Ad Corinthios I 16

¹ De collectis autem, quæ fiunt in sanctos, sicut ordinavi ecclesiis Galatiæ, ita et vos facite.

² Per unam sabbati unusquisque vestrum apud se seponat, recondens quod ei bene placuerit : ut non, cum venero, tunc collectæ fiant.

³ Cum autem præsens fuero, quos probaveritis per epistolas, hos mittam perferre gratiam vestram in Jerusalem.

⁴ Quod si dignum fuerit ut et ego eam, mecum ibunt.

⁵ Veniam autem ad vos, cum Macedoniam pertransiero : nam Macedoniam pertransibo.

⁶ Apud vos autem forsitan manebo, vel etiam hiemabo : ut vos me deducatis quocumque iero.

⁷ Nolo enim vos modo in transitu videre, spero enim me aliquantulum temporis manere apud vos, si Dominus permiserit.

⁸ Permanebo autem Ephesi usque ad Pentecosten.

⁹ Ostium enim mihi apertum est magnum, et evidens : et adversarii multi.

¹⁰ Si autem venerit Timotheus, videte ut sine timore sit apud vos : opus enim Domini operatur, sicut et ego.

¹¹ Ne quis ergo illum spernat : deducite autem illum in pace, ut veniat ad me : exspecto enim illum cum fratribus.

¹² De Apollo autem fratre vobis notum facio, quoniam multum rogavi eum ut veniret ad vos cum fratribus : et utique non fuit voluntas ut nunc veniret : veniet autem, cum ei vacuum fuerit.

¹³ Vigilate, state in fide, viriliter agite, et confortamini.

¹⁴ Omnia vestra in caritate fiant.

¹⁵ Obsecro autem vos fratres, nostis domum Stephanæ, et Fortunati, et Achaici : quoniam sunt primitiæ Achaiæ, et in ministerium sanctorum ordinaverunt seipsos :

¹⁶ ut et vos subditi sitis ejusmodi, et omni cooperanti, et laboranti.

¹⁷ Gaudeo autem in præsentia Stephanæ, et Fortunati, et Achaici : quoniam id, quod vobis deerat, ipsi suppleverunt :

¹⁸ refecerunt enim et meum spiritum, et vestrum. Cognoscite ergo qui hujusmodi sunt.

¹⁹ Salutant vos ecclesiæ Asiæ. Salutant vos in Domino multum, Aquila et Priscilla cum domestica sua ecclesia : apud quos et hospitor.

²⁰ Salutant vos omnes fratres. Salutate invicem in osculo sancto.

²¹ Salutatio, mea manu Pauli.

²² Si quis non amat Dominum nostrum Jesum Christum, sit anathema, Maran Atha.

²³ Gratia Domini nostri Jesu Christi vobiscum.

²⁴ Caritas mea cum omnibus vobis in Christo Jesu. Amen.