Siracide 25
Confronta con un'altra Bibbia
Cambia Bibbia
NOVA VULGATA | VULGATA |
---|---|
1 In tribus placitum est spiritui meo, quae sunt probata coram Deo et hominibus: | 1 In tribus placitum est spiritui meo, quæ sunt probata coram Deo et hominibus : |
2 concordia fratrum et amor proximorum et vir et mulier bene sibi consentientes. | 2 concordia fratrum, et amor proximorum, et vir et mulier bene sibi consentientes. |
3 Tres species odivit anima mea, et aggravor valde animae illorum: | 3 Tres species odivit anima mea, et aggravor valde animæ illorum : |
4 pauperem superbum, divitem mendacem, senem fatuum et insensatum. | 4 pauperem superbum, divitem mendacem, senem fatuum et insensatum. |
5 In iuventute tua non congregasti; quomodo in senectute tua invenies? | 5 Quæ in juventute tua non congregasti, quomodo in senectute tua invenies ? |
6 Quam speciosum canitiei iudicium, et presbyteris cognoscere consilium! | 6 Quam speciosum canitiei judicium, et presbyteris cognoscere consilium ! |
7 Quam speciosa veteranis sapientia, et gloriosis intellectus et consilium! | 7 Quam speciosa veteranis sapientia, et gloriosus intellectus et consilium ! |
8 Corona senum multa peritia, et gloria illorum timor Dei. | 8 Corona senum multa peritia, et gloria illorum timor Dei. |
9 Novem insuspicabilia cordis magnificavi, et decimum dicam in lingua hominibus: | 9 Novem insuspicabilia cordis magnificavi : et decimum dicam in lingua hominibus : |
10 homo, qui iucundatur in filiis, vivens et videns subversionem inimicorum suorum; | 10 homo qui jucundatur in filiis, vivens et videns subversionem inimicorum suorum. |
11 beatus, qui habitat cum muliere sensata et non arat in bove et in asino simul; et qui lingua sua non est lapsus, et qui non servivit indigno se; | 11 Beatus qui habitat cum muliere sensata, et qui lingua sua non est lapsus, et qui non servivit indignis se. |
12 beatus, qui invenit amicum verum, et qui enarrat iustitiam auri audienti; | 12 Beatus qui invenit amicum verum, et qui enarrat justitiam auri audienti. |
13 quam magnus, qui invenit sapientiam et scientiam, sed non est super timentem Dominum. | 13 Quam magnus qui invenit sapientiam et scientiam ! sed non est super timentem Dominum. |
14 Timor Dei super omnia excedit; | 14 Timor Dei super omnia se superposuit. |
15 qui tenet illum, cui assimilabitur? | 15 Beatus homo cui donatum est habere timorem Dei : qui tenet illum, cui assimilabitur ? |
16 Timor Dei initium dilectionis eius; fides autem initium adhaesionis ei. | 16 Timor Dei initium dilectionis ejus : fidei autem initium agglutinandum est ei. |
17 Omnis plaga tristitia cordis est, et omnis malitia nequitia mulieris. | 17 Omnis plaga tristitia cordis est, et omnis malitia nequitia mulieris. |
18 Et omnem plagam et non plagam cordis; | 18 Et omnem plagam, et non plagam videbit cordis : |
19 et omnem nequitiam et non nequitiam mulieris; | 19 et omnem nequitiam, et non nequitiam mulieris : |
20 et omnem calamitatem et non calamitatem odientium; | 20 et omnem obductum, et non obductum odientium : |
21 et omnem vindictam et non vindictam inimicorum. | 21 et omnem vindictam, et non vindictam inimicorum. |
22 Non est venenum nequius super venenum colubri, | 22 Non est caput nequius super caput colubri, |
23 et non est ira super iram mulieris; commorari leoni et draconi placebit quam habitare cum muliere nequam. | 23 et non est ira super iram mulieris. Commorari leoni et draconi placebit, quam habitare cum muliere nequam. |
24 Nequitia mulieris immutat faciem eius et obscurat vultum eius tamquam ursus. In medio proximorum eius accumbet vir eius | 24 Nequitia mulieris immutat faciem ejus : et obcæcat vultum suum tamquam ursus, et quasi saccum ostendit. In medio proximorum ejus |
25 et invitus suspirabit amare. | 25 ingemuit vir ejus, et audiens suspiravit modicum. |
26 Parva omnis malitia prae malitia mulieris: sors peccatorum cadat super illam. | 26 Brevis omnis malitia super malitiam mulieris : sors peccatorum cadat super illam. |
27 Sicut ascensus arenosus in pedibus veterani, sic mulier linguata homini quieto. | 27 Sicut ascensus arenosus in pedibus veterani, sic mulier linguata homini quieto. |
28 Ne incidas in mulieris speciem et non concupiscas mulieris opes. | 28 Ne respicias in mulieris speciem, et non concupiscas mulierem in specie. |
29 Ira et irreverentia et confusio magna | 29 Mulieris ira, et irreverentia, et confusio magna. |
30 mulier, si primatum habeat super virum suum. | 30 Mulier si primatum habeat, contraria est viro suo. |
31 Cor humile et facies tristis et plaga cordis mulier nequam. | 31 Cor humile, et facies tristis, et plaga cordis, mulier nequam. |
32 Manus debiles et genua dissoluta mulier, quae non beatificat virum suum. | 32 Manus debiles et genua dissoluta, mulier quæ non beatificat virum suum. |
33 A muliere initium factum est peccati, et per illam omnes morimur. | 33 A muliere initium factum est peccati, et per illam omnes morimur. |
34 Non des aquae tuae exitum, nec modicum, nec mulieri nequam veniam prodeundi. | 34 Non des aquæ tuæ exitum, nec modicum : nec mulieri nequam veniam prodeundi. |
35 Si non ambulaverit ad manum tuam, confundet te in conspectu inimicorum; | 35 Si non ambulaverit ad manum tuam, confundet te in conspectu inimicorum. |
36 a carnibus tuis abscinde illam et dimitte illam de domo tua. | 36 A carnibus tuis abscinde illam, ne semper te abutatur. |