Isaiah (ישעיה) - Isaia 147

STUTTGARTENSIA-DELITZSCH	MODERN HEBREW BIBLE
1 הַלְלוּ יָהּ ׀ כִּי־טֹוב זַמְּרָה אֱלֹהֵינוּ כִּי־נָעִים נָאוָה תְהִלָּה	1 הללו יה כי טוב זמרה אלהינו כי נעים נאוה תהלה
2 בֹּונֵה יְרוּשָׁלִַם יְהוָה נִדְחֵי יִשְׂרָאֵל יְכַנֵּס	2 בונה ירושלם יהוה נדחי ישראל יכנס
3 הָרֹפֵא לִשְׁבוּרֵי לֵב וּמְחַבֵּשׁ לְעַצְּבֹותָם	3 הרפא לשבורי לב ומחבש לעצבותם
4 מֹונֶה מִסְפָּר לַכֹּוכָבִים לְכֻלָּם שֵׁמֹות יִקְרָא	4 מונה מספר לכוכבים לכלם שמות יקרא
5 גָּדֹול אֲדֹונֵינוּ וְרַב־כֹּחַ לִתְבוּנָתֹו אֵין מִסְפָּר	5 גדול אדונינו ורב כח לתבונתו אין מספר
6 מְעֹודֵד עֲנָוִים יְהוָה מַשְׁפִּיל רְשָׁעִים עֲדֵי־אָרֶץ	6 מעודד ענוים יהוה משפיל רשעים עדי ארץ
7 עֱנוּ לַיהוָה בְּתֹודָה זַמְּרוּ לֵאלֹהֵינוּ בְכִנֹּור	7 ענו ליהוה בתודה זמרו לאלהינו בכנור
8 הַמְכַסֶּה שָׁמַיִם ׀ בְּעָבִים הַמֵּכִין לָאָרֶץ מָטָר הַמַּצְמִיחַ הָרִים חָצִיר	8 המכסה שמים בעבים המכין לארץ מטר המצמיח הרים חציר
9 נֹותֵן לִבְהֵמָה לַחְמָהּ לִבְנֵי עֹרֵב אֲשֶׁר יִקְרָאוּ	9 נותן לבהמה לחמה לבני ערב אשר יקראו
10 לֹא בִגְבוּרַת הַסּוּס יֶחְפָּץ לֹא־בְשֹׁוקֵי הָאִישׁ יִרְצֶה	10 לא בגבורת הסוס יחפץ לא בשוקי האיש ירצה
11 רֹוצֶה יְהוָה אֶת־יְרֵאָיו אֶת־הַמְיַחֲלִים לְחַסְדֹּו	11 רוצה יהוה את יראיו את המיחלים לחסדו
12 שַׁבְּחִי יְרוּשָׁלִַם אֶת־יְהוָה הַלְלִי אֱלֹהַיִךְ צִיֹּון	12 שבחי ירושלם את יהוה הללי אלהיך ציון
13 כִּי־חִזַּק בְּרִיחֵי שְׁעָרָיִךְ בֵּרַךְ בָּנַיִךְ בְּקִרְבֵּךְ	13 כי חזק בריחי שעריך ברך בניך בקרבך
14 הַשָּׂם־גְּבוּלֵךְ שָׁלֹום חֵלֶב חִטִּים יַשְׂבִּיעֵךְ	14 השם גבולך שלום חלב חטים ישביעך
15 הַשֹּׁלֵחַ אִמְרָתֹו אָרֶץ עַד־מְהֵרָה יָרוּץ דְּבָרֹו	15 השלח אמרתו ארץ עד מהרה ירוץ דברו
16 הַנֹּתֵן שֶׁלֶג כַּצָּמֶר כְּפֹור כָּאֵפֶר יְפַזֵּר	16 הנתן שלג כצמר כפור כאפר יפזר
17 מַשְׁלִיךְ קַרְחֹו כְפִתִּים לִפְנֵי קָרָתֹו מִי יַעֲמֹד	17 משליך קרחו כפתים לפני קרתו מי יעמד
18 יִשְׁלַח דְּבָרֹו וְיַמְסֵם יַשֵּׁב רוּחֹו יִזְּלוּ־מָיִם	18 ישלח דברו וימסם ישב רוחו יזלו מים
19 מַגִּיד [דְּבָרֹו כ] (דְּבָרָיו ק) לְיַעֲקֹב חֻקָּיו וּמִשְׁפָּטָיו לְיִשְׂרָאֵל	19 מגיד דברו ליעקב חקיו ומשפטיו לישראל
20 לֹא עָשָׂה כֵן ׀ לְכָל־גֹּוי וּמִשְׁפָּטִים בַּל־יְדָעוּם הַלְלוּ־יָהּ	20 לא עשה כן לכל גוי ומשפטים בל ידעום הללו יה