| 1 ܟܕ ܡܕܝܢܬܐ ܩܕܝܫܬܐ ܒܫܠܝܐ ܘܒܫܠܡܐ ܥܡܪܐ ܗܘܬ ܘܢܡܘ̈ܣܐ ܫܦܝܪ ܡܬܢܛܪܝܢ ܗܘܘ ܡܛܠ ܙܕܝܩܘܬܗ ܕܚܘܢܝܐ ܪܒ ܟܗ̈ܢܐ ܘܕܣܢܐ ܗܘܐ ܒܝ̈ܫܬܐ |
| 2 ܐܦ ܡ̈ܠܟܐ ܓܕܫ ܕܢܝܩܪܘܢܝܗܝ ܠܒܝܬܐ ܘܠܐܬܪܐ ܒܐܝܩܪ̈ܐ ܘܒܩܘܪ̈ܒܢܐ ܪ̈ܘܪܒܐ ܘܡܫܒ̈ܚܐ |
| 3 ܐܝܟ ܕܐܦ ܣܠܘܩܘܣ ܡܠܟܐ ܕܐܣܝܐ ܝܗܒ ܗܘܐ ܡܢ ܕܝܠܗ ܟܠܡܕܡ ܕܐܙܠ ܗܘܐ ܠܬܫܡܫܬܐ ܕܩܘܪ̈ܒܢܐ |
| 4 ܣܝܡܘܢ ܕܝܢ ܕܐܝܬܘܗܝ ܗܘܐ ܡܢ ܫܒܛܐ ܕܒܢܝܡܝܢ ܘܥܒܝܕ ܗܘܐ ܪܒ ܒܝܬܐ ܩܡ ܠܘܩܒܠ ܟܗ̈ܢܐ ܡܥܕܪ ܗܘܐ ܓܝܪ ܠܥܘܠܐ ܕܗܘܐ ܗܘܐ ܒܡܕܝܢܬܐ |
| 5 ܘܟܕ ܠܐ ܐܫܟܚ ܕܢܙܟܝܘܗܝ ܠܚܘܢܝܐ ܪܒ ܟܗ̈ܢܐ ܐܙܠ ܠܘܬ ܐܦܘܠܘܢܝܣ ܒܪ ܬܪܣܝܣ ܗܘ ܕܒܗܘ ܙܒܢܐ ܐܝܬܘܗܝ ܗܘܐ ܪܫܐ ܘܡܕܒܪܢܐ ܕܣܘܪܝܐ ܘܕܦܘܢܝܩܐ |
| 6 ܘܐܘܕܥܗ ܥܠ ܓܙܐ ܕܐܝܬ ܗܘܐ ܒܗܝܟܠܐ ܕܒܐܘܪܫܠܡ ܘܐܡܪ ܠܗ ܕܠܐ ܡܣܬܝܟ ܘܠܐ ܡܬܡܢܐ ܥܘܬܪܐ ܕܐܝܬ ܒܗ ܘܐܡܪ ܕܗܢܐ ܟܠܗ ܠܐ ܙܕܩ ܕܢܬܬܣܝܡ ܒܚܘܫܒܢܐ ܕܕܒ̈ܚܐ ܘܕܩܘܪ̈ܒܢܐ ܐܠܐ ܕܢܗܘܐ ܬܚܝܬ ܫܘܠܛܢܗ ܕܡܠܟܐ |
| 7 ܐܙܠ ܕܝܢ ܐܦܘܠܘܢܝܘܣ ܘܐܘܕܥܗ ܠܡܠܟܐ ܥܠ ܓܙܐ ܘܥܘܬܪܐ ܕܐܬܐܡܪ ܠܗ ܡܠܟܐ ܕܝܢ ܩܪܐ ܠܗܠܝܕܪܘܣ ܗܘ ܕܥܒܝܕ ܗܘܐ ܥܠ ܨܒ̈ܘܬܐ ܘܦܩܕܗ ܘܫܕܪܗ ܕܢܣܒ ܘܢܝܬܐ ܟܠܗ ܓܙܐ ܘܥܘܬܪܐ ܕܐܬܐܡܪ ܠܗ ܥܠܘܗܝ |
