶאֱמָנִים וְטַעַם זְקֵנִים יִקָּח	²⁰ מסיר שפה לנאמנים וטעם זקנים יקח
²¹ שֹׁופֵךְ בּוּז עַל־נְדִיבִים וּמְזִיחַ אֲפִיקִים רִפָּה	²¹ שופך בוז על נדיבים ומזיח אפיקים רפה
²² מְגַלֶּה עֲמֻקֹות מִנִּי־חֹשֶׁךְ וַיֹּצֵא לָאֹור צַלְמָוֶת	²² מגלה עמקות מני חשך ויצא לאור צלמות
²³ מַשְׂגִּיא לַגֹּויִם וַיְאַבְּדֵם שֹׁטֵחַ לַגֹּויִם וַיַּנְחֵם	²³ משגיא לגוים ויאבדם שטח לגוים וינחם
²⁴ מֵסִיר לֵב רָאשֵׁי עַם־הָאָרֶץ וַיַּתְעֵם בְּתֹהוּ לֹא־דָרֶךְ	²⁴ מסיר לב ראשי עם הארץ ויתעם בתהו לא דרך
²⁵ יְמַשְׁשׁוּ־חֹשֶׁךְ וְלֹא־אֹור וַיַּתְעֵם כַּשִּׁכֹּור	²⁵ ימששו חשך ולא אור ויתעם כשכור

Cambia Bibbia

Confronta con un'altra Bibbia

Versetti esaminati