Psalmi - 5

¹ Magistro chori. Ad tibias. Psalmus. David.
²Verba mea auribus percipe, Domine;intellege gemitum meum.
³Intende voci clamoris mei,rex meus et Deus meus.
⁴Quoniam ad te orabo, Domine,mane exaudies vocem meam;mane astabo tibi et exspectabo.
⁵Quoniam non Deus volens iniquitatem tu es;neque habitabit iuxta te malignus,
⁶neque permanebunt iniusti ante oculos tuos.
⁷Odisti omnes, qui operantur iniquitatem,perdes omnes, qui loquuntur mendacium;virum sanguinum et dolosum abominabitur Dominus.
⁸Ego autem in multitudine misericordiae tuaeintroibo in domum tuam;adorabo ad templum sanctum tuum in timore tuo.
⁹Domine, deduc me in iustitia tua propter inimicos meos,dirige in conspectu meo viam tuam.
¹⁰Quoniam non est in ore eorum veritas,cor eorum fovea;sepulcrum patens est guttur eorum,molliunt linguas suas.
¹¹Iudica illos, Deus; decidant a cogitationibus suis;secundum multitudinem impietatum eorum expelle eos,quoniam irritaverunt te, Domine.
¹²Et omnes, qui sperant in te,laetentur, in aeternum exsultent.Obumbrabis eis, et gloriabuntur in te,qui diligunt nomen tuum;
¹³quoniam tu benedices iusto, Domine,quasi scuto, bona voluntate coronabis eum.