| 8 ܘܒܪܫܥܬܗ ܕܝܢ ܗܠܝܕܘܪܘܣ ܢܦܩ ܗܘܐ ܘܐܙܠ ܥܠ ܡܕܝ̈ܢܬܐ ܕܣܘܪܝܐ ܘܕܦܘܢܝܩܐ ܘܡܣܬܪܗܒ ܗܘܐ ܕܢܥܒܕ ܘܢܫܠܡ ܦܘܩܕܢܗ ܕܡܠܟܐ |
| 9 ܘܟܕ ܐܬܐ ܕܝܢ ܗܠܝܕܪܘܣ ܠܐܘܪܫܠܡ ܐܬܩܒܠ ܒܐܝܩܪ̈ܐ ܣܓ̈ܝܐܐ ܡܢ ܪܒܟܗܢܐ ܘܡܢ ܡܕܝܢܬܐ ܘܓܠܐ ܠܗܘܢ ܥܠ ܡܕܡ ܕܐܫܬܕܪ ܥܠܘܗܝ ܕܐܬܐܡܪ ܠܡܠܟܐ ܘܡܫܐܠ ܗܘܐ ܠܗܘܢ ܕܐܢ ܗܠܝܢ ܗܟܢܐ ܐܝܬܝܗܝܢ ܒܫܪܪܐ |
| 10 ܘܐܡܪ ܠܗ ܕܝܢ ܘܐܘܕܥܗ ܪܒܟܗܢܐ ܕܦܪ̈ܬܩܣ ܐ̈ܢܝܢ ܕܣܝ̈ܡܢ ܕܝ̈ܬܡܐ ܘܕܐܪ̈ܡܠܬܐ |
| 11 ܘܡܢܗܝܢ ܕܝܢ ܕܗܝܪܩܢܘܣ ܒܪ ܛܘܒܝܐ ܓܒܪܐ ܡܝܩܪܐ ܘܥܬܝܪܐ ܘܠܐ ܗܘܐ ܐܝܟ ܡܕܡ ܕܐܬܐ ܘܐܡܪ ܒܡܐܟܠ ܩܪܨܐ ܣܝܡܘܢ ܪܫܝܥܐ ܟܠܗ ܕܝܢ ܥܒܕܐ ܗܘܐ ܐܪܒܥܡܐܐ ܟܟܪ̈ܝܢ ܕܣܐܡܐ ܘܡܐܬܝܢ ܕܕܗܒܐ |
| 12 ܠܐ ܕܝܢ ܡܫܟܚܝܢ ܡܬܛܠܡܝܢ ܘܡܬܓܠܙܝܢ ܐܝܠܝܢ ܕܗܝܡܢܘ ܠܩܕܝܫܘܬܗ ܕܐܬܪܐ ܘܠܢܟܦܘܬܗ ܕܗܝܟܠܐ ܘܠܫܡܗ ܪܒܐ ܘܡܫܒܚܐ ܕܒܟܠܗ ܥܠܡܐ ܕܠܐ ܡܬܚܠܨ ܘܠܐ ܡܬܓܢܒ |
| 13 ܗܠܝܕܪܘܣ ܕܝܢ ܡܛܠ ܦܘܩܕܢܗ ܕܡܠܟܐ ܐܡܪ ܗܘܐ ܕܗܠܝܢ ܠܒܝܬ ܡܠܟܐ ܡܬܒܥܐ ܠܗܝܢ ܕܢܥ̈ܠܢ ܘܢܬܬܣܝ̈ܡܢ |
