Divrei Hayamim (דברי הימים) - 2 Cronache 14

¹ וישכב אביה עם אבתיו ויקברו אתו בעיר דויד וימלך אסא בנו תחתיו בימיו שקטה הארץ עשר שנים² ויעש אסא הטוב והישר בעיני יהוה אלהיו³ ויסר את מזבחות הנכר והבמות וישבר את המצבות ויגדע את האשרים⁴ ויאמר ליהודה לדרוש את יהוה אלהי אבותיהם ולעשות התורה והמצוה⁵ ויסר מכל ערי יהודה את הבמות ואת החמנים ותשקט הממלכה לפניו⁶ ויבן ערי מצורה ביהודה כי שקטה הארץ ואין עמו מלחמה בשנים האלה כי הניח יהוה לו⁷ ויאמר ליהודה נבנה את הערים האלה ונסב חומה ומגדלים דלתים ובריחים עודנו הארץ לפנינו כי דרשנו את יהוה אלהינו דרשנו וינח לנו מסביב ויבנו ויצליחו⁸ ויהי לאסא חיל נשא צנה ורמח מיהודה שלש מאות אלף ומבנימן נשאי מגן ודרכי קשת מאתים ושמונים אלף כל אלה גבורי חיל⁹ ויצא אליהם זרח הכושי בחיל אלף אלפים ומרכבות שלש מאות ויבא עד מרשה¹⁰ ויצא אסא לפניו ויערכו מלחמה בגיא צפתה למרשה¹¹ ויקרא אסא אל יהוה אלהיו ויאמר יהוה אין עמך לעזור בין רב לאין כח עזרנו יהוה אלהינו כי עליך נשענו ובשמך באנו על ההמון הזה יהוה אלהינו אתה אל יעצר עמך אנוש¹² ויגף יהוה את הכושים לפני אסא ולפני יהודה וינסו הכושים¹³ וירדפם אסא והעם אשר עמו עד לגרר ויפל מכושים לאין להם מחיה כי נשברו לפני יהוה ולפני מחנהו וישאו שלל הרבה מאד¹⁴ ויכו את כל הערים סביבות גרר כי היה פחד יהוה עליהם ויבזו את כל הערים כי בזה רבה היתה בהם¹⁵ וגם אהלי מקנה הכו וישבו צאן לרב וגמלים וישבו ירושלם