Bamidbàr (במדבר) - Numeri 17

¹ וידבר יהוה אל משה לאמר² דבר אל בני ישראל וקח מאתם מטה מטה לבית אב מאת כל נשיאהם לבית אבתם שנים עשר מטות איש את שמו תכתב על מטהו³ ואת שם אהרן תכתב על מטה לוי כי מטה אחד לראש בית אבותם⁴ והנחתם באהל מועד לפני העדות אשר אועד לכם שמה⁵ והיה האיש אשר אבחר בו מטהו יפרח והשכתי מעלי את תלנות בני ישראל אשר הם מלינם עליכם⁶ וידבר משה אל בני ישראל ויתנו אליו כל נשיאיהם מטה לנשיא אחד מטה לנשיא אחד לבית אבתם שנים עשר מטות ומטה אהרן בתוך מטותם⁷ וינח משה את המטת לפני יהוה באהל העדת⁸ ויהי ממחרת ויבא משה אל אהל העדות והנה פרח מטה אהרן לבית לוי ויצא פרח ויצץ ציץ ויגמל שקדים⁹ ויצא משה את כל המטת מלפני יהוה אל כל בני ישראל ויראו ויקחו איש מטהו¹⁰ ויאמר יהוה אל משה השב את מטה אהרן לפני העדות למשמרת לאות לבני מרי ותכל תלונתם מעלי ולא ימתו¹¹ ויעש משה כאשר צוה יהוה אתו כן עשה¹² ויאמרו בני ישראל אל משה לאמר הן גוענו אבדנו כלנו אבדנו¹³ כל הקרב הקרב אל משכן יהוה ימות האם תמנו לגוע