Salmi 106

¹ ALLELUIA.
Confitemini Domino, quoniam bonus,
quoniam in saeculum misericordia eius.

² Quis loquetur potentias Domini,
auditas faciet omnes laudes eius?

³ Beati, qui custodiunt iudicium
et faciunt iustitiam in omni tempore.

⁴ Memento nostri, Domine, in beneplacito populi tui,
visita nos in salutari tuo,

⁵ ut videamus bona electorum tuorum,
ut laetemur in laetitia gentis tuae,
ut gloriemur cum hereditate tua.

⁶ Peccavimus cum patribus nostris,
iniuste egimus, iniquitatem fecimus.

⁷ Patres nostri in Aegypto non intellexerunt mirabilia tua,
non fuerunt memores multitudinis misericordiarum tuarum
et irritaverunt ascendentes in mare, mare Rubrum.

⁸ Et salvavit eos propter nomen suum,
ut notam faceret potentiam suam. -

⁹ Et increpuit mare Rubrum, et exsiccatum est,
et deduxit eos in abyssis sicut in deserto.

¹⁰ Et salvavit eos de manu odientis
et redemit eos de manu inimici.

¹¹ Et operuit aqua tribulantes eos:
unus ex eis non remansit.

¹² Et crediderunt verbis eius
et cantaverunt laudem eius.

¹³ Cito obliti sunt operum eius
et non sustinuerunt consilium eius;

¹⁴ et concupierunt concupiscentiam in deserto
et tentaverunt Deum in inaquoso.

¹⁵ Et dedit eis petitionem ipsorum
et misit saturitatem in animas eorum.

¹⁶ Et zelati sunt Moysen in castris,
Aaron sanctum Domini.

¹⁷ Aperta est terra et deglutivit Dathan
et operuit super congregationem Abiram.

¹⁸ Et exarsit ignis in synagoga eorum,
flamma combussit peccatores.

¹⁹ Et fecerunt vitulum in Horeb
et adoraverunt sculptile;

²⁰ et mutaverunt gloriam suam
in similitudinem tauri comedentis fenum.

²¹ Obliti sunt Deum, qui salvavit eos,
qui fecit magnalia in Aegypto,

²² mirabilia in terra Cham,
terribilia in mari Rubro.

²³ Et dixit quia disperderet eos,
nisi affuisset Moyses electus eius:
stetit in confractione in conspectu eius,
ut averteret iram eius, ne destrueret eos.

²⁴ Et pro nihilo habuerunt terram desiderabilem,
non crediderunt verbo eius.

²⁵ Et murmuraverunt in tabernaculis suis,
non exaudierunt vocem Domini.

²⁶ Et elevavit manum suam super eos,
ut prosterneret eos in deserto

²⁷ et ut deiceret semen eorum in nationibus
et dispergeret eos in regionibus.

²⁸ Et adhaeserunt Baalphegor
et comederunt sacrificia mortuorum;

²⁹ et irritaverunt eum in adinventionibus suis,
et irrupit in eos ruina.

³⁰ Et stetit Phinees et fecit iudicium,
et cessavit quassatio,

³¹ et reputatum est ei in iustitiam
in generationem et generationem usque in sempiternum.

³² Et irritaverunt eum ad aquas Meriba,
et vexatus est Moyses propter eos,

³³ quia exacerbaverunt spiritum eius,
et temere locutus est in labiis suis.

³⁴ Non disperdiderunt gentes,
quas dixit Dominus illis.

³⁵ Et commixti sunt inter gentes
et didicerunt opera eorum.

³⁶ Et servierunt sculptilibus eorum,
et factum est illis in scandalum.

³⁷ Et immolaverunt filios suos
et filias suas daemoniis.

³⁸ Et effuderunt sanguinem innocentem,
sanguinem filiorum suorum et filiarum suarum,
quas sacrificaverunt sculptilibus Chanaan.
Et infecta est terra in sanguinibus,

³⁹ et contaminati sunt in operibus suis
et fornicati sunt in adinventionibus suis.

⁴⁰ Et exarsit ira Dominus in populum suum
et abominatus est hereditatem suam

⁴¹ et tradidit eos in manus gentium,
et dominati sunt eorum, qui oderunt eos.

⁴² Et tribulaverunt eos inimici eorum,
et humiliati sunt sub manibus eorum.

⁴³ Saepe liberavit eos;
ipsi autem exacerbaverunt eum in consilio suo
et corruerunt in iniquitatibus suis.

⁴⁴ Et vidit tribulationem eorum,
cum audivit clamorem eorum. -

⁴⁵ Et memor fuit testamenti sui
et paenituit eum secundum multitudinem misericordiae suae.

⁴⁶ Et dedit eos in miserationes
in conspectu omnium, qui captivos duxerant eos.

⁴⁷ Salvos nos fac, Domine Deus noster,
et congrega nos de nationibus,
ut confiteamur nomini sancto tuo
et gloriemur in laude tua.

⁴⁸ Benedictus Dominus, Deus Israel,
a saeculo et usque in saeculum.
Et dicet omnis populus: “ Fiat, fiat ”.