Ecclesiasticus 34

NOVA VULGATA	VULGATA
1 Vana spes et mendax viro insensato, et somnia extollunt imprudentes.	1 Vana spes et mendacium viro insensato : et somnia extollunt imprudentes.
2 Quasi qui apprehendit umbram et persequitur ventum, sic et qui attendit ad visa noctis.	2 Quasi qui apprehendit umbram et persequitur ventum, sic et qui attendit ad visa mendacia.
3 Hoc secundum hoc visio somniorum, ante faciem hominis similitudo faciei.	3 Hoc secundum hoc visio somniorum, ante faciem hominis similitudo hominis.
4 Ab immundo quid mundabitur? Et a mendace quid verum dicetur?	4 Ab immundo, quid mundabitur ? et a mendace, quid verum dicetur ?
5 Divinationes et auguria et somnia vanitas est,	5 Divinatio erroris, et auguria mendacia, et somnia malefacientium, vanitas est :
6 et, sicut parturientis, cor phantasias patitur. Nisi ab Altissimo fuerit emissa visitatio, ne dederis in illis cor tuum.	6 et sicut parturientis, cor tuum phantasias patitur. Nisi ab Altissimo fuerit emissa visitatio, ne dederis in illis cor tuum :
7 Multos enim errare fecerunt somnia, et exciderunt sperantes in illis.	7 multos enim errare fecerunt somnia, et exciderunt sperantes in illis.
8 Sine mendacio consummabitur verbum legis, et sapientia in ore fideli consummatio.	8 Sine mendacio consummabitur verbum legis, et sapientia in ore fidelis complanabitur.
9 Vir, qui peregrinatus est, multa didicit, et, qui multa expertus est, enarrabit scienter.	9 Qui non est tentatus quid scit ? vir in multis expertus cogitabit multa : et qui multa didicit enarrabit intellectum.
10 Qui non est expertus, pauca recognoscit, qui autem peregrinatus est, multiplicat astutiam.	10 Qui non est expertus pauca recognoscit : qui autem in multis factus est, multiplicat malitiam.
11	11 Qui tentatus non est qualia scit ? qui implanatus est abundabit nequitia.
12 Multa vidi errando et plurima verba intellexi;	12 Multa vidi errando, et plurimas verborum consuetudines.
13 aliquoties usque ad mortem periclitatus sum et horum causa liberatus sum.	13 Aliquoties usque ad mortem periclitatus sum horum causa, et liberatus sum gratia Dei.
14 Spiritus timentium Dominum vivet, et in respectu illius benedicetur.	14 Spiritus timentium Deum quæritur, et in respectu illius benedicetur.
15 Spes enim illorum in salvantem illos, et oculi Dei in diligentes se.	15 Spes enim illorum in salvantem illos, et oculi Dei in diligentes se.
16 Qui timet Dominum, nihil trepidabit et non pavebit, quoniam ipse est spes eius.	16 Qui timet Dominum nihil trepidabit : et non pavebit, quoniam ipse est spes ejus.
17 Timentis Dominum beata est anima eius.	17 Timentis Dominum, beata est anima ejus.
18 Ad quem respicit? Et quis est fortitudo eius?	18 Ad quem respicit, et quis est fortitudo ejus ?
19 Oculi Domini super timentes eum: protector potentiae, firmamentum virtutis, tegimen ardoris et umbraculum meridiani,	19 Oculi Domini super timentes eum : protector potentiæ, firmamentum virtutis, tegimen ardoris, et umbraculum meridiani :
20 custodia offensionis et adiutorium casus, exaltans animam et illuminans oculos, dans sanitatem vitae et benedictionem.	20 deprecatio offensionis, et adjutorium casus : exaltans animam, et illuminans oculos, dans sanitatem, et vitam, et benedictionem.
21 Dominus solus sustinentibus se in via veritatis et iustitiae.	21 Immolantis ex iniquo oblatio est maculata, et non sunt beneplacitæ subsannationes injustorum.
22 Immolantis ex iniquo, oblatio maculata, et non sunt beneplacitae hostiae iniustorum.	22 Dominus solus sustinentibus se in via veritatis et justitiæ.
23 Dona iniquorum non probat Altissimus nec respicit in oblationes iniquorum nec in multitudine sacrificiorum eorum propitiabitur peccatis.	23 Dona iniquorum non probat Altissimus, nec respicit in oblationes iniquorum, nec in multitudine sacrificiorum eorum propitiabitur peccatis.
24 Qui offert sacrificium ex substantia pauperum, quasi qui victimat filium in conspectu patris sui.	24 Qui offert sacrificium ex substantia pauperum, quasi qui victimat filium in conspectu patris sui.
25 Panis egentium vita pauperum est; qui defraudat illum, homo sanguinis est.	25 Panis egentium vita pauperum est : qui defraudat illum homo sanguinis est.
26 Qui aufert in sudore panem, quasi qui occidit proximum suum;	26 Qui aufert in sudore panem, quasi qui occidit proximum suum.
27 et effundit sanguinem, qui fraudem facit mercennario.	27 Qui effundit sanguinem, et qui fraudem facit mercenario, fratres sunt.
28 Unus aedificans et unus destruens; quid prodest illis nisi labor?	28 Unus ædificans, et unus destruens : quid prodest illis, nisi labor ?
29 Unus orans et unus maledicens; cuius vocem exaudiet Deus?	29 Unus orans, et unus maledicens : cujus vocem exaudiet Deus ?
30 Qui baptizatur a mortuo et iterum tangit eum: quid proficit lavatio illius?	30 Qui baptizatur a mortuo, et iterum tangit eum, quid proficit lavatio illius ?
31 Sic homo, qui ieiunat pro peccatis suis, et iterum vadens et eadem faciens. Orationem illius quis exaudiet? Aut quid proficit humiliando se?	31 Sic homo qui jejunat in peccatis suis, et iterum eadem faciens : quid proficit humiliando se ? orationem illius quis exaudiet ?