Esodo 35

¹ Igitur, congregato omni coetu filiorum Israel, dixit ad eos: “ Haec sunt, quae iussit Dominus fieri:

² sex diebus facietis opus, septimus dies erit vobis sanctus, sabbatum et requies Domino; qui fecerit opus in eo, occidetur.

³ Non succendetis ignem in omnibus habitaculis vestris per diem sabbati ”.

⁴ Et ait Moyses ad omnem coetum filiorum Israel: “ Iste est sermo, quem praecepit Dominus dicens:

⁵ "Separate apud vos donaria Domino". Omnis voluntarius et proni animi offerat ea Domino: aurum et argentum et aes,

⁶ hyacinthum et purpuram coccumque et byssum, pilos caprarum

⁷ et pelles arietum rubricatas et pelles delphini, ligna acaciae

⁸ et oleum ad luminaria concinnanda et aromata, ut conficiatur unguentum et thymiama suavissimum,

⁹ lapides onychinos et gemmas ad ornatum ephod et pectoralis.

¹⁰ Quisquis vestrum sapiens est, veniat et faciat, quod Dominus imperavit,

¹¹ habitaculum scilicet et tentorium eius atque operimentum, fibulas et tabulata cum vectibus, columnas et bases;

¹² arcam et vectes, propitiatorium et velum, quod ante illud oppanditur;

¹³ mensam cum vectibus et vasis et propositionis panibus;

¹⁴ candelabrum ad luminaria sustentanda, vasa illius et lucernas et oleum ad nutrimenta luminarium;

¹⁵ altare thymiamatis et vectes et oleum unctionis et thymiama ex aromatibus; velum ad ostium habitaculi;

¹⁶ altare holocausti et craticulam eius aeneam cum vectibus et vasis suis, labrum et basim eius;

¹⁷ cortinas atrii cum columnis et basibus, velum in foribus atrii;

¹⁸ paxillos habitaculi et atrii cum funiculis suis;

¹⁹ vestimenta texta, quorum usus est in ministerio sanctuarii, vestes sanctas Aaron pontificis ac vestes filiorum eius, ut sacerdotio fungantur mihi ”.

²⁰ Egressus est omnis coetus filiorum Israel de conspectu Moysi,

²¹ et venit, quisquis erat mentis promptissimae, et attulit sponte sua donaria Domino ad faciendum opus tabernaculi conventus et quidquid ad cultum et ad vestes sanctas necessarium erat.

²² Viri cum mulieribus, omnes voluntarii praebuerunt fibulas et inaures, anulos et dextralia; omne vas aureum in donaria Domini separatum est.

²³ Si quis habebat hyacinthum et purpuram coccumque, byssum et pilos caprarum, pelles arietum rubricatas et pelles delphini,

²⁴ argenti aerisque metalla, obtulerunt Domino lignaque acaciae in varios usus.

²⁵ Sed et mulieres eruditae dederunt, quae neverant, hyacinthum, purpuram et coccum ac byssum

²⁶ et pilos caprarum, sponte propria cuncta tribuentes.

²⁷ Principes vero obtulerunt lapides onychinos et gemmas ad ephod et pectorale

²⁸ aromataque et oleum ad luminaria concinnanda et ad praeparandum unguentum ac thymiama odoris suavissimi componendum.

²⁹ Omnes viri et mulieres mente prompta obtulerunt donaria, ut fierent opera, quae iusserat Dominus per manum Moysi. Cuncti filii Israel voluntaria Domino dedicaverunt.

³⁰ Dixitque Moyses ad filios Israel: “ Ecce vocavit Dominus ex nomine Beseleel filium Uri filii Hur de tribu Iudae;

³¹ implevitque eum spiritu Dei, sapientia et intellegentia et scientia ad omne opus,

³² ad excogitandum et faciendum opus in auro et argento et aere,

³³ ad scindendum et includendum gemmas et ad sculpendum ligna, quidquid fabre adinveniri potest.

³⁴ Dedit quoque in corde eius, ut alios doceret, ipsi et Ooliab filio Achisamech de tribu Dan.

³⁵ Ambos implevit sapientia, ut faciant opera fabri polymitarii ac plumarii de hyacintho ac purpura coccoque et bysso et textoris, facientes omne opus ac nova quaeque reperientes ”.