ΜΑΚΚΑΒΑΙΩΝ Δ´ - 4 Maccabei - Maccabees IV 9

¹ τι μελλεις ω τυραννε ετοιμοι γαρ εσμεν αποθνησκειν η παραβαινειν τας πατριους ημων εντολας

² αισχυνομεθα γαρ τους προγονους ημων εικοτως ει μη τη του νομου ευπειθεια και συμβουλω μωυσει χρησαιμεθα

³ συμβουλε τυραννε παρανομιας μη ημας μισων υπερ αυτους ημας ελεα

⁴ χαλεπωτερον γαρ αυτου του θανατου νομιζομεν ειναι σου τον επι τη παρανομω σωτηρια ημων ελεον

⁵ εκφοβεις δε ημας τον δια των βασανων θανατον ημιν απειλων ωσπερ ουχι προ βραχεως παρ' ελεαζαρου μαθων

⁶ ει δ' οι γεροντες των εβραιων δια την ευσεβειαν και βασανισμους υπομειναντες ευσεβησαν αποθανοιμεν αν δικαιοτερον ημεις οι νεοι τας βασανους των σων αναγκων υπεριδοντες ας και ο παιδευτης ημων γερων ενικησεν

⁷ πειραζε τοιγαρουν τυραννε και τας ημων ψυχας ει θανατωσεις δια την ευσεβειαν μη νομισης ημας βλαπτειν βασανιζων

⁸ ημεις μεν γαρ δια τησδε της κακοπαθειας και υπομονης τα της αρετης αθλα εξομεν και εσομεθα παρα θεω δι' ον και πασχομεν

⁹ συ δε δια την ημων μιαιφονιαν αυταρκη καρτερησεις υπο της θειας δικης αιωνιον βασανον δια πυρος

¹⁰ ταυτα αυτων ειποντων ου μονον ως κατα απειθουντων εχαλεπαινεν ο τυραννος αλλα και ως κατα αχαριστων ωργισθη

¹¹ οθεν τον πρεσβυτατον αυτων κελευσθεντες παρηγον οι υπασπισται και διαρρηξαντες τον χιτωνα διεδησαν τας χειρας αυτου και τους βραχιονας ιμασιν εκατερωθεν

¹² ως δε τυπτοντες ταις μαστιξιν εκοπιασαν μηδεν ανυοντες ανεβαλον αυτον επι τον τροχον

¹³ περι ον κατατεινομενος ο ευγενης νεανιας εξαρθρος εγινετο

¹⁴ και κατα παν μελος κλωμενος εκακηγορει λεγων

¹⁵ τυραννε μιαρωτατε και της ουρανιου δικης εχθρε και ωμοφρων ουκ ανδροφονησαντα με τουτον καταικιζεις τον τροπον ουδε ασεβησαντα αλλα θειου νομου προασπιζοντα

¹⁶ και των δορυφορων λεγοντων ομολογησον φαγειν οπως απαλλαγης των βασανων

¹⁷ ο δε ειπεν ουχ ουτως ισχυρος υμων εστιν ο τροχος ω μιαροι διακονοι ωστε μου τον λογισμον αγξαι τεμνετε μου τα μελη και πυρουτε μου τας σαρκας και στρεβλουτε τα αρθρα

¹⁸ δια πασων γαρ υμας πεισω των βασανων οτι μονοι παιδες εβραιων υπερ αρετης εισιν ανικητοι

¹⁹ ταυτα λεγοντι υπεστρωσαν πυρ και το διερεθιζον τον τροχον προσεπικατετεινον

²⁰ εμολυνετο δε παντοθεν αιματι ο τροχος και ο σωρος της ανθρακιας τοις των ιχωρων εσβεννυτο σταλαγμοις και περι τους αξονας του οργανου περιερρεον αι σαρκες

²¹ και περιτετμημενον ηδη εχων το των οστεων πηγμα ο μεγαλοφρων και αβραμιαιος νεανιας ουκ εστεναξεν

²² αλλ' ωσπερ εν πυρι μετασχηματιζομενος εις αφθαρσιαν υπεμεινεν ευγενως τας στρεβλας

²³ μιμησασθε με αδελφοι λεγων μη μου τον αγωνα λειποτακτησητε μηδε εξομοσησθε μου την της ευψυχιας αδελφοτητα

²⁴ ιεραν και ευγενη στρατειαν στρατευσασθε περι της ευσεβειας δι' ης ιλεως η δικαια και πατριος ημων προνοια τω εθνει γενηθεισα τιμωρησειεν τον αλαστορα τυραννον

²⁵ και ταυτα ειπων ο ιεροπρεπης νεανιας απερρηξεν την ψυχην

²⁶ θαυμασαντων δε παντων την καρτεροψυχιαν αυτου ηγον οι δορυφοροι τον καθ' ηλικιαν του προτερου δευτερον και σιδηρας εναρμοσαμενοι χειρας οξεσι τοις ονυξιν οργανω και καταπελτη προσεδησαν αυτον

²⁷ ως δ' ει φαγειν βουλοιτο πριν βασανιζεσθαι πυνθανομενοι την ευγενη γνωμην ηκουσαν

²⁸ απο των τενοντων ταις σιδηραις χερσιν επισπασαμενοι μεχρι των γενειων την σαρκα πασαν και την της κεφαλης δοραν οι παρδαλεοι θηρες απεσυρον ο δε ταυτην βαρεως την αλγηδονα καρτερων ελεγεν

²⁹ ως ηδυς πας θανατου τροπος δια την πατριον ημων ευσεβειαν εφη τε προς τον τυραννον

³⁰ ου δοκεις παντων ωμοτατε τυραννε πλεον εμου σε βασανιζεσθαι ορων σου νικωμενον τον της τυραννιδος υπερηφανον λογισμον υπο της δια την ευσεβειαν ημων υπομονης

³¹ εγω μεν γαρ ταις δια την αρετην ηδοναις τον πονον επικουφιζομαι

³² συ δε εν ταις της ασεβειας απειλαις βασανιζη ουκ εκφευξη δε μιαρωτατε τυραννε τας της θειας οργης δικας