| 14 ܘܐܩܝܡ ܠܗܘܢ ܝܘܡܐ ܕܐܡܬܝ ܢܥܘܠ ܘܢܚܙܐ ܐ̈ܢܝܢ ܘܢܫܬܠܛ ܥܠܝܗܝܢ ܘܠܐ ܗܘܐ ܙܥܘܪ ܐܓܘܢܐ ܕܐܝܬ ܗܘܐ ܒܟܠܗ ܡܕܝܢܬܐ |
| 15 ܟܗ̈ܢܐ ܕܝܢ ܒܠܒܘ̈ܫܝܗܘܢ ܕܟܗܢܘܬܐ ܫܕܘ ܢܦܫܗܘܢ ܥܠ ܐܪܥܐ ܘܓܥܝܢ ܗܘܘ ܘܒܥܝܢ ܡܢ ܡܢܘ ܕܣܡ ܠܗܘܢ ܢܡܘܣܐ ܕܢܬܢܛܪ̈ܢ ܦܪ̈ܬܩܣ ܠܡܪ̈ܝܗܝܢ ܡܫܠܡܢܐܝܬ |
| 16 ܘܬܘܒ ܕܝܢ ܟܠܗܘܢ ܐܝܠܝܢ ܕܚܙܝܢ ܗܘܘ ܠܪܒܟܗܢܐ ܡܬܡܣܝܢ ܗܘܘ ܠܒܘܬ̈ܗܘܢ ܚܙܘܐ ܓܝܪ ܕܐܦܘ̈ܗܝ ܘܫܘܚܠܦܐ ܕܚܙܬܗ ܡܘܕܥ ܗܘܐ ܥܠ ܫܚܩܐ ܕܢܦܫܗ |
| 17 ܢܣܝܟܐ ܗܘܬ ܓܝܪ ܘܫܪܝܐ ܥܠ ܓܒܪܐ ܛܝܒܘܬܐ ܘܫܘܦܪܐ ܕܚܙܬܐ ܥܠ ܦܓܪܗ ܘܡܛܠ ܗܢܐ ܐܬܝܕܥ ܚܫܐ ܕܟܐܒܐ ܕܐܝܬ ܗܘܐ ܠܗ ܒܢܦܫܗ |
| 18 ܘܬܘܒ ܢܦܩܝܢ ܗܘܘ ܡܢ ܒܬ̈ܐ ܟܢܫ̈ܝܢ ܟܢܫ̈ܝܢ ܘܒܥܝܢ ܗܘܘ ܘܡܬܟܫܦܝܢ ܡܛܘܠ ܗܝܟܠܐ ܕܠܐ ܢܗܘܐ ܠܓܘܚܟܐ ܘܠܒܘܙܚܐ |
| 19 ܢܫ̈ܐ ܕܝܢ ܟܕ ܡܚ̈ܝܢ ܣܩ̈ܐ ܒܚܨܝܗܝܢ ܦܗ̈ܝܢ ܗܘ̈ܝ ܒܝܬ ܐܘܪ̈ܚܬܐ ܘܒܬܘ̈ܠܬܐ ܚܒ̈ܝܫܬܐ ܡܢܗܝܢ ܠܬܪ̈ܥܐ ܪ̈ܗܛܢ ܗ̈ܘܝ ܘܡܢܗܝܢ ܠܫܘܪܐ ܘܡܢܗܝܢ ܡܢ ܟܘ̈ܐ ܡܕܝܩ̈ܢ ܗܘ̈ܝ |
| 20 ܟܠܗܝܢ ܕܝܢ ܦܪ̈ܝܣܢ ܗܘ̈ܝ ܐܝ̈ܕܝܗܝܢ ܘܓ̈ܥܝܢ ܗܘ̈ܝ ܘܒܥ̈ܝܢ ܡܢ ܥܡܘܪܐ ܕܫܡܝܐ |
| 21 ܐܝܬܝܗ ܗܘܬ ܕܝܢ ܨܒܘܬܐ ܕܐܢܫ ܢܚܙܐ ܘܢܪܚܡ ܥܠ ܫܚܩܗ ܘܥܠ ܐܘܠܨܢܗ ܕܥܡܐ ܘܥܠ ܐܓܘܢܗ ܘܚܫܗ ܘܣܘܟܝܗ ܕܪܒ ܟܗ̈ܢܐ |
