ΜΑΚΚΑΒΑΙΩΝ Δ´ - 4 Maccabei - Maccabees IV 17

¹ ελεγον δε και των δορυφορων τινες οτι ως εμελλεν συλλαμβανεσθαι και αυτη προς θανατον ινα μη ψαυσειεν τις του σωματος αυτης εαυτην ερριψε κατα της πυρας

² ω μητηρ συν επτα παισιν καταλυσασα την του τυραννου βιαν και ακυρωσασα τας κακας επινοιας αυτου και δειξασα την της πιστεως γενναιοτητα

³ καθαπερ γαρ συ στεγη επι τους στυλους των παιδων γενναιως ιδρυμενη ακλινης υπηνεγκας τον δια των βασανων σεισμον

⁴ θαρρει τοιγαρουν ω μητηρ ιεροψυχε την ελπιδα της υπομονης βεβαιαν εχουσα προς τον θεον

⁵ ουχ ουτως σεληνη κατ' ουρανον συν αστροις σεμνη καθεστηκεν ως συ τους ισαστερους επτα παιδας φωταγωγησασα προς την ευσεβειαν εντιμος καθεστηκας θεω και εστηρισαι συν αυτοις εν ουρανω

⁶ ην γαρ η παιδοποιια σου απο αβρααμ του πατρος

⁷ ει δε εξον ημιν ην ωσπερ επι τινος ζωγραφησαι την της ευσεβειας σου ιστοριαν ουκ αν εφριττον οι θεωρουντες ορωντες μητερα επτα τεκνων δι' ευσεβειαν ποικιλας βασανους μεχρι θανατου υπομεινασαν

⁸ και γαρ αξιον ην και επ' αυτου του επιταφιου αναγραψαι και ταυτα τοις απο του εθνους εις μνειαν λεγομενα

⁹ ενταυθα γερων ιερευς και γυνη γεραια και επτα παιδες εγκεκηδευνται δια τυραννου βιαν την εβραιων πολιτειαν καταλυσαι θελοντος

¹⁰ οι και εξεδικησαν το γενος εις θεον αφορωντες και μεχρι θανατου τας βασανους υπομειναντες

¹¹ αληθως γαρ ην αγων θειος ο δι' αυτων γεγενημενος

¹² ηθλοθετει γαρ τοτε αρετη δι' υπομονης δοκιμαζουσα το νικος αφθαρσια εν ζωη πολυχρονιω

¹³ ελεαζαρ δε προηγωνιζετο η δε μητηρ των επτα παιδων ενηθλει οι δε αδελφοι ηγωνιζοντο

¹⁴ ο τυραννος αντηγωνιζετο ο δε κοσμος και ο των ανθρωπων βιος εθεωρει

¹⁵ θεοσεβεια δε ενικα τους εαυτης αθλητας στεφανουσα

¹⁶ τινες ουκ εθαυμασαν τους της θειας νομοθεσιας αθλητας τινες ουκ εξεπλαγησαν

¹⁷ αυτος γε τοι ο τυραννος και ολον το συμβουλιον εθαυμασαν αυτων την υπομονην

¹⁸ δι' ην και τω θειω νυν παρεστηκασιν θρονω και τον μακαριον βιουσιν αιωνα

¹⁹ και γαρ φησιν ο μωυσης και παντες οι ηγιασμενοι υπο τας χειρας σου

²⁰ και ουτοι ουν αγιασθεντες δια θεον τετιμηνται ου μονον ταυτη τη τιμη αλλα και τω δι' αυτους το εθνος ημων τους πολεμιους μη επικρατησαι

²¹ και τον τυραννον τιμωρηθηναι και την πατριδα καθαρισθηναι ωσπερ αντιψυχον γεγονοτας της του εθνους αμαρτιας

²² και δια του αιματος των ευσεβων εκεινων και του ιλαστηριου του θανατου αυτων η θεια προνοια τον ισραηλ προκακωθεντα διεσωσεν

²³ προς γαρ την ανδρειαν αυτων της αρετης και την επι ταις βασανοις αυτων υπομονην ο τυραννος απιδων ανεκηρυξεν ο αντιοχος τοις στρατιωταις αυτου εις υποδειγμα την εκεινων υπομονην

²⁴ εσχεν τε αυτους γενναιους και ανδρειους εις πεζομαχιαν και πολιορκιαν και εκπορθησας ενικησεν παντας τους πολεμιους