Sapientia 18

¹ Sanctis autem tuis maxima erat lux,
et horum quidem vocem audiebant, sed figuram non videbant.
Et quia non et ipsi eadem passi erant, magnificabant te ;

² et qui ante læsi erant, quia non lædebantur, gratias agebant,
et ut esset differentia, donum petebant.
³ Propter quod ignis ardentem columnam
ducem habuerunt ignotæ viæ,
et solem sine læsura boni hospitii præstitisti.
⁴ Digni quidem illi carere luce,
et pati carcerem tenebrarum,
qui inclusos custodiebant filios tuos,
per quos incipiebat incorruptum legis lumen sæculo dari.

⁵ Cum cogitarent justorum occidere infantes,
et uno exposito filio et liberato,
in traductionem illorum, multitudinem filiorum abstulisti,
et pariter illos perdidisti in aqua valida.

⁶ Illa enim nox ante cognita est a patribus nostris,
ut vere scientes quibus juramentis crediderunt,
animæquiores essent.
⁷ Suscepta est autem a populo tuo sanitas quidem justorum,
injustorum autem exterminatio.
⁸ Sicut enim læsisti adversarios,
sic et nos provocans magnificasti.
⁹ Absconse enim sacrificabant justi pueri bonorum,
et justitiæ legem in concordia disposuerunt ;
similiter et bona et mala recepturos justos,
patrum jam decantantes laudes.
¹⁰ Resonabat autem inconveniens inimicorum vox,
et flebilis audiebatur planctus ploratorum infantium.
¹¹ Simili autem pœna servus cum domino afflictus est,
et popularis homo regi similia passus.
¹² Similiter ergo omnes, uno nomine mortis,
mortuos habebant innumerabiles :
nec enim ad sepeliendum vivi sufficiebant,
quoniam uno momento quæ erat præclarior
natio illorum exterminata est.
¹³ De omnibus enim non credentes, propter veneficia ;
tunc vero primum cum fuit exterminium primogenitorum,
spoponderunt populum Dei esse.
¹⁴ Cum enim quietum silentium contineret omnia,
et nox in suo cursu medium iter haberet,
¹⁵ omnipotens sermo tuus de cælo, a regalibus sedibus,
durus debellator in mediam exterminii terram prosilivit,
¹⁶ gladius acutus insimulatum imperium tuum portans :
et stans, replevit omnia morte,
et usque ad cælum attingebat stans in terra.
¹⁷ Tunc continuo visus somniorum malorum turbaverunt illos,
et timores supervenerunt insperati.
¹⁸ Et alius alibi projectus semivivus,
propter quam moriebatur causam demonstrabat mortis.
¹⁹ Visiones enim quæ illos turbaverunt hæc præmonebant,
ne inscii quare mala patiebantur perirent.
²⁰ Tetigit autem tunc et justos tentatio mortis,
et commotio in eremo facta est multitudinis :
sed non diu permansit ira tua.
²¹ Prosperans enim homo sine querela deprecari pro populis,
proferens servitutis suæ scutum,
orationem et per incensum deprecationem allegans,
restitit iræ, et finem imposuit necessitati,
ostendens quoniam tuus est famulus.
²² Vicit autem turbas non in virtute corporis,
nec armaturæ potentia :
sed verbo illum qui se vexabat subjecit,
juramenta parentum et testamentum commemorans.
²³ Cum enim jam acervatim cecidissent super alterutrum mortui,
interstitit, et amputavit impetum,
et divisit illam quæ ad vivos ducebat viam.
²⁴ In veste enim poderis quam habebat, totus erat orbis terrarum ;
et parentum magnalia in quatuor ordinibus lapidum erant sculpta,
et magnificentia tua in diademate capitis illius sculpta erat.
²⁵ His autem cessit qui exterminabat, et hæc extimuit :
erat enim sola tentatio iræ sufficiens.