| 22 ܟܠܗܘܢ ܕܝܢ ܓܥܝܢ ܗܘܘ ܘܒܥܝܢ ܡܢ ܐܠܗܐ ܐܚܝܕ ܟܠ ܕܐܝܠܝܢ ܕܐܬܗܝܡܢ ܠܐܝܠܝܢ ܕܗܝܡܢܘ ܐ̈ܢܝܢ ܢܬܢܛܪ̈ܢ ܡܫܠܡܢܐܝܬ ܒܟܘܠ ܙܘܗܪ |
| 23 ܗܠܝܕܪܘܣ ܕܝܢ ܡܬܚܦܛ ܗܘܐ ܕܢܫܠܡ ܨܒܘܬܐ ܕܐܙܠ ܗܘܐ ܡܛܠܬܗ |
| 24 ܘܫܪܝ ܗܘܐ ܕܢܥܘܠ ܠܒܝܬ ܓܙܐ ܥܡ ܠܒܫ̈ܐ ܕܙܝܢܐ ܘܦ̈ܠܚܐ ܕܥܡܗ ܘܒܪܫܥܬܗ ܐܬܚܙܝ ܡܪܝܐ ܕܪ̈ܘܚܬܐ ܘܐܠܗܐ ܕܟܠ ܚܝܠ ܘܕܟܘܠ ܫܘܠܛܢ ܘܥܒܕ ܠܗܘܢ ܬܕܡܘܪܬܐ ܘܓܠܝܢܐ ܪܒܐ ܐܝܟܢܐ ܕܟܠܗܘܢ ܐܝܠܝܢ ܕܐܡܪܚܘ ܠܡܥܠ ܢܫܬܪܘܢ ܘܢܦܠܘܢ ܒܬܡܗܐ ܕܚܝܠܐ ܕܐܠܗܐ ܕܐܬܚܙܝ ܥܠܝܗܘܢ |
| 25 ܐܬܚܙܝ ܠܗܘܢ ܓܝܪ ܣܘܣܝܐ ܚܕ ܕܚܝܠܐ ܟܕ ܪܟܝܒ ܥܠܘܗܝ ܓܒܪܐ ܕܫܦܝܪ ܒܚܙܘܗ ܣܓܝ ܘܫܒܝܚ ܒܥܘܛܦܐ ܕܠܒܘܫܗ ܕܐܬܐ ܗܘܐ ܒܚܐܦܐ ܘܒܩܠܐ ܕܢܩܫܐ ܕܙܝܢܗ ܡܙܝܥ ܗܘܐ ܩܕܡ ܗܠܝܕܘܪܘܣ ܘܡܬܚܙܐ ܗܘܐ ܕܝܢ ܪܟܒܗ ܕܡܚܙܩ ܗܘܐ ܒܙܝܢܐ ܕܕܗܒܐ |
| 26 ܘܐܬܚܙܝܘ ܬܘܒ ܥܡܗ ܬܪܝܢ ܥܠܝܡ̈ܝܢ ܐܚܪ̈ܢܝܢ ܕܫܦܝܪܝܢ ܒܚܙܘܗܘܢ ܘܫܒܝܚܝܢ ܒܚܝܠܐ ܘܝܐܝܢ ܘܬܡܝܗܝܢ ܒܠܒܘܫ̈ܝܗܘܢ ܘܩܝܡܝܢ ܗܘܘ ܡܢ ܬܪ̈ܝܗܘܢ ܓܒܘ̈ܗܝ ܕܗܠܝܕܪܘܣ ܘܡܢܓܕܝܢ ܗܘܘ ܠܗ ܒܢܓ̈ܕܐ ܪ̈ܘܪܒܐ |
| 27 ܘܢܦܠ ܡܢ ܫܠܝܐ ܥܠ ܐܪܥܐ ܟܕ ܩܛܝܪ ܥܠܘܗܝ ܚܫܘܟܐ ܣܓܝܐܐ ܘܛܥܢܘܗܝ ܘܐܦܩܘܗܝ ܠܒܪ ܠܕܪܬܐ |
| 28 ܠܗܘ ܕܡܢ ܩܕܡ ܩܠܝܠ ܒܫܘܒܗܪܐ ܘܒܚܝܠܐ ܣܓܝܐܐ ܥܐܠ ܗܘܐ ܠܒܝܬ ܓܙܐ ܘܫܕܐ ܗܘܐ ܕܠܐ ܚܝܠ ܟܕ ܠܐ ܡܫܟܚ ܗܘܐ ܕܢܥܕܪ ܢܦܫܗ ܘܐܬܚܙܝ ܓܠܝܐܝܬ ܚܝܠܗ ܕܐܠܗܐ |
| 29 ܘܫܕܝܗܝ ܟܕ ܡܫܪܐ ܗܘܐ ܒܡܥܒܕܢܘܬܐ ܕܩܘܫܬܐ ܟܕ ܠܝܬ ܗܘܐ ܠܗ ܣܒܪܐ ܐܦܠܐ ܣܘܟܝܐ ܕܚ̈ܝܐ |
| 30 ܥܡܐ ܕܝܢ ܒܪܟܘ ܠܡܪܝܐ ܗܘ ܕܥܒܕ ܬܫܒܘܚܬܐ ܠܐܬܪܗ ܘܗܝܟܠܐ ܗܘ ܕܡܢ ܩܕܡ ܩܠܝܠ ܡܠܐ ܗܘܐ ܙܘܥܬܐ ܘܐܪܗܒܐ ܒܣܘܥܪܢܗ ܘܒܓܠܝܢܗ ܕܡܪܝܐ ܐܚܝܕ ܟܠ ܐܬܡܠܝ ܗܘܐ ܒܘܣܡܐ ܘܚܕܘܬܐ |
| 31 ܘܒܪ ܫܥܬܗ ܕܝܢ ܩܪܒܘ ܐܢܫܐ ܡܢ ܪ̈ܚܡܘܗܝ ܕܗܠܝܕܪܣ ܘܒܥܝܢ ܗܘܘ ܡܢ ܚܘܢܝܐ ܕܢܨܠܐ ܘܢܒܥܐ ܡܢ ܡܪܝܐ ܕܢܬܠ ܚ̈ܝܐ ܠܗܘ ܕܡܫܠܡܢܐܝܬ ܪܡܐ ܗܘܐ ܕܠܐ ܣܒܪܐ |
| 32 ܐܬܪܥܝ ܗܘܐ ܕܝܢ ܪܒ ܟܗ̈ܢܐ ܕܕܠܡܐ ܡܡܬܘܡ ܢܣܒܪ ܡܠܟܐ ܕܒܡܥܒܕܢܘܬܐ ܡܕܡ ܗܘܬ ܡܢ ܝܗܘ̈ܕܝܐ ܥܠ ܗܠܝܕܪܘܣ ܘܩܪܒ ܩܘܪ̈ܒܢܐ ܥܠ ܐ̈ܦܝ ܚܝ̈ܘܗܝ ܕܓܒܪܐ |
| 33 ܟܕ ܕܝܢ ܩܐܡ ܗܘܐ ܘܡܚܣܐ ܥܠܘܗܝ ܪܒ ܟܗ̈ܢܐ ܐܬܚܙܝܘ ܬܘܒ ܗܢܘܢ ܗܢܘܢ ܥ̈ܠܝܡܐ ܠܗܠܝܕܪܘܣ ܒܗ ܒܠܒܘ̈ܫܗܘܢ ܗܘ ܩܕܡܝܐ ܘܐܡܪܘ ܠܗ ܛܝܒܘܬܐ ܣܓܝܐܬܐ ܩܒܠ ܠܚܘܢܝܐ ܪܒܟܗܢܐ ܕܡܛܠܬܗ ܓܝܪ ܝܗܒ ܠܟ ܡܪܝܐ ܚ̈ܝܐ |
| 34 ܐܢܬ ܕܝܢ ܕܐܬܢܓܕܬ ܡܢ ܐܠܗܐ ܙܠ ܘܐܟܪܙ ܠܟܠܢܫ ܪܒܘܬܗ ܘܐܘܚܕܢܗ ܥܫܝܢܐ ܘܟܕ ܐܡܪܘ ܠܗ ܗܠܝܢ ܬܘܒ ܠܐ ܐܬܚܙܝܘ |
| 35 ܗܠܝܕܪܘܣ ܕܝܢ ܐܣܩ ܩܘܪ̈ܒܢܐ ܠܐܠܗܐ ܘܒܥܐ ܘܨܠܝ ܩܕܡܘܗܝ ܨܠܘܬܐ ܪܒܬܐ ܕܝܗܒ ܠܗ ܚ̈ܝܐ ܐܦ ܠܚܘܢܝܐ ܕܝܢ ܝܩܪܗ ܪܘܪܒܐܝܬ ܘܗܟܘܬ ܗܦܟ ܘܐܙܠ ܠܘܬ ܡܠܟܐ ܥܡ ܟܠܗ ܚܝܠܗ |
| 36 ܘܡܣܗܕ ܗܘܐ ܘܐܡܪ ܠܟܠܢܫ ܥܒܕܘ̈ܗܝ ܘܚܝܠܗ ܕܐܠܗܐ ܬܩܝܦܐ ܕܩܕܡ ܥ̈ܝܢܘܗܝ ܐܬܚܙܝ ܠܗ |
| 37 ܡܠܟܐ ܕܝܢ ܡܫܐܠ ܗܘܐ ܠܗ ܠܗܠܝܕܪܣ ܥܠ ܨܒܘܬܐ ܕܐܝܟܢܐ ܗܝ ܘܒܥܐ ܗܘܐ ܕܢܫܕܪ ܬܘܒ ܙܒܢܬܐ ܐܚܪܬܐ ܠܐܪܫܠܡ ܘܐܡܪ ܠܗ ܗܠܝܕܪܘܣ |
| 38 ܠܡܢ ܕܐܝܬ ܠܟ ܡܚܝܒܐ ܘܒܥܠܕܒܒܐ ܕܨ̈ܒܘܬܟ ܫܕܪܝܗܝ ܠܬܡܢ ܘܬܩܒܠܝܘܗܝ ܟܕ ܡܢܓܕ ܘܡܫܢܩ ܐܢ ܗܘ ܬܘܒ ܕܢܚܐ ܡܛܘܠ ܕܒܫܪܪܐ ܚܝܠܐ ܕܐܠܗܐ ܐܝܬ ܒܗ ܒܐܬܪܐ ܗܘ |
| 39 ܗܘ ܓܝܪ ܕܐܝܬܘܗܝ ܡܥܡܪܗ ܒܫܡܝܐ ܗܘܝܘ ܣܥܘܪܗ ܘܡܢܛܪܢܗ ܕܐܬܪܐ ܗܘ ܘܠܐܝܠܝܢ ܕܐܙܠܝܢ ܕܢܒܐܫܘܢ ܠܗ ܗܘ ܡܫܢܩ ܘܡܢܓܕ ܘܡܘܒܕ ܠܗܘܢ |
| 40 ܥܠ ܨܒܘܬܗ ܕܝܢ ܕܗܠܝܕܪܘܣ ܘܥܠ ܢܘܛܪܗ ܕܒܝܬ ܓܙܐ ܗܟܢܐ ܗܘܐ |
